יא א וַאֲנִי אֹמֵר כַּיּוֹם הֲכִי הִשְׁלִיךְ אֱלֹהִים אֶת-עַמּוֹ מֵעַל-פָּנָיו (תהילים צד' יד') חָלִילָה גַּם-אָנֹכִי יִשְׂרְאֵלִי אֲנִי מִזֶּרַע אַבְרָהָם לְמַטֵּה בִנְיָמִין׃ ב לֹא-הִשְׁלִיךְ אֱלֹהִים מֵעַל-פָּנָיו אֶת-עַמּוֹ אֲשֶׁר יְדָעוֹ מִקֶּדֶם הֲלֹא יְדַעְתֶּם אֶת-אֲשֶׁר יֹאמַר הַכָּתוּב בְּאֵלִיָּהוּ בְּהִתְאוֹנְנוֹ עַל-יִשְׂרָאֵל לִפְנֵי אֱלֹהִים לֵאמֹר׃ ג יְהוָֹה אֶת-נְבִיאֶיךָ הָרְגוּ וְאֶת-מִזְבְּחֹתֶיךָ הָרָסוּ וָאִוָּתֵר אֲנִי לְבַדִּי וַיְבַקְשׁוּ אֶת-נַפְשִׁי לְקַחְתָּה׃(מלכים א', יט' י'; יט' יד') ד וּמַה יַּעֲנֶה אֹתוֹ דְּבַר אֱלֹהִים הִשְׁאַרְתִּי לִי שִׁבְעַת אֲלָפִים אִישׁ אֲשֶׁר לֹא-כָרְעוּ עַל-בִּרְכַּיִם לַבָּעַל׃(מלכים א', יט' יח') ה וְכֵן גַּם-בַּיּוֹם הַזֶּה הִשְׁאִיר לוֹ שְׁאֵרִית כַּאֲשֶׁר בָּחַר בָּהֶם בְּחָסֶד׃ ו וְאִם בְּחֶסֶד לֹא עָשָׂה זֹאת עוֹד בִּשְׂכַר מַעֲשֶׂה כִּי אִם-כֵּן הַחֶסֶד אֵינֶנּוּ עוֹד חָסֶד וְאִם-הָיְתָה מִתּוֹךְ הַמַּעֲשִׂים אֵינֶנוּ-עוֹד חֶסֶד כִּי אִם-כֵּן הַמַּעֲשֶׂה יֶחְדַּל לִהְיוֹת מַעֲשֶׂה׃ ז וְעַתָּה מָה אֵפוֹא בְּנֵי יִשְׂרָאֵל לֹא הִשִּׂיגוּ אֶת-אֲשֶׁר בִּקְשׁוּ רַק הַנִּבְחָרִים הִשִּׂיגוּ וְהַנּוֹתָרִים הֻכּוּ בָּעִוָּרוֹן׃ ח כַּכָּתוּב נָתַן לָהֶם יְהוָֹה רוּחַ תַּרְדֵּמָה עֵינַיִם לֹא לִרְאוֹת וְאָזְנַיִם לֹא לִשְׁמֹעַ עַד-הַיּוֹם הַזֶּה׃(ישעיהו כט' י'; דברים כט' ג') ט וְדָוִד אֹמֵר יְהִי שֻׁלְחָנָם לְפַח וּלְרָשֶׁת וּלְמוֹקֵשׁ וּלְשִׁלּוּמִים לָהֶם׃ י תֶּחֱשַׁכְנָה עֵינֵיהֶם מֵרְאוֹת וּמָתְנֵיהֶם תָּמִיד הַמְעֵד׃(תהילים סט' כג'-כד') יא וַאֲנִי אֹמֵר כַּיּוֹם הֲכִי נוֹקְשׁוּ לְמַעַן יִפְּלוּ וְלֹא יוֹסִיפוּ קוּם חָלִילָה אַךְ בְּמַפַּלְתָּם יָצְאָה יְשׁוּעָה לַגּוֹיִים לְמַעַן הַקְנִיאָם׃ יב אַךְ אִם-מַפַּלְתָּם הָיְתָה תְּשׁוּעַת הָעוֹלָם וְנִזְקָם לְחֵיל גּוֹיִם אַף כִּי קוּמָם וְהֵם מְלֵאִים׃ יג וַאֲלֵיכֶם הַגּוֹיִם אֲנִי דֹבֵר אַחֲרֵי אֲשֶׁר שָׁלִיחַ לַגּוֹיִים אָנֹכִי אֶת-מִשְׁמַרְתִּי אֲכַבֵּדָה׃ יד אוּלַי אַקְנִיא אֶת-בְּנֵי עַמִּי וּבְשָׂרִי וְהוֹשַׁעְתִּי לַאֲחָדִים מֵהֶם׃ טו כִּי אִם-מֵאֲשֶׁר נִדְּחוּ בָּאָה עֵת רָצוֹן לְישְׁבֵי תֵבֵל מָה-אֵפוֹא תִהְיֶה לָעֵת יִקָּבְצוּ הֲלֹא חַיִּים מִן-הַמֵּתִים׃ טז וְאִם-רֵאשִׁית הָעֲרִסָה קֹדֶשׁ כֵּן גַּם-הָעֲרִיסָה (במדבר טו' יט'-כא') וְאִם-שֹׁרֶשׁ הָעֵץ קֹדֶשׁ כֵּן גַּם-עֲנָפָיו׃ יז וְכִי נִקְטְפוּ מִן-הָעֲנָפִים (ירמיהו יא' טז') וְאַתָּה זֵית הַיַּעַר נִטַּעְתָּ בִמְקוֹמָם וַתִּתְעָרֶה בְּשֹׁרֶשׁ הַזַּיִת וּבְדִשְׁנוֹ׃ יח אַל-תִּתְנַשֵּׂא עַל-הָעֲנָפִים וְאִם-תִּתְנַשֵּׂא זְכֹר כִּי לֹא אַתָּה תִשָּׂא אֶת-הַשֹּׁרֶשׁ כִּי אִם-הַשֹּׁרֶשׁ יִשָּׂא אֹתָךְ׃ יט וְהֵן תַּעֲנֶה הֲלֹא נִקְטְפוּ הָעֲנָפִים לְהַרְכִּיב אֹתִי עֲלֵיהֶם׃ כ כֵּן דִּבַּרְתָּ הֵן נִקְטְפוּ בְחֹסֶר אֱמוּנָתָם וְאַתָּה נִצָּב בֶּאֱמוּנָתֶךָ אַל-יִגְבַּהּ לִבְּךָ כִּי אִם-יְרָא׃ כא כִּי אִם-לֹא חָמַל אֱלֹהִים עַל-הָעֲנָפִים הָאֱזְרָחִים הֲלֹא גַּם-עָלֶיךָ לֹא-יַחְמֹל׃ כב שׁוּר-נָא אֵפוֹא חֶסֶד אֱלֹהִים וּמִשְׁפָּטוֹ הַנּוֹרָא לָאֵלֶּה הַנּוֹקָשִׁים מִשְׁפָּט נוֹרָא וּלְךָ חֶסֶד אֱלֹהִים אִם-אָרְחוֹת חֶסֶד תִּשְׁמֹר וְאִם-אַיִן גַּם-אַתָּה תִּגָּדֵעַ׃ כג וְגַם-הֵם אִם-לֹא יַחֲזִיקוּ בְחֹסֶר אֱמוּנָתָם יִטָּעוּ כִּי-יָכֹל אֱלֹהִים לָשׁוּב לָטַעַת אֹתָם׃ כד כִּי אִם-אַתָּה נִקְטַפְתָּ מִזֵּית הַיַּעַר בְּאַדְמַת מוֹלַדְתּוֹ וְנִטַּעְתָּ בְמוֹ-זַיִת טוֹב אֲשֶׁר לֹא כְחֻקֶּךָ אַף-כִּי הָעֲנָפִים הָאֶזְרָחִים בְּמוֹ-זֵיתָם יִטָּעוּ׃ כה כִּי אֵין-נַפְשִׁי לְכַסּוֹת מִכֶּם אַחַי אֶת-הַסּוֹד הַזֶּה פֶּן-תִּהְיוּ חֲכָמִים בְּעֵינֵיכֶם כִּי יִשְׂרָאֵל הֻכָּה בְּעִוָּרוֹן מִקָּצֶה אֶחָד עַד כִּי-יָבֹא מְלֹא הַגּוֹיִם׃ כו וּבְכֵן כָּל-יִשְׂרָאֵל יִוָּשֵׁעַ כַּכָּתוּב וּבָא מִצִּיּוֹן גּוֹאֵל וְיָשִׁיב פֶּשַׁע מִיַּעֲקֹב׃ כז וַאֲנִי זֹאת בְּרִיתִי אוֹתָם (ישעיהו נט' כ'-כא') כִּי-אֶסְלַח לַעֲוֹנָם׃(ירמיהו לא' לג') כח הֵן בִּדְבַר הַבְּשׂוֹרָה שְׂנוּאִים הֵם בִּגְלַלְכֶם אַךְ בִּדְבַר הַבְּחִירָה אֲהוּבִים הֵם בִּגְלַל הָאָבוֹת׃(ויקרא כו' מו') כט כִּי לֹא-יִנָּחֵם אֱלֹהִים עַל-מַתְּנַת יָדוֹ וְעַל-קְרִיאַת פִּיהוּ׃ ל כִּי כַּאֲשֶׁר גַּם-אַתֶּם לְפָנִים לֹא הֶאֱמַנְתֶּם בֵּאלֹהִים וְעַתָּה רֻחַמְתֶּם עֵקֶב חֹסֶר אֱמוּנָתָם׃ לא כֵּן גַּם-הֵם לֹא הֶאֱמִינוּ עָתָּה לְמַעַן עֵקֶב רַחֲמֵיכֶם גַּם-הֵמָּה יְרֻחָמוּ׃ לב כִּי-הִסְגִּיר אֱלֹהִים אֶת-כֻּלָּם לְלֹא-אֱמוּנָה לְמַעַן יְרַחֵם עַל-כֻּלָּמוֹ׃ לג מֶה-עָמֹק תְּהוֹם הַחָכְמָה וְהַדַּעַת לֵאלֹהִים (תהילים צב' ו') מִי יַחְקֹר מִשְׁפָּטָיו וּדְרָכָיו מִי יִמְצָא׃(דניאל ב' כ'; איוב יא' ז'-ט') לד כִּי מִי-תִכֵּן אֶת-רוּחַ יְהוָֹה וְאִישׁ עֲצָתוֹ יוֹדִיעֶנּוּ׃(ישעיהו מ' יג') לה אוֹ מִי-הִקְדִּים לָתֵת אֵלָיו וִישֻׁלַּם לוֹ׃(איוב מא' ב'; ירמיהו כג' יח') לו כִּי הַכֹּל מִיָּדוֹ הַכֹּל בּוֹ וְהַכֹּל לוֹ הוּא אֲשֶׁר-לוֹ הַכָּבוֹד לְעוֹלָם וָעֶד אָמֵן׃(תהילים קד' לא')