יב א וְעַתָּה אֲנִי מִתְחַנֵּן אֲלֵכֶם אַחַי בָּרַחֲמֵי אֱלֹהִים לְהַקְדִּישׁ אֶת-גְּוִיּוֹתֵיכֶם כְּקָרְבָּן חַי וְקָדוֹשׁ לְרָצוֹן לֵאלֹהִים כִּי-בְזֹאת תַּשְׂכִּילוּ לַעֲבֹד אֹתוֹ׃ ב וְאַל-תִּהְיוּ דוֹמִים לִבְנֵי הָעוֹלָם הַזֶּה כִּי אִם-תְּנוּ לִבְּכֶם לְהִתְחַדֵּשׁ וְנֶהְפַּכְתֶּם לַאֲנָשִׁים אֲחֵרִים וְעֵינֵיכֶם לֵאלֹהִים לִבְחֹן מַה-הוּא רְצוֹנוֹ הַטּוֹב וְהַנָּעִים וְהַשָּׁלֵם׃ ג כִּי עַל-פִּי רוּחַ הַחֵן הַנָּתוּן לִי אֶקְרָא לְאִישׁ אִישׁ מִכֶּם לְבִלְתִּי יַעֲרִיךְ אֶת-נַפְשׁוֹ יֶתֶר מֵאֲשֶׁר נָכוֹן לוֹ כִּי אִם-הַעֲרֵךְ וְהַצְנֵעַ לְפִי מִדַּת הָאֱמוּנָה אֲשֶׁר-מָדַד לוֹ אֱלֹהִים׃ ד כִּי כַּאֲשֶׁר יְצֻרִים רַבִּים לָנוּ בְּגוּף אֶחָד וְלֹא לְכָל-הַיְצֻרִים מִשְׁמֶרֶת אֶחָת׃ ה כֵּן רַבִּים אֲנַחְנוּ לְגוּף אֶחָד בַּמָּשִׁיחַ וְאִישׁ אִישׁ מִמֶּנּוּ כִּיצוּר לַחֲבֵרוֹ׃ ו וְכֵן לָנוּ מַתָּנוֹת שֹׁנוֹת לְפִי רוּחַ הַחֵן הַנָּתוּן לָנוּ אִם-נְבוּאָה נִתְנַבֵּא לְפִי קַו אֱמוּנָתֵנוּ׃ ז מִי הָעֹמֵד לְשָׁרֵת יְשָׁרֵת כְּאִישׁ חָיִל וְכֵן הַמּוֹרֶה יוֹרֶה כַּמִּשְׁפָּט׃ ח הַמוֹכִיחַ יַשְׂכִּיל פִּיהוּ בְתוֹכַחְתּוֹ הַנֹּתֵן יִדְּבֶנּוּ לִבּוֹ בְּמַתְּנַת יָדוֹ הָעֹמֵד בְּרֹאשׁ הָעֵדָה יַעֲמֹד כְּאִישׁ חָרוּץ וְהַגֹּמֵל חֶסֶד יִגְמֹל בְּטוּב לֵב׃ ט אַל-תְּהִי אַהֲבַתְכֶם בִּשְׂפַת חֲלָקוֹת שִׁנְאוּ אֶת-הָרָע וְדִבְקוּ בַּטּוֹב׃(תהילים לד' טו'; עמוס ה' טו') י אֶהֱבוּ אִישׁ אֶת-אָחִיהוּ מִמְּקוֹר רַחֲמֵיכֶם וְכַבְּדוּ אִישׁ אֶת-חֲבֵרוֹ יוֹתֵר מִנַּפְשְׁכֶם׃ יא שִׁקְדוּ עַל-מַעֲשֵׂיכֶם וְאַל-תֵּעָצְלוּ הִתְאשְׁשׁוּ בָרוּחַ וְעִבְדוּ אֶת-יְהוָֹה׃ יב שִׂמְחוּ בַתִּקְוָה הוֹחִילוּ בַצָּרָה חִזְקוּ וְאִמְצוּ בַתְּפִלָּה תָּמִיד׃ יג הִתְחַבְּרוּ לְמַלֹּאת מַחֲסֹרֵי הַקְּדוֹשִׁים וְחוּשׁוּ לְהָבִיא אֹרְחִים לְבָתֵּיכֶם׃(ישעיהו נח' ז') יד בָּרְכוּ אֶת-רֹדְפֵכֶם בָּרְכוּ וְאַל-תְּקַלֵּלוּ׃ טו שִׂמְחוּ עִם-הַשְּׂמֵחִים וּבְכוּ עִם-הַבֹּכִים׃ טז שִׁיתוּ אֶת לִבְּכֶם לַחְשֹׁב אִישׁ אִישׁ כִּלְבַב אָחִיו אַל-תְּהַלְּכוּ בִגְדֹלוֹת מִכֶּם הִתְרוֹעֲעוּ עִם-עֲנָוִים וְאַל-תִּהְיוּ חֲכָמִים בְּעֵינֵיכֶם׃(משלי ג' ז'; ישעיהו ה' כא') יז אַל-תִּגְמְלוּ לְאִישׁ רָעָה תַּחַת רָעָה (משלי כד' כט') חוּשׁוּ לַעֲשׂוֹת אֶת-הַטּוֹב בְּעֵינֵי-כֹל׃ יח וְאִם-יֵשׁ מָקוֹם כַּאֲשֶׁר יֶשׁ-לְאֵל יֶדְכֶם הַשְׁלִימוּ עִם-כָּל-אָדָם׃ יט אַל-תִּתְנַקְּמוּ יְדִידִים כִּי אִם-תְּנוּ מָקוֹם לַחֲרוֹן-אָף כִּי כָתוּב לִי נָקָם אֲנִי אֲשַׁלֵם אָמַר יְהוָֹה׃(דברים לב' לה') כ וְאִם-רָעֵב שׂנַאֲךָ הַאֲכִילֵהוּ לֶחֶם וְאִם-צָמֵא הַשְׁקֵהוּ מָיִם כִּי גֶחָלִים אַתָּה חֹתֶה עַל-רֹאשׁוֹ׃(משלי כה' כא'-כב') כא אַל-תִּכָּבֵשׁ לִפְנֵי הָרָע כִּי אִם-כְּבֹשׁ אֶת-הָרַע לְפָנֶיךָ בַּטּוֹב׃