י א אַחַי תַּאֲוַת לִבִּי וּתְפִלָּתִי לֵאלֹהִים בְּעַד יִשְׂרָאֵל אֲשֶׁר יִוָּשֵׁעוּ׃ ב כִּי עֵדוּת אֲנִי לָהֶם כִּי קִנְאַת אֱלֹהִים אִתָּם אַךְ לֹא-בְהַשְׂכֵּל׃ ג כִּי מֵאֲשֶׁר צִדְקַת אֱלֹהִים הִשְׂכִּילוּ וַיִּתְאַמְּצוּ לְהָקִים צִדְקַת נַפְשָׁם לֹא נִכְנַע לִבָּם לִפְנֵי צִדְקַת אֱלֹהִים׃ ד כִּי תַכְלִית הַתּוֹרָה הוּא הַמָּשִׁיחַ לִצְדָקָה לְכָל-הַמַּאֲמִין בּוֹ׃ ה כִּי משֶׁה כֹתֵב עַל-הַצְּדָקָה לְפִי מִשְׁפְּטֵי הַתּוֹרָה אֲשֶׁר יַעֲשֶׂה אֹתָם הָאָדָם וָחַי בָּהֶם׃(ויקרא יח' ה') ו וְהַצְּדָקָה מִמְּקוֹר הָאֱמוּנָה תִּקְרָא כָזֹאת אַל-תֹּאמַר בִּלְבָבְךָ מִי יַעֲלֶה הַשָּׁמָיְמָה זֶה הוּא לְהוֹרִיד אֶת-הַמָּשִׁיחַ׃(דברים ל' יב'-יג') ז אוֹ מִי-יֵרֵד שְׁאֹלָה זֶה הוּא לְהַעֲלוֹת אֶת-הַמָּשִׁיחַ מִן-הַמֵּתִים׃ ח וּמָה הִיא אֹמֶרֶת כִּי קָרוֹב אֵלֶיךָ הַדָּבָר בְּפִיךָ וּבִלְבָבֶךָ (דברים ל' יד') וְזֶה הוּא דְבַר הָאֱמוּנָה אֲשֶׁר אֲנַחְנוּ מְבַשְּׂרִים׃ ט כִּי אִם-בְּפִיךָ תוֹדֶה כִּי יֵשׁוּעַ הוּא הָאָדוֹן וּבִלְבָבְךָ תַאֲמִין כִּי אֱלֹהִים הֲקִימוֹ מִן-הַמֵּתִים תִּוָּשֵׁעַ׃ י כִּי בִלְבָבוֹ יַאֲמִין בּוֹ הָאָדָם וְהָיָה-לוֹ לִצְדָקָה וּבְפִיהוּ יוֹדֶה-לּוֹ וְהָיָה-לוֹ לִישׁוּעָה׃ יא כִּי הַכָּתוּב אֹמֵר וְהַמַּאֲמִין בּוֹ לֹא יֵבוֹשׁ׃(ישעיהו כח' טז') יב וְאֵין מַבְדִּיל בֵּין-יְהוּדִי לַיְּוָנִי כִּי הֲלֹא הוּא אֲדוֹן-כֹּל וְרַב חֶסֶד לְכָל-קֹרְאָיו׃(תהילים קמה' יח') יג כִּי-כֹל אֲשֶׁר-יִקְרָא בְשֵׁם יְהוָֹה יִמָּלֵט׃(יואל ג' ה') יד אָכֵן אֵיךְ יִקְרְאוּ אֵלָיו אֲשֶׁר לֹא הֶאֱמִינוּ-בוֹ וְאֵיךְ יַאֲמִינוּ-בוֹ אֲשֶׁר לֹא שָׁמְעוּ עָלָיו וְאֵיךְ יִשְׁמְעוּ בְּאֵין מַגִּיד׃ טו וְאֵיךְ יַגִּידוּ אִם-אֵין שֹׁלֵחַ אֹתָם כַּכָּתוּב מַה-נָּאווּ רַגְלֵי מְבַשֵׂר שָׁלוֹם מְבַשֵׂר טוֹב׃(ישעיהו נב' ז') טז אַךְ לֹא-כֻלָּם שָׁמְעוּ אֶל-הַבְּשׂרָה כִּי יְשַׁעְיָהוּ אָמַר יְהוָֹה מִי הֶאֱמִין לִשְׁמֻעָתֵנוּ׃(ישעיהו נג' א') יז אֲשֶׁר לָזֹאת הָאֱמוּנָה בָאָה מִפִּי הַשְּׁמוּעָה וְהַשְּׁמוּעָה הִיא בִּדְבַר אֱלֹהִים׃ יח אַךְ אֲנִי אֹמֵר הֲכִי לֹא שָׁמָעוּ הֲלֹא בְּכָל-הָאָרֶץ יָצָא קוֹלָם וּבִקְצֵה תֵבֵל מִלֵּיהֶם׃(תהילים יט' ה') יט וְעוֹד אֲנִי אֹמֵר הֲכִי לֹא יָדַע יִשְׂרָאֵל וּמִקֶּדֶם אָמַר משֶׁה אֲנִי אַקְנִיאֲכֶם בְּלֹא-עָם בְּגוֹי נָבָל אַכְעִיסְכֶם׃(דברים לב' כא') כ וִישַׁעְיָה יָעֹז לֵאמֹר נִמְצֵאתִי לְלֹא בִקְשֻׁנִי נִגְלֵיתִי לְלוֹא שְׁאָלוּנִי׃(ישעיהו סה' א') כא וְעַל-יִשְׂרָאֵל הוּא אֹמֵר פֵּרַשְׂתִּי יָדַי כָּל-הַיּוֹם אֶל-עַם סוֹרֵר וּמֹרֶה׃(ישעיהו סה' ב')