ט א הִנֵּה אֱמֶת אֲנִי דֹבֵר בַּמָּשִׁיחַ וְלֹא אֲכַזֵּב וְחִקְרֵי לִבִּי יְעִידוּן לִי בְּרוּחַ הַקֹּדֶשׁ׃ ב כִּי צַר לִי מְאֹד וְכָל-הַיּוֹם לִבִּי עָלַי דַּוָּי׃ ג עַד אֲשֶׁר-בִּקְשָׁה נַפְשִׁי לֵאמֹר לוּ הַחֲרֵם יַחֲרִים הַמָּשִׁיחַ אֹתִי תַּחַת אַחַי שְׁאֵרִי וּבְשָׂרִי׃(שמות לב' לב') ד אֲשֶׁר הֵם בְּנֵי יִשְׂרָאֵל וְלָהֶם מִשְׁפַּט הַבָּנִים (שמות ד' כב') וְהַכָּבוֹד (שמות מ' לד') וְהַבְּרִיתוֹת (בראשית יז' ז'; שמות כד' ז'; דברים כח' סט'; ירמיהו לא' ל'-לא') מַתָּן הַתּוֹרָה (דברים ד' ח') עֲבֹדַת הַקֹּדֶשׁ (דברים יח' ה') וְדִבְרֵי הַהַבְטָחוֹת׃(שמות יט' ו') ה הָאָבוֹת לָהֶם הֵם וְהַמָּשִׁיחַ לְפִי-בְשָׂרוֹ מֵהֶם יָצָא אֲשֶׁר עַל-הַכֹּל הוּא הָאֱלֹהִים הַמְבֹרָךְ לְעוֹלָם וָעֶד אָמֵן׃(דברים י' טו') ו אֶפֶס לֹא-כֵן הַדָּבָר וּדְבַר-אֱלֹהִים לֹא נָפַל אָרְצָה (במדבר כג' יט') כִּי לֹא-כֻּלָּם אֲשֶׁר מִיִּשְׂרָאֵל יִשְׂרְאֵלִים הֵם׃ ז וְלֹא כָל-זֶרַע אַבְרָהָם בָּנִים הֵם כִּי אַךְ בְּיִצְחָק יִקָּרֵא לְךָ זָרַע׃(בראשית כא' יב') ח וְזֶה יוֹרֵנוּ כִּי לֹא בְנֵי-הַבָּשָׂר בְּנֵי אֱלֹהִים הֵם כִּי אִם-רַק בְּנֵי הַהַבְטָחָה יֵחָשְׁבוּ לְזָרַע׃ ט כִּי זֶה דְבַר הַהַבְטָחָה לַמּוֹעֵד אָשׁוּב וּלְשָׂרָה בֵן׃(בראשית יח' י'; יח' יד') י וּמִלְּבַד זֹאת גַּם-רִבְקָה בִּהְיוֹתָהּ הָרָה בֶן-יָחִיד לְיִצְחָק אָבִינוּ׃(בראשית כה' כא') יא בְּטֶרֶם נוֹלְדוּ יְלָדֶיהָ עַד לֹא-עָשׂוּ מְאוּמָה מִטּוֹב עַד-רָע לְמַעַן תָּקוּם עֲצַת אֱלֹהִים לְפִי-בְחִירָתוֹ לֹא עֵקֶּב מַעֲשִׂים כִּי אִם-כִּרְצוֹן הַבֹּחֵר׃ יב הֻגַּד לָהּ כִּי-רַב יַעֲבֹד צָעִיר׃(בראשית כה' כג') יג כַּכָּתוּב וָאֹהַב אֶת-יַעֲקֹב וְאֶת-עֵשָׂו שָׂנֵאתִי׃(מלאכי א' ב'-ג') יד וּמַה-נֹּאמַר עָתָּה הֲכִי יֵשׁ עַוְלָתָה בֵאלֹהִים חָלִילָה׃(איוב ח' ג') טו כִּי אֶל-משֶׁה אָמַר וְחַנֹּתִי אֶת-אֲשֶׁר אָחֹן וְרִחַמְתִּי אֶת-אֲשֶׁר אֲרַחֵם׃(שמות לג' יט') טז וּמִפְּנֵי זֶה אֵין הַדָּבָר בְּיַד הָרֹצֶה וְלֹא בְּיַד הָרָץ כִּי אִם-בְּיַד אֱלֹהֵי הַחֲנִינָה׃ יז כִּי-כֵן הַכָּתוּב אֹמֵר לְפַרְעֹה בַּעֲבוּר זֹאת הֶעֱמַדְתִּיךָ בַּעֲבוּר הַרְאֹתְךָ אֶת-כֹּחִי וּלְמַעַן סַפֵּר שְׁמִי בְּכָל-הָאָרֶץ׃(שמות ט' טז') יח וְזֶה יוֹרֶה לָּנוּ כִּי אֶת-אֲשֶׁר יִרְצֶה יְחֻנֶּנּוּ וְאֶת-אֲשֶׁר יִרְצֶה יַכְבִּיד אֶת-לִבּוֹ׃(שמות ז' ג') יט וְכִי תֹאמַר אֵלַי הֲלֹא רְצוֹנוֹ אֵין לְהַפְרִיעַ וְאִם-כֵּן לָמָּה-זֶּה יִפְקֹד עָוֹן׃ כ אֲבָל מִי אַתָּה הוּא בֶּן-אָדָם כִּי תָרִיב רִיב עִם-הָאֱלֹהִים הֲיֹאמַר יֵצֶר לְיֹצְרוֹ לָמָּה-זֶּה כֹּה יְצַרְתָּנִי׃(ישעיהו מה' ט') כא הַאֵין שִׁלְטוֹן לְיֹצֵר הַחֹמֶר לַעֲשׂוֹת מִגֹּלֶם הַהוּא כְּלִי אֶחָד לְכָבוֹד וּכְלִי אַחֵר לְקָלוֹן׃(ירמיהו יח' ג'-ו') כב וּמָה אֵפוֹא אִם-חָפֵץ הָאֱלֹהִים לְהַרְאוֹת אֶת-זַעְמוֹ וּלְהוֹדִיעַ אֶת-גְּבוּרָתוֹ וְיִשָּׂא בְּאֹרֶךְ רוּחוֹ אֶת-כְּלֵי הַזַּעַם אֲשֶׁר נָכוֹנוּ לַאֲבַדּוֹן׃(משלי טז' ד') כג וְאֶת-עשֶׁר תִּפְאַרְתּוֹ הוֹדִיעַ בִּכְלֵי הַחֲנִינָה אֲשֶׁר הֲכִינָם מֵאָז לְכָבוֹד׃ כד וּכְלֵי הַחֲנִינָה אֲנַחְנוּ אֵלֶּה אֲשֶׁר בָּחַר בָּנוּ לֹא מִן-הַיְּהוּדִים לְבַדָּם כִּי אִם-גַּם מִן-הַגּוֹיִם׃ כה כַּאֲשֶׁר גַּם-דִּבֶּר בְּהוֹשֵׁעַ אֶקְרָא לְלֹא-עַמִּי עַמִּי׃ כו וּלְלֹא-רֻחָמָה רֻחָמָה (הושע ב' כה') וְהָיָה בִּמְקוֹם אֲשֶׁר-יֵאָמֵר לָהֶם לֹא-עַמִּי אַתֶּם שָׁם יִקָּרְאוּ בְּנֵי אֵל-חָי׃(הושע ב' א'; ב' ג') כז וִישַׁעְיָה קֹרֵא עַל-יִשְׂרָאֵל לֵאמֹר כִּי אִם-יִהְיֶה מִסְפַּר בְּנֵי יִשְׂרָאֵל כְּחוֹל הַיָּם שְׁאָר יָשׁוּב בּוֹ׃ כח כִּלָּיוֹן חָרוּץ שׁוֹטֵף צְדָקָה כִּי כָלָה וְנֶחֱרָצָה אֲדֹנָי עֹשֶׂה בְּקֶרֶב הָאָרֶץ׃(ישעיהו י' כב'-כג') כט וְכַאֲשֶׁר אָמַר יְשַׁעְיָה לְפָנִים לוּלֵי יְהוָֹה צְבָאוֹת הוֹתִיר לָנוּ זָרַע כִּסְדֹם הָיִינוּ לַעֲמֹרָה דָּמִינוּ׃(ישעיהו א' ט') ל וְעַתָּה מַה-נֹּאמַר כִּי הַגּוֹיִם אֲשֶׁר לֹא רָדְפוּ אֶת-הַצְּדָקָה הִשִּׂיגוּ צְדָקָה הִיא הַצְּדָקָה אֲשֶׁר מִמְּקוֹר אֱמוּנָה׃ לא וּבְנֵי יִשְׂרָאֵל אֲשֶׁר רָדְפוּ אֶת-תּוֹרַת הַצְּדָקָה לֹא הִשִּׂיגוּ אֶת-תּוֹרַת הַצְּדָקָה׃ לב וְיַעַן-מָה יַעַן כִּי-לֹא בֶאֱמוּנָה רָדְפוּ כִּי מִמַּעֲשֵׂי הַתּוֹרָה בִּפְעֻלּוֹת וַיִּתְנַגְּפוּ בְּאֶבֶן נָגֶף׃ לג כַּכָּתוּב הִנְנִי יִסַּד בְּצִיּוֹן אֶבֶן נֶגֶף וְצוּר מִכְשׁוֹל וְהַמַּאֲמִין בּוֹ לֹא יֵבוֹשׁ׃(ישעיהו ח' יד'; כח' טז')