ו א עַל-כֵּן נֶרֶף כָּעֵת מֵאַבְנֵי פִנָּה בְּתוֹרַת הַמָשִׁיחַ וְנַעֲלֶה עַד-תַכְלִיתָהּ וְלֹא נָשׁוּב לִירוֹת אֶת-הַיְסוֹד לִתְשׁוּבָה מִן-מַעֲשִׂים אֲשֶׁר מָוֶת בָּם אוֹ אֱמוּנַת אֱלֹהִים׃ ב אוֹ דִין הַטְּבִילוֹת וּסְמִיכַת יָדָיִם וּתְקוּמַת הַמֵּתִים וּמִשְׁפַּט עוֹלָם׃ ג וַאֲנַחְנוּ נַעֲשֶׂה זֹּאת בִּרְצוֹת הָאֵל׃ ד כִּי אֵלֶּה אֲשֶׁר כְּבָר אֹרוּ עֵינֵיהֶם וַיִּטְעֲמוּ אֶת-מַתַּת שָׁמַיִם וְרוּחַ הַקֹּדֶשׁ הָיְתָה לִמְנָת חֶלְקָם׃ ה וַיִּטְעֲמוּ אֶת-דְּבַר אֱלֹהִים הַטּוֹב וְאֶת-נִפְלְאוֹת הָעוֹלָם הֶעָתִיד׃ ו וְאַחֲרֵי-כֵן סֹרֲרוּ לֹא יִתָּכֵן לָהֶם עוֹד לְהִתְחַדֵּשׁ וְלָשׁוּב כִּי הִצְלִיבוּ לָהֶם מֵחָדָשׁ אֶת-בֶּן-הָאֱלֹהִים וַיּשִׂימוּ אוֹתוֹ לְחֶרְפָּה׃ ז כִּי הָאָרֶץ הַשֹּׁתָה אֶת-הַגֶּשֶׁם אֲשֶׁר הִרְוָה אֹתָהּ כְּפַעַם בְּפַעַם וְתֵלֵד זֶרַע טוֹב לַזֹּרֵעַ תִּשָּׂא בְרָכָה מֵאֵת הָאֱלֹהִים׃(תהילים סה' יא-יב') ח וְכִי-תַצְמִיחַ קוֹץ וְדַרְדַּר אֵין חֵפֶץ בָּהּ צְפוּיָה הִיא אֱלֵי-מְאֵרָה וְאַחֲרִיתָהּ לְבָעֵר׃(בראשית ג' יז'-יח') ט אָמֵן הוֹחַלְנוּ יְדִידִים כִּי דְבָרִים טוֹבִים מֵאֵלֶּ נִמְצָאִים בָּכֶם דְּבָרִים צְפוּיִם אֱלֵי-יְשׁוּעָה אַף כִּי-כָזֹאת דִּבַּרְנוּ׃ י כִּי לֹא יְעַוֵּל הָאֱלֹהִים וְלֹא יִשְׁכַּח אֶת-מַעֲשֵׂיכֶם וְאֶת-הָאַהֲבָה אֲשֶׁר הֶרְאֵיתֶם לִשְׁמוֹ סֹמְכִים הֱיִיתֶם לִקְדשָׁיו וְעוֹדְכֶם כֵּן גַּם-הַיּוֹם׃(דברים לב' ד') יא וְחֶפְצֵנוּ כִּי אִישׁ אִישׁ מִכֶּם יִוָּדַע מִמְּגַמַּת עֲמָלוֹ כִּי תִקְוָתוֹ נֶאֱמָנָה עַד-הַקֵּץ׃ יב וְלֹא תִהְיוּ עֲצֵלִים כִּי אִם-תֵּלְכוּן בְּעִקְּבוֹת אֵלֶּה אֲשֶׁר בֶּאֱמוּנָתָם וְאֹרֶךְ רוּחָם יָרְשׁוּ אֶת-הַהַבְטָחוֹת׃ יג כִּי כַאֲשֶׁר הִבְטִיחַ אֱלֹהִים אֶת-אַבְרָהָם וְאֵין גָּדוֹל מִמֶּנּוּ לְהִשָּׁבַע בּוֹ נִשְׁבַּע בְּנַפְשׁוֹ׃ יד וַיֹּאמַר כִּי-בָרֵךְ אֲבָרֶכְךָ וְהַרְבָּה אַרְבֶּה אוֹתָךְ׃(בראשית כב' יז') טו וּבְכֵן הוֹחִיל בְּאֹרֶךְ רוּחוֹ וַיִּנְחַל אֶת-הַהַבְטָחָה׃(בראשית כא' ב') טז כִּי אָמְנָם אֲנָשִׁים נִשְׁבָּעִים בְּגָדוֹל מֵהֶם וְתֹקֶף הַשְּׁבוּעָה יָבִיא קֵץ לְכָל-רִיב בֵּינֵיהֶם׃ יז וְכֵן כַּאֲשֶׁר חָפֵץ הָאֱלֹהִים בְּכָל-תֹּקֶף לְהַרְאוֹת אֶת-יוֹרְשֵׁי הַהַבְטָחָה כִּי עֲצָתוֹ אֵין לְהָשִׁיב עָרַב לִפְנֵיהֶם בִּשְׁבוּעָתוֹ׃ יח וּבִשְׁתֵּי אֲמָרוֹת אֵלֶּה אֲשֶׁר אֵין חֲלִיפוֹת לָהֵן מִבִּלְתִּי יְכֹלֶת הָאֱלֹהִים לְכַזֵּב נִמְצָא לָנוּ נֹחַם-עֹז הַמְמַלְּטִים אֶת-נַפְשֵׁנוּ לְהַחֲזִיק בַּתִּקְוָה הָעֲרוּכָה לְפָנֵינוּ׃ יט אֲשֶׁר-הָיְתָה לָּנוּ עוֹגִין לְנֶפֶשׁ נֶאֱמָן וְחָזָק וּמַגִּיעַ אֶל-מִבֵּית לַפָּרֹכֶת׃(ויקרא טז' טו') כ אֲשֶׁר-שָׁם בָּא יֵשׁוּעַ הָרָץ לְפָנֵינוּ אֲשֶׁר-הָיָה לְכֹהֵן גָּדוֹל לְעוֹלָם עַל-דִּבְרָתִי מַלְכִּי-צֶדֶק׃(תהילים קי' ד')