ז א כִּי זֶה מַלְכִּי-צֶדֶק מֶלֶךְ שָׁלֵם כֹּהֵן לְאֵל עֶלְיוֹן אֲשֶׁר יָצָא לִקְרַאת אַבְרָהָם אַחֲרֵי שׁוּבוּ מֵהַכּוֹת אֶת-הַמְּלָכִים וַיְבָרְכֵהוּ׃(בראשית יד' יח'-כ') ב וַאֲשֶׁר חָלַק-לוֹ אַבְרָהָם מַעֲשֵׂר מִכֹּל וּפֵשֶׁר שְׁמוֹ בְּרֹאשׁ מֶלֶךְ צֶדֶק וְגַם-כֵּן מֶלֶךְ שָׁלֵם הוּא מֶלֶךְ הַשָּׁלוֹם׃(ירמיהו כג' ה'; ישעיהו ט' ה') ג בְּלֹא-אָב בְּלֹא-אֵם בְּלֹא יַחַשׂ וְאֵין לוֹ תְּחִלַּת הַיָּמִים וְאַף לֹא קֵץ הַחַיִּים וְדוֹמֶה לְבֶן-הָאֱלֹהִים הוּא עֹמֵד כֹּהֵן לְעוֹלָם׃ ד וּרְאוּ-נָא מַה-נִּכְבָּד הוּא אֲשֶׁר אַבְרָהָם רֹאשׁ הָאָבוֹת נָתַן-לוֹ מַעֲשֵׂר מֵרֵאשִׁית הַשָּׁלָל׃ ה וְאָמֵן יוֹרְשֵׁי הַכְּהֻנָּה מִבְּנֵי לֵוִי לָהֶם הַמִּשְׁפָּט לָקַחַת מַעֲשֵׂר עַל-פִּי הַתּוֹרָה מֵאֵת הָעָם (במדבר יח' כא'-לא') מֵאֵת אֲחֵיהֶם אַף כִּי-יֹצְאֵי יֶרֶךְ אַבְרָהָם הֵם׃ ו וְזֶה אֲשֶׁר לֹא הִתְיַחֵשׂ לְמִשְׁפְּחֹתָם לָקַח מַעֲשֵׂר מֵאַבְרָהָם וְגַם-בֵּרַךְ אֹתוֹ אֲשֶׁר הַהַבְטָחָה נְתוּנָה לוֹ מֵאָז׃(***) ז וְדָבָר יָדוּעַ הוּא מֵאֵין פֹּצֶה פֶה כִּי הַקָּטֹן יְבֹרַךְ מִן-הַגָּדוֹל׃ ח וּפֹה לֹקְחִים מַעֲשֵׂר אֲנָשִׁים בְּנֵי תְמוּתָה וְשָׁם זֶה הוּא אֲשֶׁר עֵדוּת לוֹ כִּי הוּא חָי׃ ט וְאִם תִּשְׂאוּ נִיב שְׂפָתָי גַּם-לֵוִי הַלֹּקֵחַ מַעֲשֵׂר נָתַן מַעֲשֵׂר בְּתוֹךְ אַבְרָהָם׃ י כִּי בְּיֶרֶךְ אָבִיו הָיָה בְּצֵאת מַלְכִּי-צֶדֶק לִקְרָאתוֹ׃ יא וְאִם תַּכְלִית כָּל-חֵפֶץ נִמְצְאָה בִּכְהֻנַּת בְּנֵי לֵוִי אֲשֶׁר בְּיָמֶיהָ נִתְּנָה הַתּוֹרָה לָעָם (דברים יז' יא'-יב') מַה-לְּכֹהֵן אַחֵר כִּי יָקוּם עַל-דִּבְרָתִי מַלְכִּי-צֶדֶק (תהילים קי' ד') וְלֹא יִקָּרֵא עַל-דִּבְרָתִי אַהֲרֹן׃ יב כִּי בְהִשְׁתַּנּוֹת הַכְּהֻנָּה גַּם-חֲלִיפַת הַתּוֹרָה בֹּא תָבוֹא אֶל-נָכוֹן׃ יג וְהִנֵּה-זֶה אֲשֶׁר-יְדֻבַּר בּוֹ כָזֹאת בֶּן-שֵׁבֶט אַחֵר הוּא אֲשֶׁר אֵין אִישׁ מִמֶּנּוּ קָרֵב אֶל-הַמִּזְבֵּחַ׃ יד כִּי מוּדַעַת זֹאת כִּי מִיהוּדָה צָמַח אֲדֹנֵינוּ וְעַל-שֵׁבֶט זֶה לֹא-דִבֶּר משֶׁה מְאוּמָה עַל-אֹדוֹת הַכְּהֻנָּה׃ טו וְגַם-זֹאת מוּדַעַת בְּיֶתֶר מִדָּה כִּי יָקוּם כֹּהֵן אַחֵר בִּדְמוּת מַלְכִּי-צֶדֶק׃ טז אֲשֶׁר אֵינֶנּוּ לְפִי מִצְוַת הַתּוֹרָה לְחַיֵּי בְשָׂרִים כִּי אִם-לְפִי הַגְּבוּרָה לְחַיֵּי אֵין-סוֹף׃ יז כִּי-הֵעִיד לֵאמֹר אַתָּה כֹהֵן לְעוֹלָם עַל-דִּבְרַתִי מַלְכִּי-צֶדֶק׃(***) יח כִּי אָמְנָם יֵשׁ תְּנוּאָה לַדָּת הַנְּתוּנָה מִקֶּדֶם אֲשֶׁר הָיְתָה מִבְּלִי-כֹחַ וְלִבְלִי הוֹעִיל׃ יט כִּי הַתּוֹרָה לֹא בִצְּעָה דָּבָר לְתַכְלִיתוֹ כִּי אִם-אֵת אֲשֶׁר עַל-יָדָהּ בָּאָה תִקְוָה טוֹבָה מִמֶּנָּה אֲשֶׁר בָּהּ נִקְרַב אֶל-הָאֱלֹהִים׃ כ וּבַאֲשֶׁר יֵשׁוּעַ לֹא הָיָה לְכֹהֵן מִבְּלִי שְׁבוּעָה׃ כא כִּי הֵמָּה הָיוּ לְכֹהֲנִים מִבְּלִי שְׁבוּעָה וְזֶה בִּשְׁבוּעָה עַל-פִּי הָאֹמֵר אֵלָיו נִשְׁבַּע יְהוָֹה וְלֹא יִנָּחֵם אַתָּה-כֹהֵן לְעוֹלָם עַל-דִּבְרָתִי מַלְכִּי-צֶדֶק׃(***) כב אֲשֶׁר לָזֹאת יֵשׁוּעַ הוּא הָעֵרָבוֹן לַבְּרִית הַטּוֹבָה מִן-הָרִאשֹׁנָה׃ כג וְרַבִּים הָיוּ כֹהֲנֶיהָ הָהֵם כִּי לֹא יָכְלוּ לָשֶׁבֶת לָעַד מִפְּנֵי הַמָּוֶת׃ כד וְזֶה יַעַן כִּי יֵשֵׁב לְעוֹלָם גַּם-כְּהֻנָּתוֹ לֹא תַעֲבֹר מִמֶּנּוּ׃ כה וּבַעֲבוּר זֹאת רַב הוּא לְהוֹשִׁיעַ תְּשׁוּעַת נֶצַח לְכָל-הַבָּאִים עַל-יָדוֹ לֵאלֹהִים כִּי הוּא חַי לָנֶצַח לְהַפְגִּיעַ בַּעֲדָם׃ כו כִּי טוֹב לָנוּ כֹהֵן גָּדוֹל קָדוֹשׁ כָּמוֹהוּ נְקִי כַפַּיִם וּבַר לְבָב נִבְדָּל מֵחַטָּאִים וְנִשָּׂא מֵעַל הַשָּׁמָיִם׃ כז אֲשֶׁר אֵין-לוֹ חֹק יוֹם יוֹם כַּכֹּהֲנִים הַגְּדוֹלִים לְהַקְרִיב קָרְבָּן בַּתְּחִלָּה עַל-חַטַּאת נַפְשׁוֹ וְאַחֲרֵי-כֵן בְּעַד הָעָם (ויקרא ט' ז'; ט' טו') כִּי הִשְׁלִים אֶת-זֹאת בְּפַעַם אַחַת בְּהַקְרִיב אֶת-נַפְשׁוֹ׃ כח כִּי הַתּוֹרָה הֵקִימָה אֲנָשִׁים לְכֹהֲנִים גְּדוֹלִים אֲשֶׁר רִפְיוֹנָם בָּם אַךְ דְּבַר-הַשְּׁבוּעָה אַחֲרֵי הַתּוֹרָה הֵקִים אֶת-הַבֵּן אֲשֶׁר נַעֲלֶה הוּא בִּשְׁלֵמוּת נֶצַח׃