מעשי השליחים יג

יג א וַיִּהְיוּ בַּקָּהָל אֲשֶׁר בְּאַנְטְיוֹכְיָא נְבִיאִים וּמְלַמְּדִים וְאֵלֶּה שְׁמוֹתָם בַּר-נַבָּא וְשִׁמְעוֹן הַנִּקְרָא גַם-נִיגַר וְלוּקְיוֹס הַקּוּרִינִי וּמְנַחֵם אֲשֶׁר הָיָה אָמוֹן עִם-הוֹרְדוֹס טֶטְרַרְךְ וְשָׁאוּל׃ ב וּבַעֲבוֹדָתָם אֶת-יְהוָֹה וּבְצוֹמָם הָיָה דְבַר רוּחַ הַקֹּדֶשׁ הַבְדִּילוּ-נָא לִי אֶת-בַּר-נַבָּא וְאֶת-שָׁאוּל לַעֲשׂוֹת בַּמְּלָאכָה אֲשֶׁר קְרָאתִים לָהּ׃ ג וַיָּצוּמוּ וַיִּתְפַּלְּלוּ וַיִּסְמְכוּ אֶת-יְדֵיהֶם עֲלֵיהֶם וַיְשַׁלְּחוּם׃ ד וַיֵּלְכוּ שְׁלִיחֵי רוּחַ הַקֹּדֶשׁ הָאֵלֶּה אֶל-סְלוּקְיָא וְשָׁם יָרְדוּ בָאֳנִיָּה לָבֹא אֶל-קַפְרוֹס׃ ה בְּבוֹאָם עִירָה סְלָמִים הִגִּידוּ אֶת-דְּבַר הָאֱלֹהִים בְּבָתֵּי-הַכְּנֵסֶת אֲשֶׁר לַיְּהוּדִים וְגַם-יוֹחָנָן הָיָה עִמָּם לְשָׁרְתָם׃ ו וַיְהִי כַּאֲשֶׁר תַּמּוּ לִסְבֹּב בְּכָל-הָאִי עַד-פָּפוֹס וַיִּמְצְאוּ שָׁם אִישׁ מְכַשֵּׁף וּנְבִיא-שָׁקֶר וְהוּא אִישׁ יְהוּדִי וּשְׁמוֹ בַּר-יֵשׁוּעַ׃ ז הוּא הָיָה עִם-סֶרְגִּיּוֹס פּוֹלוֹס נְצִיב הָאִי וְזֶה אִישׁ חֲכַם-לֵב קָרָא אֶת-בַּר-נַבָּא וְאֶת-שָׁאוּל לָבוֹא אֵלָיו לִשְׁמֹעַ מִפִּיהֶם דְּבַר הָאֱלֹהִים׃ ח וְאַלִּימָא הַמְכַשֵּׁף כִּי-כֵן מְתֻרְגָּם שְׁמוֹ הָיָה לָהֶם לְשָׂטָן כִּי יָזַם לְהָסֵב אֶת-הַנְּצִיב מֵהַאֲמִין׃ ט רַק שָׁאוּל אֲשֶׁר נִקְרָא גַם-פּוֹלוֹס מָלֵא רוּחַ הַקֹּדֶשׁ הִשְׁגִּיחַ אֵלָיו׃ י וַיִּקְרָא הוֹי בֶּן-בְּלִיַּעַל מָלֵא כָל-עָרְמָה וּמִרְמָה וְשׂוֹנֵא כָל-צֶדֶק הֲכִי לֹא תֶחְדַּל עוֹד מֵעַקֵּשׁ אֶת-דַּרְכֵי יְהוָֹה הַיְשָׁרִים׃(הושע יד' י') יא וְעַתָּה הִנֵּה יַד-יְהוָֹה תִּגַּע בְּךָ וְהָיִיתָ עִוֵּר עַד לִמְלֹא-יָמִים וְאוֹר הַשֶּׁמֶשׁ לֹא תִרְאֶה וּבִן רֶגַע כְּדַבְּרוֹ הָיְתָה עָלָיו אֲפֵלָה וַחֲשֵׁכָה וַיֵּתַע וַיְגַשֵּׁשׁ אָנֶה וָאָנֶה לִמְצֹא אִישׁ לַנְחֹתוֹ בְיָדוֹ׃(מלכים ב', ו' יח') יב כִּרְאוֹת הַנְּצִיב אֶת-אֲשֶׁר נַעֲשָׂה הֶאֱמִין וַיִּשְׁתָּאֶה לְתוֹרַת הָאָדוֹן׃ יג וַיָּשָׁב פּוֹלוֹס וְהַנִּלְוִים עָלָיו מִפָּפוֹס בָּאֳנִיָּה וַיַּעֲלוּ אֶל-פַּרְגִי אֲשֶׁר בְּפַמְפּוּלְיָא וְשָׁם נִפְרַד יוֹחָנָן מֵעֲלֵיהֶם לָשׁוּב יְרוּשָׁלָיִם׃ יד וְהֵם נָסְעוּ מִפַּרְגִי וַיֵּלְכוּ אֶל-אַנְטְיוֹכְיָא אֲשֶׁר בְּפִיסִדְיָא וַיָּבֹאוּ בְיוֹם הַשַּׁבָּת אֶל-בֵּית-הַכְּנֵסֶת וַיֵּשֵׁבוּ׃ טו וַיְהִי אַחֲרֵי הִקָּרֵא בַתּוֹרָה וּבַנָּבִיא וַיִּשְׁלְחוּ רָאשֵׁי בֵית-הַכְּנֵסֶת לֵאמֹר לָהֶם אֲנָשִׁים אַחִים אִם-יֵשׁ לָכֶם דָּבָר לְהוֹכַח אֶת-הָעָם דַּבֵּרוּ׃ טז וַיַּעֲמֹד פּוֹלוֹס וַיְנֹפֵף יָדוֹ וַיֹּאמַר אַנְשֵׁי יִשְׂרָאֵל וְגַם-הַיְרֵאִים אֶת-הָאֱלֹהִים שְׁמָעוּנִי׃ יז אֱלֹהֵי יִשְׂרָאֵל אֱלֹהֵי הָעָם הַזֶּה הוּא בָחַר בַּאֲבוֹתֵינוּ (דברי הימים א', טז' יג') וַיָּרֶם קֶרֶן לָעָם בִּהְיוֹתָם גֵּרִים בְּאֶרֶץ מִצְרַיִם וְהוּא הוֹצִיאָם מִשָּׁם בִּזְרֹעַ נְטוּיָה׃ יח וַיִּשָּׂא אֹתָם וַיְכַלְכְּלֵם אַרְבָּעִים שָׁנָה בַּמִדְבָּר׃(שמות יב' נא'; דברים א' לא') יט וַיַּשְׁמֵד מִפְּנֵיהֶם שִׁבְעָה גוֹיִם בְּאֶרֶץ כְּנָעַן וַיַּפֵּל לָהֶם בַּחֶבֶל אֶת-אַדְמָתָם לִירֻשַׁת נַחֲלָה׃(דברים יב' י') כ אַחֲרֵי-כֵן נָתַן לָהֶם שֹׁפְטִים לְשָׁפְטָם כְּאַרְבַּע מֵאוֹת וַחֲמִשִּׁים שָׁנָה עַד-שְׁמוּאֵל הַנָּבִיא׃ כא בְּיָמָיו שָׁאֲלוּ לִמְלֹךְ עֲלֵיהֶם מֶלֶךְ וְהָאֱלֹהִים נָתַן לָהֶם אֶת-שָׁאוּל בֶּן-קִישׁ אִישׁ יְמִינִי לְמֶלֶךְ עֲלֵיהֶם אַרְבָּעִים שָׁנָה׃(שמואל א', ח' ה') כב וְאַחֲרֵי הֲסִירוֹ אֹתוֹ מִמְּלֹךְ הֵקִים אֶת-דָּוִד לְמֶלֶךְ עֲלֵיהֶם אֲשֶׁר אָמַר עָלָיו וַיְעִידֶנּוּ מָצָאתִי אֶת-דָּוִד בֶּן-יִשַׁי (תהילים פט' כא'; שמואל א', יג' יד') אִישׁ כִּלְבָבִי אֲשֶׁר כָּל-חֶפְצִי יַשְׁלִים׃(ישעיהו מד' כח'; שמואל א', טו' כג') כג מִזַּרְעוֹ הֵבִיא הָאֱלֹהִים כִּדְבָרוֹ אֶת-יֵשׁוּעַ לְיִשְׂרָאֵל לְמוֹשִׁיעַ׃ כד וַיְהִי אַחֲרֵי קְרֹא יוֹחָנָן אֶל-כָּל-עַם יִשְׂרָאֵל לִתְשׁוּבָה וּלְהִטָּבֵל לִפְנֵי בֹאוֹ׃ כה וּכְכַלּוֹת יוֹחָנָן אֶת-מְרוּצָתוֹ אָמַר וּמַה-תְּחַשְׁבוּן עָלַי מִי-אָנִי לֹא אֲנִי הוּא כִּי הִנֵּה אַחֵר בָּא אַחֲרַי וְהוּא אֲשֶׁר קַלֹּתִי מֵהַתֶּר-לוֹ שְׂרוֹךְ נְעָלָיו אֲשֶׁר בְּרַגְלָיו׃ כו אַתֶּם אֲנָשִׁים אַחִים זֶרַע אַבְרָהָם וְכָל-יִרְאֵי אֱלֹהִים הַנִּמְצְאִים בְּתוֹכֲכֶם אֵלֵינוּ דְּבַר הַיְשׁוּעָה הַזֹּאת שָׁלוּחַ׃ כז כִּי-הַיּשְׁבִים בִּירוּשָׁלַיִם וְרָאשֵׁיהֶם יַעַן אֲשֶׁר לֹא יָדְעוּ אֹתוֹ וְאֶת-דִּבְרֵי הַנְּבִיאִים הַנִּקְרָאִים מִדֵּי שַׁבָּת בְּשַׁבַּתּוֹ מִלְאוּ אֹתָם בְּמִשְׁפָּטָם אֲשֶׁר שְׁפָטֻהוּ׃ כח וְאַף כִּי-לֹא מָצְאוּ-בוֹ חֵטְא מִשְׁפַּט-מָוֶת בִּקְשׁוּ מֵאֵת פִּילָטוֹס לַהֲמִיתוֹ׃ כט כְּבַצְּעָם אֶת-הַכֹּל אֲשֶׁר כָּתוּב עָלָיו הוֹרִדֻהוּ מֵעַל הָעֵץ וַיַּשְׁכִּיבֻהוּ בַּקָּבֶר׃ ל וְהָאֱלֹהִים הֲקִימוֹ מֵעִם-הַמֵּתִים׃ לא וְהוּא יָמִים רַבִּים נִגְלֹה נִגְלָה אֶל-אֲשֶׁר עָלוּ עִמּוֹ מֵהַגָּלִיל לִירוּשָׁלָיִם וַאֲשֶׁר עַתָּה כַּיּוֹם הֵם עֵדִים לוֹ נֶגֶד הָעָם׃ לב וְכֹה אֲנַחְנוּ מוֹדִיעִים לָכֶם כִּי שְׁבוּעָתוֹ לַאֲבֹתֵינוּ׃ לג הֵקִים אֱלֹהִים עַתָּה לְבָנֵינוּ אֶת-דְּבָרוֹ בַּהֲקִימוֹ אֶת-יֵשׁוּעַ כַּאֲשֶׁר גַּם כָּתוּב בַּמִּזְמוֹר הַשֵּׁנִי בְּנִי אַתָּה אֲנִי הַיּוֹם יְלִדְתִּיךָ׃(תהילים ב' ז') לד וּבַדָּבָר אֲשֶׁר הֵקִים אֹתוֹ מִבֵּין הַמֵּתִים אֲשֶׁר לֹא יָשׁוּב עוֹד לְשַׁחַת-בְּלִי כֹּה אָמָר אֶתֵּן לָכֶם חַסְדֵּי דָוִד הַנֶּאֱמָנִים׃(ישעיהו נה' ג') לה עַל-כֵּן הוּא אֹמֵר עוֹד בְּמִזְמֹר אַחֵר לֹא-תִּתֵּן חֲסִידְךָ לִרְאוֹת שָׁחַת׃(תהילים טז' י') לו כִּי דָוִד אַחֲרֵי לֶכְתּוֹ בְדֹרֹתָיו בַּעֲצַת אֱלֹהִים הוּא גָוַע וַיֵּאָסֶף אֶל-אֲבוֹתָיו וַיַּרְא שָׁחַת׃ לז אַךְ-זֶה אֲשֶׁר הָאֱלֹהִים הֲקִימוֹ הוּא לֹא-רָאָה שָׁחַת׃(***) לח לָכֵן אֲנָשִׁים אַחִים יִוָּדַע לָכֶם כִּי עַל-יְדֵי-זֶה הֻגַּד לָכֶם סְלִיחַת הַחֲטָאִים׃ לט כִּי-בַכֹּל אֲשֶׁר לֹא-נִצְדַּקְתֶּם בְּתוֹרַת משֶׁה כָּל-הַמַּאֲמִין יִצְדַּק-בּוֹ׃(בראשית טו' ו') מ לָכֵן הִשָּׁמְרוּ לָכֶם פֶּן-יָבוֹא עֲלֵיכֶם אֲשֶׁר כָּתוּב בַּנְּבִיאִים׃ מא רְאוּ אַתֶּם בֹּזִים וְהִתַּמְּהוּ וָשֹׁמּוּ כִּי-פֹעַל פֹּעֵל אֲנִי בִּימֵיכֶם פֹּעַל אֲשֶׁר לֹא תַאֲמִינוּ כִּי-יְסֻפַּר לָכֶם׃(חבקוק א' ה') מב וַיְהִי בְּצֵאתָם וַיְבַקְשׁוּם לְדַבֵּר אֲלֵיהֶם כַּדְּבָרִים הָאֵלֶּה עוֹד שֵׁנִית גַּם-בְּיוֹם הַשַּׁבָּת הָאַחֵר׃ מג בְּהִפָּרֵד הַקָּהָל נָטוּ יְהוּדִים רַבִּים וְגֵרִים הַיְרֵאִים אֶת-יְהוָֹה וַיֵּלְכוּ אַחֲרֵי פוֹלוֹס וּבַר-נַבָּא וְהֵם אָמְרוּ לָהֶם וַיַּזְהִירוּם לִהְיוֹת דְּבֵקִים בְּחֶסֶד הָאֱלֹהִים׃ מד וַיְהִי בְּיוֹם הַשַּׁבָּת הָאַחֵר וַתִּקָּהֵל כִּמְעַט כָּל-הָעִיר לִשְׁמֹעַ אֶת-דְּבַר יְהוָֹה׃ מה אוּלָם כִּרְאוֹת הַיְּהוּדִים אֶת-הֲמוֹן הָעָם נֶהְפַּךְ לִבָּם לְקִנְאָה וַיִּהְיוּ מַלְעִיבִים בְּפוֹלוֹס וְכָל-דְּבָרָיו עִצֵּבוּ׃ מו וַיַּעֲנוּ אֹתָם פּוֹלוֹס וּבַר-נַבָּא בְּאֹמֶץ לֵב וַיֹּאמְרוּ הָיֹה תִהְיוּ אַתֶּם הָרִאשׁוֹנִים לְהַשְׁמִיעֲכֶם אֶת-דְּבַר הָאֱלֹהִים וְאַתֶּם הִנְּכֶם בּוֹזִים לוֹ הֲלֹא מֶרְיְכֶם עָנָה בָכֶם כִּי לֹא נֶחְשָׁבִים אַתֶּם לְהִכָּתֵב לְחַיֵּי עוֹלָם לָכֵן סַבֹּנוּ מִכֶּם וַנִּשַׁע אֶל-הַגּוֹיִם׃ מז כִּי כֹה צִוָּה עָלֵינוּ הָאָדוֹן לֵאמֹר וּנְתַתִּיךָ לְאוֹר גּוֹיִם לִהְיוֹת לִישׁוּעָה עַד-קְצֵה הָאָרֶץ׃(ישעיהו מט' ו') מח וַיִּשְׁמְעוּ הַגּוֹיִם וַיִּשְׂמְחוּ וַיְהַלְלוּ אֶת-דְּבַר יְהוָֹה וַיַּאֲמִינוּ כֻלָּם אֲשֶׁר נִפְקְדוּ לְחַיֵּי עוֹלָם׃ מט וַיְהִי דְבַר יְהוָֹה נִפְרָץ בְּכָל-הַמָּקוֹם מִסָּבִיב׃ נ רַק הַיְּהוּדִים הִצּוּ וַיָּסִיתוּ אֶת-הַנָּשִׁים הַיְקָרוֹת וְיִרְאוֹת יְהוָֹה וְאֶת-רָאשֵׁי הָעִיר לִקְצָף-קֶצֶף עַל-פּוֹלוֹס וְעַל-בַּר-נַבָּא וַיְגָרְשׁוּם מִגֵּו גְּבוּלָם׃ נא וְהֵם נִעֲרוּ אֶת-אֲבַק רַגְלֵיהֶם עֲלֵיהֶם וַיֵּלְכוּ לְאִיקָנְיוֹן׃ נב וְהַתַּלְמִידִים נִמְלְאוּ שִׂמְחָה וְרוּחַ הַקֹּדֶשׁ׃