יב א בָּעֵת הַהִיא שָׁלַח הוֹרְדוֹס הַמֶּלֶךְ אֶת-יָדוֹ בְּאַנְשֵׁי הָעֵדָה לְעַנּוֹתָם׃ ב וַיַּהֲרֹג אֶת-יַעֲקֹב אֲחִי יוֹחָנָן בֶּחָרֶב׃ ג וַיַּרְא כִּי-טוֹב הַדָּבָר בְּעֵינֵי הַיְּהוּדִים וַיּוֹסֶף וַיִּתְפֹּשׂ גַּם-אֶת-פֶּטְרוֹס וְהַיָּמִים יְמֵי חַג-הַמַּצּוֹת׃ ד וַיַּחֲזֶק-בּוֹ וַיִּתְּנֵהוּ בְּבֵית הַכֶּלֶא וַיִּשְׁמְרֻהוּ אַרְבַּע מַחְלְקוֹת אַנְשֵׁי הַצָּבָא אַרְבָּעָה אַרְבָּעָה כָּל-מַחְלְקָה כִּי אָמַר לְהַעֲמִידוֹ לִפְנֵי הָעָם אַחֲרֵי הַפָּסַח׃(שמות יב' טו') ה וַיְהִי פֶּטְרוֹס עָצוּר בְּבֵית כִּלְאוֹ אַךְ הָעֵדָה הֶעְתִּירָה בַעֲדוֹ אֶל-אֱלֹהִים בְּחָזְקָה׃ ו וְאַחֲרֵי אֲשֶׁר חָפֵץ הוֹרְדוֹס לַהֲבִיאוֹ לַמִּשְׁפָּט בַּלַּיְלָה הַהוּא שָׁכַב פֶּטְרוֹס עַל-מִשְׁכָּבוֹ בֵּין שְׁנֵי אֲנָשִׁים חֲמֻשִּׁים אָסוּר בִּשְׁנַיִם כְּבָלִים וְשֹׁמְרֵי בֵית הַכֶּלֶא נִצָּבִים עַל-הַסָּף׃ ז וְהִנֵּה מַלְאַךְ יְהוָֹה נִצָּב עָלָיו וְאוֹר נָגַהּ בְּלִשְׁכָּתוֹ וַיִּגַּע בְּכַף יֶרֶךְ פֶּטְרוֹס וַיְעִירֵהוּ לֵאמֹר קוּם מַהֵר וַיִּמַּסּוּ אֲסוּרָיו מֵעַל יָדָיו׃ ח וַיֹּאמֶר אֵלָיו הַמַּלְאָךְ חֲגֹר מָתְנֶיךָ וּנְעָלֶיךָ שִׂים בְּרַגְלֶיךָ וַיַּעַשׂ כֵּן וַיֹּאמֶר אֵלָיו וְאֶת-מְעִילְךָ עֲטֵה וְלֵךְ אַחֲרָי׃ ט וַיֵּצֵא וַיֵּלֶךְ אַחֲרָיו וְנַפְשׁוֹ לֹא יָדְעָה אִם-אֱמֶת הוּא אֲשֶׁר נַעֲשָׂה לּוֹ בְּיַד הַמַּלְאָךְ כִּי כְּחִזָּיוֹן נִרְאָה בְעֵינָיו׃ י וַיַּעַבְרוּ אֶת-טוּר הַשֹּׁמְרִים הָרִאשׁוֹנִים וְאֶת-טוּר הַשְּׁנִיִּים וַיָּבֹאוּ אֶל-שַׁעַר הַבַּרְזֶל הַיֹּצֵא הָעִירָה אֲשֶׁר נִפְתַּח לִפְנֵיהֶם מֵאֵלָיו וַיֵּצְאוּ בוֹ וַיַּעַבְרוּ רְחוֹב אֶחָד וַיַּעַל הַמַּלְאָךְ מֵעָלָיו פִּתְאֹם׃ יא וַיֹּאמֶר פֶּטְרוֹס כְּשׁוּב דַּעְתּוֹ אֵלָיו עַתָּה יָדַעְתִּי אֶל-נָכוֹן כִּי שָׁלַח יְהוָֹה אֶת-מַלְאָכוֹ וַיַּצִּילֵנִי מִכַּף הוֹרְדוֹס וּמִכָּל-צְדִיַּת עַם-הַיְּהוּדִים׃(תהילים לד' ח'; דניאל ג' כח') יב עוֹדֶנּוּ מְדַבֵּר אֶל-לִבּוֹ וַיָּבֹא אֶל-בֵּית מִרְיָם אֵם יוֹחָנָן הַמְכֻנֶּה מַרְקוֹס וְשָׁם רַבִּים נִקְהָלִים וּמִתְפַּלְּלִים׃ יג וַיִּדְפֹּק עַל-דֶּלֶת הַשָּׁעַר וַתָּבֹא נַעֲרָה אַחַת לְקוֹל הַדֹּפֵק וּשְׁמָהּ רוֹדִי׃ יד וַתַּכֵּר אֶת-קוֹל פֶּטְרוֹס ומִשִּׂמְחָתָהּ לֹא-פָתְחָה לּוֹ אֶת-הַדָּלֶת כִּי אִם-רָצָה הַבַּיְתָה וַתַּגֵּד לָהֶם כִּי-פֶטְרוֹס עֹמֵד עַל-הַפָּתַח׃ טו וַיֹּאמְרוּ אֵלֶיהָ מִשְׁתַּגֵּעָה אָתְּ וְהִיא אָמְרָה לֹא כִּי-כֵן הַדָּבָר אָז אָמְרוּ כִּי-מַלְאָכוֹ הוּא׃ טז וּפֶטְרוֹס הוֹסִיף לִדְפֹּק וַיִּפְתְּחוּ וַיִּרְאוּ אֹתוֹ וַיְהִי לְפֶלֶא בְּעֵינֵיהֶם׃ יז וַיָּנֶף יָדוֹ לָהֶם לַחְשׁוֹת וַיְסַפֵּר לָהֶם אֵת אֲשֶׁר-הוֹצִיאוֹ הָאָדוֹן מִבֵּית הַכֶּלֶא וַיֹּאמֶר הַגִּידוּ זֹאת לְיַעֲקֹב וְלָאַחִים וַיֵּצֵא וַיֵּלֶךְ-לוֹ לְמָקוֹם אַחֵר׃ יח הַבֹּקֶר אוֹר וּמְהוּמָה רַבָּה הָיְתָה בֵּין אַנְשֵׁי הַצָּבָא לֵאמֹר מֶה-הָיָה לְפֶטְרוֹס׃ יט וְהוֹרְדוֹס דָּרַשׁ אֹתוֹ וְלֹא מְצָאוֹ וַיַּחֲקֹר אֶת-הַשֹּׁמְרִים וַיִּתֵּן דָּתוֹ לַהֲמִיתָם וַיֵּרֶד מִיהוּדָה אֶל-קִסְרִין וַיֵּשֶׁב שָׁם׃ כ אָז חָרָה אַפּוֹ בַּצֹּרִים וּבַצִּדֹנִים וְהֵם בָּאוּ אֵלָיו בְּלֵב אֶחָד וַיְדַבְּרוּ עַל-לֵב בְּלַסְטוֹס אֲשֶׁר עַל-חֲדַר הַמֶּלֶךְ לְהַפְגִּיעַ בַּעֲדָם וְלַעֲשׂוֹת שָׁלוֹם לָהֶם כִּי מֵאֶרֶץ הַמֶּלֶךְ הוֹצִיאוּ לָהֶם אֶת-שֶׁבֶר רַעֲבוֹן אַרְצוֹתָם׃ כא וַיְהִי הַיּוֹם יוֹם מוֹעֵד וַיִּלְבַּשׁ הוֹרְדוֹס בִּגְדֵי מַלְכוּת וַיֵּשֶׁב עַל-כִּסֵּא הַמִּשְׁפָּט וַיִּשָּׂא אֲלֵיהֶם מִדַּבְּרֹתָיו׃ כב וַיָּרִיעוּ הָאָם לֵאמֹר קוֹל אֱלֹהִים הוּא וְלֹא קוֹל אָדָם׃(יחזקאל כח' ב') כג וַיַּכֵּהוּ מַלְאַךְ-יְהוָֹה כְּרֶגַע כִּי לֹא-נָתַן כָּבוֹד לֵאלֹהִים וַיֹּאכְלֻהוּ תוֹלָעִים וַיָּמֹת׃(דניאל ה' כג') כד וּדְבַר אֱלֹהִים עָלָה עָלֹה וָרָב׃ כה וַיָּשׁוּבוּ בַּר-נַבָּא וְשָׁאוּל מִירוּשָׁלָיִם אַחֲרֵי אֲשֶׁר מִלְאוּ אֶת-פְּקֻדָּתָם הַנְּתוּנָה לָהֶם וַיִּקְחוּ אִתָּם אֶת-יוֹחָנָן הַמְכֻנֶּה מַרְקוֹס׃