יד א וַיְהִי בְּאִיקָנְיוֹן וַיָּבֹאוּ שְׁנֵיהֶם אֶל-בֵּית-הַכְּנֵסֶת אֲשֶׁר לַיְּהוּדִים וַיַּפְלִיאוּ לְלַמֵּד עַד כִּי-הָמוֹן רַב מִן-הַיְּהוּדִים וּמִן-הַיְּוָנִים נֶאֶמְנוּ וְהֶאֱמִינוּ׃ ב רַק הַיְּהוּדִים אֲשֶׁר לֹא הָיוּ מַאֲמִינִים מָסְכוּ רֹגֶז וְכַעַס בְּלֵב הַגּוֹיִם עַל-הָאַחִים׃ ג וְהֵם הֶאֱרִיכוּ בַּמָּקוֹם הַזֶּה וַיְדַבְּרוּ בְּאֹמֶץ לֵב בְּשֵׁם יְהוָֹה הַמֵּעִיד עַל-דְּבַר חַסְדּוֹ וַיִּתֵּן אֹתוֹת וּמוֹפְתִים בְּיָדָם לַעֲשׁתָם׃ ד וַהֲמוֹן הָעִיר חָלַק לִבָּם וַיֵּחָצוּ וַיְהִי הַחֵצִי אַחֲרֵי הַיְּהוּדִים וְהַחֵצִי אַחֲרֵי הַשְּׁלִיחִים׃ ה אָז נוֹסְדוּ יַחַד הַגּוֹיִם וְהַיְּהוּדִים עִם-רָאשֵׁיהֶם וַיִּתְנַכְּלוּ לְהַבְזוֹתָם וּלְסָקְלָם׃ ו וַיִּגָּלֶה לָהֶם הַדָּבָר וַיִּמְלְטוּ לְעָרֵי לוּקוֹנְיָא אֶל-לוּסְטְרָא וְאֶל-דַּרְבִי וּסְבִיבוֹתֵיהֶן׃ ז וַיְבַשְּׂרוּ שָׁמָּה אֶת-דְּבַר הַבְּשׁרָה׃ ח וְשָׁם בְּלוּסְטְרָא נִמְצָא אִישׁ נְכֵה רַגְלָיִם פִּסֵּחַ ישֵׁב מִיּוֹם הִוָּלְדוֹ וְלֹא-יָדַע לֶכֶת מֵעוֹדוֹ׃ ט וַיִּשְׁמַע אֶת-פּוֹלוֹס בְּדַבְּרוֹ וְהוּא הִבִּיט עָלָיו וַיֵּדַע כִּי הוּא מַאֲמִין וְכָשֵׁר לְהִוָּשֵׁעַ׃ י וַיִּשָּׂא אֶת-קוֹלוֹ וַיִּקְרָא קוּם וַעֲמֹד קוֹמְמִיוּת עַל-רַגְלֶיךָ וַיְקַפֵּץ וַיָּקָם וַיִּתְהַלָּךְ׃ יא כִּרְאוֹת הֲמוֹן הָעָם אֶת-מַעֲשֶׂה פוֹלוֹס וַיָּרִימוּ קוֹלָם וַיֹּאמְרוּ בְּלָשׁוֹן לוּקוֹנִית אָכֵן הִדַּמּוּ הָאֱלֹהִים לִבְנֵי-הָאָדָם וַיֵּרְדוּ אֵלֵינוּ׃ יב וַיִּקְרְאוּ לְבַר-נַבָּא בֵּל וּלְפוֹלוֹס קָרְאוּ הֶרְמִיס בַּאֲשֶׁר הוּא רֹאשׁ הַמְדַבְּרִים׃ יג וְכֹהֵן בֵּית-בֵּל אֲשֶׁר נֹכַח הָעִיר הֵבִיא פָּרִים וַעֲטָרוֹת לִפְנֵי הַשַּׁעַר וַיְבַקֵּשׁ הוּא וַהֲמוֹן הָעָם לִזְבֹּחַ לָהֶם זֶבַח׃ יד כִּשְׁמֹעַ זֹאת בַּר-נַבָּא וּפוֹלוֹס הַשְּׁלִיחִים קָרְעוּ בִגְדֵיהֶם וַיָּרוּצוּ אֶל-בֵּינוֹת הָעָם׃ טו וַיִּצְעֲקוּ וַיֹּאמְרוּ אַתֶּם אֲנָשִׁים לָמָּה תַעֲשׂוּ כָזֹאת הֲלֹא גַּם-אֲנַחְנוּ בְּנֵי-אָדָם כְּמוֹכֶם תְּכוּנָה אַחַת לְכֻלָּנוּ וַאֲנַחְנוּ מְלַמְּדִים אֶתְכֶם אֶת-דִּבְרֵי הַמַּלְאֲכוּת לְמַעַן תִּנָּזְרוּ מֵאַחֲרֵי לֹא-אֱלֹהִים אֵלֶּה וּדְבַקְתֶּם בֵּאלֹהִים חַיִּים עֹשֶׂה שָׁמַיִם וָאָרֶץ וְאֶת-הַיָּם וְאֶת-כָּל-אֲשֶׁר-בָּם׃(שמואל א', יב' כא'; ירמיהו י' י'; שמות כ' י') טז וַאֲשֶׁר בִּימֵי קֶדֶם הִנִּיחַ לְכָל-הַגּוֹיִם לָלֶכֶת בְּדַרְכֵיהֶם אֲשֶׁר בָּחָרוּ׃(תהילים קמז' כ') יז אַף כִּי-לֹא מָנַע עֵדְוֹתָיו כִּי טוֹב הוּא בְּתִתּוֹ לָכֶם מְטַר אַרְצְכֶם מִן-הַשָּׁמַיִם וּשְׁנוֹת רָב-תְּבוּאוֹת לְמַלֵּא נַפְשֹׁתֵיכֶם מִחְיָה וְשִׂמְחָה׃(תהילים קמז' ח') יח וְאַף גַּם-בְּדַבְּרָם כָּזֹאת הָיְתָה יְגִיעָתָם רַבָּה לְהַשְׁקִיט אֶת-הֲמוֹן הָעָם מִזְּבֹחַ לָהֶם זָבַח׃ יט וְהִנֵּה אֲנָשִׁים יְהוּדִים בָּאוּ מֵאַנְטְיוֹכְיָא וּמֵאִיקָנְיוֹן וַיַּדִּיחוּ אֶת-הֲמוֹן הָעָם וַיִּרְגְּמוּ אֶת-פּוֹלוֹס בָּאֲבָנִים וַיִּשְׁמְטוּהוּ אֶל-מִחוּץ לָעִיר כִּי אָמְרוּ מֵת הוּא׃ כ וַיִּהְיוּ הַתַּלְמִידִים עֹטְרִים אֵלָיו וַיָּקָם וַיָּשָׁב הָעִירָה וּבְיוֹם הַמָּחֳרָת יָצָא עִם-בַּר-נַבָּא וַיֵּלֶךְ לְדַרְבִי׃ כא וַיְבַשְּׂרוּ בָּעִיר הַהִיא אֶת-הַבְּשׁרָה וַיַּעֲשׂוּ תַלְמִידִים הַרְבֵּה וְאַחֲרֵי-כֵן שָׁבוּ אֶל-לוּסְטְרָא וְאִיקָנְיוֹן וְאַנְטְיוֹכְיָא׃ כב וַיְאַמְּצוּ שָׁם אֶת-לֵב הַתַּלְמִידִים וַיַּזְהִירוּם לַעֲמֹד בֶּאֱמוּנָתָם וּלְהַאֲמִין כִּי רַק-בְּדֵי עָמָל וּתְלָאָה זֶה בֹאנֵנוּ אֶל-מַלְכוּת הָאֱלֹהִים׃ כג וַיִּבְחֲרוּ לָהֶם אֲנָשִׁים זְקֵנִים בְּכָל-עֵדָה וְעֵדָה וַיִּתְפַּלְּלוּ וַיָּצוּמוּ וַיַּפְקִידוּם בְּיַד הָאָדוֹן אֲשֶׁר הֶאֱמִינוּ-בוֹ׃ כד וְהֵמָּה עָבְרוּ בְּפִיסְדְיָא וַיָּבֹאוּ אֶל-פַּמְפּוּלְיָא׃ כה וַיְדַבְּרוּ אֶת-הַדָּבָר בְּפַרְגִי וַיֵּרְדוּ מִשָּׁם אֶל-אַטַּלְיָא׃ כו וּמִשָּׁם הָלְכוּ דֶרֶךְ-יָם וַיָּבֹאוּ אֶל-אַנְטְיוֹכְיָא אֲשֶׁר שָׁם הָפְקְדוּ בְּחֶסֶד אֱלֹהִים עַל-הַמְּלָאכָה אֲשֶׁר כִּלּוּ לַעֲשׂוֹת עַד-תֻּמָּהּ׃ כז וּבְבֹאָם שָׁמָּה אָסְפוּ אֶת-הָעֵדָה וַיְסַפְּרוּ אֶת-כָּל-אֲשֶׁר עָשָׂה לָהֶם הָאֱלֹהִים וְכִי-פָתַח לַגּוֹיִם אֶת-הַשַּׁעַר אֲשֶׁר מַאֲמִינִים יָבֹאוּ בוֹ׃ כח וַיֵּשְׁבוּ עִם-הַתַּלְמִידִים מֶשֶׁךְ יָמִים לֹא-מְעָט׃