ב א עַל-כֵּן בֶּן-אָדָם קָטֹן אוֹ גָדוֹל אֵין צְדָקָה לְךָ לִהְיוֹת שֹׁפֵט כִּי בַדָּבָר אֲשֶׁר תַּרְשִׁיעַ אֶת-רֵעֲךָ תַּרְשִׁיעַ גַּם אֶת-נַפְשְׁךָ אַחֲרֵי אֲשֶׁר גַּם-אַתָּה הַשֹּׁפֵט עָשִׂיתָ כְּמַעֲשֵׂהוּ׃(שמואל ב', יב' ה'-ז') ב וַאֲנַחְנוּ הֲלֹא יָדַעְנוּ כִּי בְּמֵישָׁרִים יִשְׁפֹּט אֱלֹהִים כָּל-פֹּעֲלֵי אָוֶן׃ ג וְאַתָּה בֶן-אָדָם בְּשָׁפְטְךָ אֹתָם וּכְמַעֲשֵׂיהֶם גַּם-אַתָּה עֹשֶׂה הֲתֹאמַר אֶל-לִבְּךָ כִּי תִמָּלֵט מִמִּשְׁפַּט אֱלֹהִים׃ ד אוֹ הֲתָבוּז רֹב טוּבוֹ וְחֶמְלָתוֹ וְאֶרֶךְ אַפּוֹ וְלֹא תִתְבּוֹנֵן כִּי-בְטוּבוֹ הוּא מַדְרִיכְךָ לָשׁוּב אֵלָיו׃(שמות לד' ו'-ז') ה וּבִשְׁרִרוּת לִבְּךָ וּבְעָרְפְּךָ הַקָּשֶׁה תִּצְבָּר-לְךָ עֶבְרָה לַיּוֹם הַגָּדוֹל וְהַנּוֹרָא בְּהִגָּלוֹת נִגְלוֹת צִדְקַת מִשְׁפַּט אֱלֹהִים׃ ו אֲשֶׁר יִגְמֹל לְאִישׁ אִישׁ כְּמִפְעָלָיו׃(תהילים סב' יג') ז חַיֵּי עוֹלָם לְשֹׁקְדֵי עֲשׂה-טוֹב שֹׁחֲרֵי כָבוֹד וְהָדָר אֲשֶׁר לֹא יַעֲבֹר לָנֶצַח׃ ח וְזַעַף וְעֶבְרָה לִבְנֵי מֶרִי הַמְמָאֲנִים לִשְׁמֹעַ דִּבְרֵי אֱמֶת וְלַעֲשׂוֹת עָוֶל יָהִינוּ׃ ט צָרָה וְצוּקָה לְכָל-נֶפֶשׁ אִישׁ הַפֹּעֵל רָע הַיְּהוּדִי בְּרֹאשׁ וְגַם-הַיְּוָנִי׃ י וְכָבוֹד וְהָדָר וְשָׁלוֹם לְכָל-פֹּעֵל טוֹב הַיְּהוּדִי בְּרֹאשׁ וְגַם-הַיְּוָנִי׃ יא כִּי אֵין-מַשּׂא פָנִים עִם-הָאֱלֹהִים׃(דברי הימים ב', ט' ז') יב כִּי כָל-אֵלֶּה אֲשֶׁר חָטְאוּ בִּבְלִי-תוֹרָה גַּם בִּבְלִי-תוֹרָה יֹאבֵדוּ וְאֵלֶּה אֲשֶׁר חָטְאוּ וְתוֹרַת אֲדֹנָי אִתָּם עַל-פִּי הַתּוֹרָה הַזֹּאת יִשָּׁפֵטוּ׃ יג כִּי לֹא שֹׁמְעֵי הַתּוֹרָה צַדִּיקִים הֵם לִפְנֵי אֱלֹהִים כִּי אִם-שֹׁמְרֵי הַתּוֹרָה יִצְדָּקוּ׃ יד כִּי הַגּוֹיִם אֲשֶׁר אֵין-לָהֶם אוֹר תּוֹרָה וְעֹשִׂים כְּדִבְרֵי הַתּוֹרָה עַל-פִּי אוֹר דַּעְתָּם הֵם אֲשֶׁר תּוֹרָה אֵין לָהֶם יִהְיוּ תוֹרָה לְנַפְשָׁם׃ טו בְּהַרְאֹתָם כִּי מִשְׁפַּט הַתּוֹרָה כָּתוּב עַל-לוּחַ לִבָּם בַּאֲשֶׁר דַּעְתָּם תַּגִּיד לָהֶם וְעֶשְׁתֹּנוֹתֵיהֶם חֲלִיפוֹת שׂטְנוֹת אוֹ מְזַכּוֹת אִשָּׁה אֶת-אֲחוֹתָהּ׃ טז בַּיּוֹם הַהוּא אֲשֶׁר יִשְׁפֹּט אֱלֹהִים אֶת-סִתְרֵי בְנֵי אָדָם עַל-פִּי יֵשׁוּעַ הַמָּשִׁיחַ כַּאֲשֶׁר הוֹדַעְתִּי בִּבְשׁרָתִי׃(קוהלת יב' יד') יז וְאַתָּה כִּי נִקְרֵאתָ בְשֵׁם יְהוּדִי וַתָּשֶׁת מִבְטַחֲךָ בַתּוֹרָה וּבֵאלֹהִים תִּתְהַלֵּל נַפְשֶׁךָ׃ יח כִּי יָדַעְתָּ אֶת-רְצוֹנוֹ וְתָבִין לְהַבְדִּיל בֵּין-טוֹב לָרָע לִהְיוֹתְךָ מַשְׂכִּיל בַּתּוֹרָה׃(דברים ד' ח') יט וְלִבְּךָ בָטוּחַ כִּי אַתָּה הוּא הַמְנַהֵל לְעִוְרִים וְאוֹר לְישְׁבֵי חשֶׁךְ׃ כ מוֹרֶה לִפְתָאיִם אַלּוּף לִילָדִים וְחוֹתַם תָּכְנִית בְּדַעַת וֶאֱמֶת בַּתּוֹרָה׃ כא וְאַתָּה הַמְאַלֵּף אֶת-אֲחֵרִים הֲלֹא תְאַלֵּף אֶת-נַפְשֶׁךָ אַתָּה הַקֹּרֵא לֹא-תִגְנֹב (שמות כ' יב'; דברים ה' טז') הֲתִגְנֹב אָתָּה׃(דברים ז' כה'-כו') כב אַתָּה הַאֹמֵר לֹא-תִנְאָף הֲתִנְאֹף אָתָּה אַתָּה (***) אֲשֶׁר תְּשַׁקֵּץ אֶת-הָאֱלִילִים הֲתִמְעַל מַעַל בַּקֹּדֶשׁ׃(מלאכי ג' ח'-ט') כג אַתָּה כִּי תִתְהַלֵּל בַּתּוֹרָה הַתְחַלֵּל שֵׁם הָאֱלֹהִים וְסוּר מִן-הַתּוֹרָה׃ כד כִּי בִגְלַלְכֶם שֵׁם אֱלֹהִים מְחֻלָּל בַּגּוֹיִם כְּמוֹ שֶׁכָּתוּב׃(ישעיהו נב' ה'; יחזקאל לו' כ'-כג') כה כִּי אָמֵן הַמּוּלָה לְהוֹעִיל לְךָ אִם-תִּשְׁמֹר אֶת-הַתּוֹרָה אַךְ אִם אֶת-הַתּוֹרָה הֵפַרְתָּ הֲלֹא מוּלָתְךָ לְעָרְלָה נִהְיָתָה׃(ירמיהו ט' כד'-כה') כו וְאִם הֶעָרֵל יַעֲשֶׂה כְּמִשְׁפַּט הַתּוֹרָה עָרְלָתוֹ לְמוּלָה תֵּחָשֶׁב-לוֹ׃(ישעיהו נו' ו'-ז') כז וְהֶעָרֵל הַזֶּה מִלֵּדָה הָעֹשֶׂה כְמִשְׁפַּט הַתּוֹרָה יָדִין אֹתְךָ אֲשֶׁר יֶשׁ-לְךָ סֵפֶר הַמִּצְוָה וְאוֹת בְּרִית הַמּוּלוֹת וְאֶת-הַתּוֹרָה הֵפַרְתָּ׃ כח כִּי לֹא-זֶה הוּא יְהוּדִי אֲשֶׁר לָעֵינָיִם וְלֹא זֹאת הִיא הַמּוּלָה אֲשֶׁר לַמַּרְאֶה בַּבָּשָׂר׃ כט אַךְ זֶה יְהוּדִי אֲשֶׁר בְּתוֹךְ לִבּוֹ הוּא יְהוּדִי וְהַמּוּלָה מוּלַת הַלֵּבָב הִיא לְפִי רוּחַ הַדִּבֵּר וְלֹא לְפִי אוֹת הַכְּתָב אֲשֶׁר תְּהִלָּתוֹ לֹא מִבְּנֵי אָדָם כִּי אִם מֵאֱלֹהִים׃(דברים י' טז'; ירמיהו ד' ד')