א א פּוֹלוֹס עֶבֶד יֵשׁוּעַ הַמָּשִׁיחַ שָׁלִיחַ נִבְחָר וּמְקֻדָּשׁ לְבַשֵּׂר אֶת-בְּשׁרַת הָאֱלֹהִים׃ ב אֲשֶׁר מִקֶּדֶם הִגִּיד אֹתָהּ עַל-פִּי נְבִיאָיו בְּכִתְבֵי הַקֹּדֶשׁ׃ ג עַל-דְּבַר בְּנוֹ אֲשֶׁר יָצָא מִזֶּרַע דָּוִד לְפִי בְשָׂרוֹ׃(תהילים קלב' יא') ד וְהוּכַן בֶּן-הָאֱלֹהִים בִּגְבוּרָה לְפִי רוּחַ הַקֹּדֶשׁ בַּהֲקִיצוֹ מִן-הַמֵּתִים הוּא יֵשׁוּעַ הַמָּשִׁיחַ אֲדֹנֵינוּ׃ ה וְעַל-יָדוֹ נִתַּן לָנוּ חֵן וּמַלְאֲכוּת-יָהּ לְהַטּוֹת אֶת-לֵב כָּל-הַגּוֹיִם לָאֱמוּנָה בַּעֲבוּר שְׁמוֹ׃ ו וּבְתוֹכָם הִנְּכֶם גַּם-אַתֶּם קְרִיאֵי יֵשׁוּעַ הַמָּשִׁיחַ׃ ז כָּל-הַקָּהָל בְּרוֹמִי יְדִידֵי אֱלֹהִים בְּחִירָיו וּקְדֹשָׁיו חֶסֶד וְשָׁלוֹם יִתֵּן לָכֶם אֱלֹהִים אָבִינוּ וְיֵשׁוּעַ הַמָּשִׁיחַ אֲדֹנֵינוּ׃ ח בְּפֵתַח דְּבָרַי אוֹדֶה אֶת-אֱלֹהַי בְּיֵשׁוּעַ הַמָּשִׁיחַ בְּעַד-כֻּלְכֶם כִּי אֱמוּנַתְכֶם שָׁמְעָה בְּכָל הָעוֹלָם׃ ט וְהָאֱלֹהִים אֲשֶׁר בִּבְשׁרַת בְּנוֹ אֲנִי עֹבֵד אֹתוֹ בְּרוּחִי וְנַפְשִׁי הוּא עֵדִי כִּי לֹא-חָדַלְתִּי מֵהַזְכִּיר אֶתְכֶם׃ י וּמַעְתִּיר אֲנִי תָמִיד בִּתְפִלּוֹתַי לְמָתַי אֵפוֹא אַצְלִיחַ דַּרְכִּי בִּרְצוֹן אֱלֹהַי לָבוֹא אֲלֵיכֶם׃ יא כִּי-נִכְסֹף נִכְסַפְתִּי לִרְאֹתְכֶם וּלְהַאֲצִיל מִן-מַתְּנַת הָרוּחַ עֲלֵיכֶם לְהוֹסִיף לָכֶם אֹמֶץ׃ יב וְגַם-כֵּן לְהִתְנַחֵם עִמָּכֶם יַחְדָּו בֶּאֱמוּנַת אִישׁ וְאִישׁ מִמֶּנּוּ כְּמוֹכֶם כָּמֹנִי׃ יג וְאֵין-נַפְשִׁי לְהַעֲלִים מִכֶּם אַחַי כִּי-רַבּוֹת נָתַתִּי אֶת-לִבִּי לָבוֹא אֲלֵיכֶם לִמְצֹא לִי מְעַט פְּרִי גַם-בָכֶם כְּמוֹ גַם-בְּיֶתֶר הַגּוֹיִם וְנִמְנַעְתִּי עַד-עָתָּה׃ יד הִנֵּה בַּעַל חוֹב אֲנִי לִבְנֵי הַיְּוָנִים וְגַם-לִבְנֵי עַם לֹעֵז לִבְנֵי בִינָה וְלִבְנֵי בְלִי-בִינָה׃ טו וּבְכֵן נָכוֹן אֲנִי לְפִי יְכָלְתִּי לְהַגִּיד אֶת-הַבְּשׁרָה גַּם-לָכֶם בְּנֵי רוֹמִי׃ טז כִּי לֹא-אֵבוֹשׁ מִבְּשׁרַת הַמָּשִׁיחַ (תהילים קיט' מו') אֲשֶׁר גְּבוּרַת אֱלֹהִים הִיא לִתְשׁוּעָה אֶל-כָּל-מַאֲמִין הַיְּהוּדִי בְּרֹאשׁ וְגַם-הַיְּוָנִי׃ יז כִּי-בָהּ נִגְלְתָה צִדְקַת אֱלֹהִים מִמְּקוֹר אֱמוּנָה לְמַעַן נִחְיֶה בֶאֱמוּנָה כַּכָּתוּב וְצַדִּיק בֶּאֱמוּנָתוֹ יִחְיֶה׃(חבקוק ב' ד') יח וַחֲרוֹן אֱלֹהִים מִשָּׁמַיִם נִשְׁקָף עַל-עֹשֵׂי רִשְׁעָה וּבְנֵי עַוְלָה הַכֹּבְשִׁים אֶת-הָאֱמֶת בְּעַוְלָתָה׃ יט כִּי דַּעַת אֱלֹהִים בְּרוּרָה בְקִרְבָּם כִּי גִלָּה לָהֶם אֱלֹהִים׃ כ כִּי חֶבְיוֹן עֻזּוֹ נֵצַח גְּבוּרָתוֹ וֵאלֹהוּתוֹ נוֹדְעוּ וְיָצְאוּ לָאוֹרָה עַל-יְדֵי פְעֻלּוֹתָיו מִיּוֹם בְּרֹא אֶרֶץ וְשָׁמָיִם (איוב יב' ט'; תהילים יט' ב') עַד-כִּי אֵין-לָהֶם פֶּה לְהִצְטַדָּק׃ כא כִּי יֹדְעִים הֵם אֶת-הָאֱלֹהִים וְלֹא נָתְנוּ לוֹ כְבוֹדוֹ אַף-לֹא הוֹדוּ לוֹ כִּי אִם-בְּמוֹעֲצוֹתֵיהֶם יֶהְבָּלוּ וְלִבָּם הַנִּבְעָר הָלַךְ חֲשֵׁכִים׃(איוב לה' י'-יא'; דניאל ה' כג') כב יִתְאַמְּרוּ כִּי חֲכָמִים הֵם עַל-כֵּן נִבְעָרוּ׃ כג וַיָּמִירוּ כְבוֹד אֲדֹנָי אֵל עוֹלָם בִּדְמוּת תַּבְנִית אָדָם בֶּן-תְּמוּתָה וְתַבְנִית עוֹף הַשָּׁמַיִם וְהוֹלֵךְ עַל-אַרְבַּע וְרֶמֶשׂ הָאֲדָמָה׃(ירמיהו י' יד'; ישעיהו מד' יג'; תהילים קו' כ') כד עַל-כֵּן אֱלֹהִים הִסְגִּירָם בְּיַד שְׁרִרוּת לִבָּם לְטֻמְאָה וּלְחַלֵּל בְּשָׂרָם הֵם בֵּינֵיהֶם׃(תהילים פא' יג') כה אֲשֶׁר הֵמִירוּ אֱלֹהֵי אֱמֶת בַּשָּׁקֶר וַיִּירְאוּ וַיַּעַבְדוּ אֶת-הַנּוֹצָר עַל-פְּנֵי הַיּוֹצֵר בָּרוּךְ הוּא לְעוֹלָם וָעֶד אָמֵן׃ כו בַּעֲבוּר זֹאת הִסְגִּירָם אֱלֹהִים בְּיַד קְלוֹן תְּשׁוּקָתָם כִּי גַּם-נְשֵׁיהֶם הֶחֱלִיפוּ אֹרַח חֻקָּתָן בְּאֹרַח זָר׃ כז כַּאֲשֶׁר גַּם-הַגְּבָרִים חָדְלוּ מִבּוֹא אֶל-הַנָּשִׁים כְּדֶרֶךְ כָּל-הָאָרֶץ וַתִּבְעַר-בָּם אֵשׁ תַּאֲוָתָם אִישׁ אֶל-רֵעֵהוּ וְגֶבֶר בְּגֶבֶר יִתְעַלְּלוּ לְקִיקָלוֹן וְעֵקֶב תַּעְתֻּעֵיהֶם לָקְחוּ דֵי-גְמוּל בְּנַפְשׁוֹתָם׃ כח וְכַאֲשֶׁר לֹא חָפְצוּ הַשְׂכֵּל וְיָדֹעַ אֶת-הָאֱלֹהִים כֵּן עֲזָבָם בִּמְשׁוּבַת לִבָּם לַעֲשׂוֹת אֵת אֲשֶׁר-לֹא יֵעָשֶׂה׃ כט עַד אֲשֶׁר מָלְאוּ כָּל-עַוְלָה זְנוּת רֶשַׁע בֶּצַע וָאָוֶן וְגַם-קִנְאָה וְרֶצַח מָדוֹן וּרְמִיָּה וּמְזִמָּה׃ ל כֻּלָּם מַלְשִׁינִים וְהֹלְכֵי רָכִיל שׁנְאֵי אֱלֹהִים וְהוֹלְלִים גֵּאִים וּרְהָבִים חָרָשֵׁי מַשְׁחִית וּמַמְרִים לְהוֹרֵיהֶם׃ לא חַסְרֵי דַּעַת וּמְפִירֵי בְרִית אַכְזָרִים נֹטְרֵי שִׂנְאָה אֲשֶׁר חֲנִינָה לֹא יֵדָעוּ׃ לב וְהֵם אַף-כִּי יֹדְעִים מִשְׁפַּט אֱלֹהִים כִּי-הָעֹשִׂים מַעֲשִׂים כָּאֵלֶּה בְּנֵי-מָוֶת הֵם בְּכָל-זֹאת לֹא לְבַד כִּי יַעֲשׂוּם כִּי-אִם גַּם-יְאַשְּׁרוּן עוֹד עֹשֵׂיהֶם׃