כד א וַיֵּצֵא יֵשׁוּעַ מִן-הַהֵיכָל וַיֵּלֶךְ לְדַרְכּוֹ וַיִּגְּשׁוּ אֵלָיו תַּלְמִידָיו לְהַרְאֹתוֹ אֶת-בִּנְיְנֵי הַהֵיכָל׃ ב וַיַּעַן יֵשׁוּעַ וַיֹּאמֶר אֲלֵיהֶם הֲלֹא רְאִיתֶם כָּל-אֵלֶּה אָמֵן אֲנִי אֹמֵר לָכֶם כִּי כֻלָּם יֵהָרְסוּן וְלֹא-תִשָּׁאֵר אֶבֶן עַל-אָבֶן׃(מלכים א', ט' ז'-ח') ג וּבְשִׁבְתּוֹ עַל-הַר הַזֵּיתִים וַיִּגְּשׁוּ אֵלָיו תַּלְמִידָיו לְבַדָּם וַיֹּאמְרוּ הַגֶּד-נָא לָנוּ מָתַי תִּקְרֶאנָה אֵלֶּה וּמָה אוֹת בּוֹאֲךָ וְקֵץ הָעוֹלָם׃ ד וַיַּעַן יֵשׁוּעַ וַיֹּאמֶר אֲלֵיהֶם הִשָּׁמְרוּ לָכֶם פֶּן-יַתְעֶה אֶתְכֶם אִישׁ׃ ה כִּי רַבִּים יָבֹאוּ בִשְׁמֵי לֵאמֹר אֲנִי הוּא הַמָּשִׁיחַ וְהִתְעוּ אֶת-רַבִּים׃(ירמיהו יד' יד') ו וְהָיָה כִּי-תִשְׁמְעוּ מִלְחָמָה אוֹ שְׁמֻעוֹת מִלְחָמָה רְאוּ אַל-תִּבָּהֵלוּ כִּי כָל-אֵלֶּה תִּקְרֶאנָה וְעוֹד לֹא הַקֵּץ׃ ז כִּי יָקוּם גּוֹי עַל-גּוֹי וּמַמְלָכָה עַל-מַמְלָכָה וְהָיָה רָעָב וְדֶבֶר וְרַעַשׁ בִּמְקוֹמוֹת רַבִּים׃(דברי הימים ב', טו' ו'; ישעיהו יט' ב') ח וְכָל-אֵלֶּה רַק רֵאשִׁית הַחֲבָלִים׃ ט אָז יָצִיקוּ לָכֶם מִסָּבִיב וְהָרְגוּ בָכֶם וּשְׂנוּאִים תִּהְיוּ לְכָל-הָעַמִּים בַּעֲבוּר שְׁמִי׃ י וְרַבִּים יִכָּשְׁלוּ אָז וְהִסְגִּירוּ אִישׁ אֶת-רֵעֵהוּ וְאִישׁ אֶת-אָחִיו יִשְׂנָאוּ׃ יא וְקָמוּ נְבִיאֵי שֶׁקֶר רַבִּים וְהִתְעוּ רַבִּים אַחֲרֵיהֶם׃(***) יב וְאַחֲרֵי אֲשֶׁר יִרְבֶּה הַפָּשַׁע תָּפוּג אַהֲבַת רַבִּים׃ יג אַךְ הַמְחַכֶּה עַד-הַקֵּץ הוּא יִוָּשֵׁעַ׃ יד וּבְשׂוֹרַת הַמַּלְכוּת הַזֹּאת תִּקָּרֵא בְכָל-הָאָרֶץ לְעֵדוּת לְכָל-הַגּוֹיִם וְאַחַר יָבֹא הַקֵּץ׃ טו לָכֵן כַּאֲשֶׁר תִּרְאוּ אֶת-הַשִּׁקּוּץ הַמְשֹׁמֵם הָאָמוּר בְּיַד-דָּנִיֵּאל הַנָּבִיא עֹמֵד בִּמְקוֹם קֹדֶשׁ (דניאל ט' כז'; יא' לא'; יב' יא') וְהַמַּשְׂכִּיל יָבִין׃ טז אָז אֵלֶּה אֲשֶׁר בִּיהוּדָה יָנוּסוּ אֶל-הֶהָרִים׃ יז וּמִי אֲשֶׁר עַל-הַגָּג לֹא יֵרֵד לָקַחַת דָּבָר מִבֵּיתוֹ׃ יח וּמִי אֲשֶׁר בַּשָּׂדֶה לֹא יָשׁוּב לְבֵיתוֹ לָשֵׂאת אֶת-שִׂמְלָתוֹ׃ יט אַךְ-אוֹי לֶהָרוֹת וְלַמֵּינִיקוֹת בַּיָּמִים הָהֵמָּה׃ כ וְאַתֶּם הִתְפַּלְלוּ לְבִלְתִּי תִהְיֶה מְנוּסַתְכֶם בַּחֹרֶף וְלֹא בַּשַּׁבָּת׃ כא כִּי אָז תִּהְיֶה צָרָה גְדוֹלָה אֲשֶׁר כָּמוֹהָ לֹא-נִהְיְתָה מֵרֵאשִׁית יְמוֹת עוֹלָם וְעַד-הַיּוֹם הַזֶּה וְכָמוֹהָ לֹא-תֹסִף׃ כב וְלוּלֵא יִקְצְרוּ הַיָּמִים הָאֵלֶּה לֹא יִנָּצֵל כָּל-בָּשָׂר אַךְ לְמַעַן הַבְּחִירִים הַיָּמִים הָאֵלֶּה יִקְצָרוּ׃(ישעיהו סט' ח') כג וְאָז אִם-יֹאמַר אֲלֵיכֶם אִישׁ הִנֵּה הַמָּשִׁיחַ פֹּה אוֹ הִנּוֹ-שָׁם אַל-תַּאֲמִינוּ׃ כד כִּי מְשִׁיחֵי-שֶׁקֶר וּנְבִיאֵי-כָזָב יָקוּמוּ וְנָתְנוּ אֹתוֹת וּמוֹפְתִים גְּדֹלִים לְנַסּוֹת אִם יֶשׁ-לְאֵל יָדָם לְהַתְעוֹת גַּם-אֶת-הַבְּחִירִים׃ כה רְאוּ כִּי מֵרֹאשׁ הִגַּדְתִּי לָכֶם׃ כו לָכֵן כִּי-יֹאמְרוּ לָכֶם הִנּוֹ בַמִּדְבָּר אַל-תֵּצֵאוּ הִנּוֹ בַחֲדָרִים אַל-תַּאֲמִינוּ׃ כז כִּי כַּבָּרָק יֵצֵא מִמִּזְרָח וְיֵרָאֶה עַד-אַחֲרִית יָם כֵּן תִּהְיֶה בִּיאַת פְּנֵי בֶן-הָאָדָם׃ כח בַּאֲשֶׁר פְּגָרִים שָׁם יִקָּבְצוּ הַנְּשָׁרִים׃(איוב לט' ל') כט וְאַחֲרֵי צוֹק הָעִתִּים הָאֵלֶּה פִּתְאֹם תֶּחְשַׁךְ הַשֶּׁמֶשׁ (יואל ד' טו'; עמוס ה' כ') וְהַיָּרֵחַ לֹא יַגִּיהַּ אוֹרוֹ הַכּוֹכָבִים יִפְּלוּ מִן-הַשָּׁמַיִם וּצְבָא הַמָּרוֹם יָזֻעוּ׃(ישעיהו יג' ט'-י'; לד' ד') ל אָז יֵרָאֶה אוֹת בֶּן-הָאָדָם בַּשָּׁמָיִם וְסָפְדוּ כָּל-מִשְׁפְּחוֹת הָאֲדָמָה (זכריה יב' י'-יד') וְרָאוּ אֶת-בֶּן-הָאָדָם בָּא בְּעַנְנֵי הַשָּׁמַיִם בְּעֹז וּבְהָדָר גָּדוֹל׃(דניאל ז' יג'-יד') לא וְהוּא יִשְׁלַח אֶת-מַלְאָכָיו בְּקוֹל שׁוֹפָר חָזָק וְקִבְּצוּ אֶת-בְּחִירָיו מֵאַרְבַּע הָרוּחוֹת מִקְצֵה הַשָּׁמַיִם עַד-קְצֵה הַשָּׁמָיִם׃(דברים ל' ד'; ישעיהו יא' יב') לב קְחוּ לָכֶם מָשָׁל מִן-הַתְּאֵנָה אִם רָטוֹב עֲנָפָהּ וְעָלֶיהָ צָמָחוּ יֹדְעִים אַתֶּם כִּי קָרוֹב הַקָּיִץ׃ לג וְכֵן גַּם-כַּאֲשֶׁר תִּרְאוּ כָּל-אֵלֶּה יָדוֹעַ תֵּדְעוּ כִּי-קָרוֹב הוּא לַפָּתַח׃ לד אָמֵן אֲנִי אֹמֵר לָכֶם כִּי לֹא יַעֲבֹר הַדּוֹר הַזֶּה עַד אֲשֶׁר-יָקוּמוּ כָּל-אֵלֶּה׃ לה הַשָּׁמַיִם וְהָאָרֶץ יַעֲבֹרוּ וּדְבָרַי לֹא יַעֲבֹרוּן׃(תהילים קב' כז'-כח'; ישעיהו נא' ו') לו וְעַל-מוֹעֵד הַיּוֹם הַהוּא וְהַשָּׁעָה הַהִיא אֵין אִישׁ יֹדֵעַ וְלֹא מַלְאָךְ בַּשָּׁמַיִם בִּלְתִּי הָאָב לְבַדּוֹ׃ לז וְכִימֵי נֹחַ כֵּן בִּיאַת בֶּן-הָאָדָם׃(בראשית ו' יא'-יג) לח כִּי כַּאֲשֶׁר לִפְנֵי יְמֵי הַמַּבּוּל אָכְלוּ וְשָׁתוּ בָּעֲלוּ נָשִׁים וְנָשִׁים נִבְעָלוּ עַד-הַיּוֹם אֲשֶׁר-בָּא נֹחַ אֶל-הַתֵּבָה׃(בראשית ז' ז') לט וְהֵם לֹא יָדְעוּ עַד כִּי-בָא הַמַּבּוּל וַיִּמַח אֶת-כֻּלָּם (בראשית ז' כא'-כג') כֵּן תִּהְיֶה בִּיאַת בֶּן-הָאָדָם׃ מ אָז יִהְיוּ שְׁנַיִם בַּשָּׂדֶה אֶחָד יֵאָסֵף וְאֶחָד יֵעָזֵב׃ מא שְׁתַּיִם טֹחֵנוֹת בָּרֵחָיִם אַחַת תֵּאָסֵף וְאַחַת תֵּעָזֵב׃ מב לָכֵן הִתְיַצְּבוּ עַל-מִשְׁמַרְתְּכֶם כִּי אֵינְכֶם יֹדְעִים שָׁעָה בּוֹא אֲדֹנֵיכֶם׃ מג רַק זֹאת שִׂימוּ עַל-לֵב כִּי לוּ-יָדַע בַּעַל הַבַּיִת אֶת-הָאַשְׁמוּרָה בָּהּ יָבוֹא הַגַּנָּב הָיָה עֹמֵד עַל-מִשְׁמַרְתּוֹ וְלֹא נָתַן לַחְתֹּר אֶת-בֵּיתוֹ׃ מד לָכֵן גַּם-אַתֶּם הֱיוּ נְכֹנִים כִּי בֶן-הָאָדָם יָבוֹא בְשָׁעָה אֲשֶׁר לֹא תָשִׂמוּ עַל-לֵב׃ מה וּמִי-אֵפוֹא הוּא עֶבֶד נֶאֱמָן וְנָבוֹן אֲשֶׁר אֲדֹנָיו הִפְקִידוֹ עַל-בְּנֵי בֵיתוֹ לָתֵת לָהֶם אָכְלָם בְּעִתּוֹ׃ מו אַשְׁרֵי הָעֶבֶד הַהוּא אֲשֶׁר בְּבֹא אֲדֹנָיו יִמְצָאֶנּוּ כִּי כֵן עָשָׂה׃ מז אָמֵן אֲנִי אֹמֵר לָכֶם כִּי יַפְקִדֵהוּ עַל-כָּל-אֲשֶׁר יֶשׁ-לוֹ׃ מח וְאִם עֶבֶד רָע יֹאמַר בְּלִבּוֹ בֹּשֵׁשׁ אֲדֹנִי לָבוֹא׃(קוהלת ח' יא') מט וְהֵחֵל לְהַכּוֹת אֶת-אֶחָיו הָעֲבָדִים וְלֶאֱכֹל וְלִשְׁתּוֹת עִם-הַסֹּבְאִים׃ נ בּוֹא יָבוֹא אֲדֹנֵי הָעֶבֶד הַזֶּה בְּיוֹם אֲשֶׁר לֹא יְצַפֶּה לּוֹ וּבְשָׁעָה אֲשֶׁר לֹא יֵדָע׃ נא וְאָז יְשַׁסֵּף אֹתוֹ וְנָתַן אֶת-חֶלְקוֹ עִם-הַחֲנֵפִים שָׁם יִהְיֶה בְכִי וַחֲרֹק שִׁנָּיִם׃