כג א אָז יְדַבֵּר יֵשׁוּעַ אֶל-הֲמוֹן הָעָם וְאֶל-תַּלְמִידָיו לֵאמֹר׃ ב הַסּוֹפְרִים וְהַפְּרוּשִׁים יֹשְׁבִים עַל-כִּסֵּא מֹשֶׁה׃ ג לָכֵן כֹּל אֲשֶׁר-יֹאמְרוּ אֲלֵיכֶם לִשְׁמֹר תִּשְׁמְרוּ וַעֲשִׂיתֶם (דברים יז' י'-יב') אַךְ כְּמַעֲשֵׂיהֶם אַל-תַּעֲשׂוּ כִּי הֵם אֹמְרִים וְאֵינָם עֹשִׂים׃(מלאכי ב' ז'-ח') ד כִּי קֹשְׁרִים מַשָּׂא קָשֶׁה כָּבֵד מִנְּשׁא וְעֹמְסִים עַל-שְׁכֶם אֲנָשִׁים וְאֵין אֶת-נַפְשָׁם לְהָנִיעַ אֹתוֹ גַּם-בְּאֶצְבָּעָם׃ ה וְכָל-מַעֲשֵׂיהֶם יַעֲשׂוּן לְהֵרָאוֹת בָּם לְעֵינֵי בְנֵי-אָדָם יַרְחִיבוּ לָהֶם הַתְּפִלִּין (דברים ו' ח') וְהַצִּיצִית יַגְדִּילוּן׃(במדבר טו' לח') ו וְאֹהֲבִים הֵם אֶת-הַמְּקֹמוֹת הַנִּכְבָּדִים בְּבָתֵּי הַמִּשְׁתֶּה וְאֶת-הַמּוֹשָׁבוֹת הָרִאשֹׁנִים בְּבָתֵּי-הַכְּנֵסֶת׃ ז שְׁאֵלַת שָׁלוֹם לָהֶם בַּשְּׁוָקִים וּלְהִקָּרֵא בְּשֵׁם רַבִּי בְּפִי הָאֲנָשִׁים׃ ח אָכֵן אַתֶּם אַל-יִקָּרֵא לְאִישׁ מִכֶּם רַבִּי כִּי רַב אֶחָד לָכֶם הַמָּשִׁיח וְאַתֶּם כֻּלְּכֶם אַחִים׃ ט וְאַל-תֹּאמְרוּ לְאִישׁ בָּאָרֶץ אָבִי אַתָּה כִּי אָב אֶחָד לָכֶם הוּא אֲשֶׁר בַּשָּׁמָיִם׃ י וְאַל-יִקָּרֵא לְאִישׁ מִכֶּם מוֹרֶה דֶרֶךְ כִּי מוֹרֶה אֶחָד לָכֶם הַמָּשִׁיחַ׃ יא וְהַגָּדוֹל בֵּינֵיכֶם יִהְיֶה לִמְשָׁרֵת לָכֶם׃ יב וְהַמִּתְנַשֵּׂא בְגַאֲוָתוֹ יִשָּׁפֵל וּשְׁפַל רוּחַ יִנָּשֵׂא׃(משלי כט' כג'; יחזקאל יז כד') יג אַךְ-אוֹי לָכֶם סוֹפְרִים וּפְרוּשִׁים חֲנֵפִים כִּי תִסְגְּרוּ מַלְכוּת הַשָּׁמַיִם מִפְּנֵי בְנֵי-הָאָדָם אַתֶּם לֹא תָבֹאוּ שָׁמָּה וְאֶת-הַבָּאִים לֹא תִתְּנוּ לָבֹא׃ יד אוֹי לָכֶם סוֹפְרִים וּפְרוּשִׁים חֲנֵפִים כִּי תֹאכְלוּן אֶת-בָּתֵי הָאַלְמָנוֹת וּלְמַרְאֵה עַיִן תַּרְבּוּ תְפִילָּה וְלָכֵן גַם-קַו הַמִּשְׁפָּט יִנָּטֶה עֲלֵיכֶם פִּי-שְׁנָיִם׃ טו אוֹי לָכֶם סוֹפְרִים וּפְרוּשִׁים חֲנֵפִים כִּי תָּסֹבּוּ יָם וְיַבָּשָׁה לַעֲשׂוֹת גֵּר אֶחָד וְאַחֲרֵי אֲשֶׁר נַעֲשָׂה כֵן תַּעֲשׂוּהוּ לְבֶן-גֵּיהִנֹּם כִּפְלַיִם יוֹתֵר מִכֶּם׃ טז אוֹי לָכֶם מְנַהֲלִים עִוְרִים הָאֹמְרִים כִּי יִשָּׁבַע אִישׁ בַּהֵיכָל אֵין-דָּבָר וְכִי יִשָּׁבַע בִּזְהַב הַהֵיכָל שְׁבוּעָתוֹ עָלָיו׃ יז סְכָלִים וְעִוְרִים מָה הוּא הַגָּדוֹל הַזָּהָב אוֹ הַהֵיכָל הַמְקַדֵּשׁ אֶת-הַזָּהָב׃ יח וְכִי-יִשָּׁבַע אִישׁ בַּמִּזְבֵּחַ אֵין-דָּבָר וְכִי-יִשָּׁבַע בַּקָּרְבָּן אֲשֶׁר עַל-גַּבּוֹ שְׁבוּעָתוֹ עָלָיו׃ יט עִוְרִים מָה הוּא הַגָּדוֹל הַקָּרְבָּן אוֹ הַמִּזְבֵּחַ הַמְקַדֵּשׁ אֶת-הַקָּרְבָּן׃(שמות ל' כז'-כט'; כט' לט') כ לָכֵן הַנִּשְׁבָּע בַּמִּזְבֵּחַ נִשְׁבַּע בּוֹ וּבְכָל אֲשֶׁר עַל-גַּבּוֹ׃ כא וְהַנִּשְׁבָּע בַּהֵיכָל נִשְׁבַּע בּוֹ וּבַשֹּׁכֵן בּוֹ׃ כב וְהַנִּשְׁבָּע בַּשָּׁמָיִם נִשְׁבַּע בְּכִסֵּא אֱלֹהִים וּבַיֹּשֵׁב עָלָיו׃ כג אוֹי לָכֶם סוֹפְרִים וּפְרוּשִׁים חֲנֵפִים כִּי תְעַשְּׂרוּ אֶת-הַמִּנְתָּא וְאֶת-הַשֶּׁבֶת וְאֶת-הַכַּמֹּן (ויקרא כז' ל') וְתַעַזְבוּ אֶת-הַנִּכְבָּדוֹת בַּתּוֹרָה אֶת-הַמִּשְׁפָּט אֶת-הַחֶסֶד וְאֶת-הָאֱמוּנָה (זכריה ז' ט') אֵלֶּה עֲלֵיכֶם לַעֲשׂוֹת וְאֶת-אֵלֶּה אַל-תַּעֲזֹבוּ׃ כד מְנַהֲלִים עִוְרִים הַמְסַנְּנִים אֶת-הַיַּתּוּשׁ וּבֹלְעִים אֶת-הַגָּמָל׃ כה אוֹי לָכֶם סוֹפְרִים וּפְרוּשִׁים חֲנֵפִים הַמְטַהֲרִים אֶת-הַכּוֹס וְאֶת-הַקְּעָרָה מִחוּץ וּמִבִּפְנִים מְלֵאוֹת הֵן עֹשֶׁק וְעַוְלָה׃ כו פָּרוּשׁ עִוֵּר טַהֵר רִאשֹׁנָה אֶת-הַכּוֹס וְאֶת-הַקְּעָרָה מִבִּפְנִים וְאָז תִּטְהַרְנָה גַּם-מִחוּץ׃ כז אוֹי לָכֶם סוֹפְרִים וּפְרוּשִׁים חֲנֵפִים הַדֹּמִים לִקְבָרִים מְלֻבָּנִים בַּשִּׂיד הַנִּרְאִים יָפִים מִחוּץ וּמִבִּפְנִים מְלֵאִים הֵם עַצְמוֹת אָדָם וְכָל-טֻמְאָה׃ כח כֵּן נִרְאִים גַּם-אַתֶּם מִחוּץ כְּצַדִּיקִים לְעֵינֵי אֲנָשִׁים וּמִבִּפְנִים הִנְּכֶם מְלֵאִים חֹנֶף וָאָוֶן׃ כט אוֹי לָכֶם סוֹפְרִים וּפְרוּשִׁים חֲנֵפִים הַבֹּנִים אֶת-קִבְרֵי הַנְּבִיאִים וְאֶת-מַצְּבוֹת קְבֻרַת הַצַּדִּיקִים תְּפָאֵרוּן׃ ל וְתֹאמְרוּן אִם-הָיִינוּ בִימֵי אֲבוֹתֵינוּ לֹא-הָיְתָה יָדֵנוּ עִמָּהֶם לִשְׁפֹּךְ דַּם-הַנְּבִיאִים׃ לא עַל-כֵּן עֵדִים אַתֶּם בָּכֶם כִּי-בָנִים הִנְּכֶם לַאֲשֶׁר הָרְגוּ אֶת-הַנְּבִיאִים׃ לב וְגַם-אַתֶּם מַלְאוּ כַּיּוֹם אֶת-מִדַּת אֲבוֹתֵיכֶם׃ לג נְחָשִׁים יִלְדֵי צִפְעֹנִים אֵיכָה תִנָּצְלוּ מִדִּין גֵּיהִנֹּם׃ לד עַל-כֵּן הִנְנִי שֹׁלֵחַ אֲלֵיכֶם נְבִיאִים חֲכָמִים וְסוֹפְרִים וּמֵהֶם תַּהַרְגוּ וְתִצְלְבוּ וּמֵהֶם תְּיַסְּרוּ בְּבָתֵּי הַכְּנֵסֶת אֲשֶׁר לָכֶם וְתִרְדְּפוּם מֵעִיר לָעִיר׃ לה לְבַעֲבוּר יָבֹא עֲלֵיכֶם כָּל-דָּם נָקִי הַשָּׁפוּךְ עַל-הָאָרֶץ מִדַּם-הֶבֶל הַצַּדִּיק (בראשית ד' ח') עַד-דַּם זְכַרְיָה בֶן-בֶּרֶכְיָה אֲשֶׁר הֲרַגְתֶּם אֹתוֹ בֵּין הַהֵיכָל וְלַמִּזְבֵּחַ׃(דברי הימים ב', כד' כ'-כב') לו אָמֵן אֲנִי אֹמֵר לָכֶם כִּי כָּל-אֵלֶּה יָבֹאוּ עַל-הַדּוֹר הַזֶּה׃ לז יְרוּשָׁלַיִם יְרוּשָׁלַיִם הַהֹרֶגֶת אֶת-הַנְּבִיאִים וְהַסֹּקֶלֶת אֶת-הַשְּׁלוּחִים אֵלָיִךְ (נחמיה ט' כו') עַד-כַּמֶּה פְּעָמִים חָפַצְתִּי לְקַבֵּץ אֶת-בָּנַיִךְ כַּאֲשֶׁר תְּקַבֵּץ תַּרְנְגֹלֶת אֶת-אֶפְרֹחֶיהָ תַּחַת כְּנָפֶיהָ וְלֹא אֲבִיתֶם׃(ישעיהו סה' ב') לח הִנֵּה בֵיתְכֶם יִשָּׁאֵר לָכֶם חָרְבָּה׃(מלכים ב', ט' ז'-ח') לט כִּי אֲנִי אֹמֵר לָכֶם לֹא תִרְאוּנִי עוֹד מִן-הַיּוֹם הַזֶּה עַד כִּי-תֹאמְרוּן בָּרוּךְ הַבָּא בְּשֵׁם יְהוָֹה׃(תהילים קיח' כו')