ה א לָכֵן אַחֲרֵי אֱלֹהֵיכֶם תֵּלֵכוּ כְּבָנִים אֲהוּבִים׃ ב וּבְאַהְבָה תָּכִינוּ צְעָדֵיכֶם כַּאֲשֶׁר גַּם-הַמָּשִׁיחַ אָהַב אֹתָנוּ וַיִּתֵּן אֶת-נַפְשׁוֹ תַּחַת נַפְשֵׁנוּ לְקָרְבָּן וָזֶבַח לְרֵיחַ נִיחֹחַ לֵאלֹהִים׃(בראשית ח' כא'; ויקרא א' ט') ג אַךְ זְנוּת וְכָל-זִמָּה וּבֶצַע לֹא יִשָּׁמַע עַל-פִּיכֶם כַּאֲשֶׁר נָכוֹן לְאַנְשֵׁי קֹדֶשׁ׃ ד וְכֵן לֹא דִבְרֵי נְבָלָה וְלֹא הוֹלֵלוֹת וְתָהֳלָה אֲשֶׁר לֹא לְתִפְאֶרֶת לָכֶם כִּי אִם-אִמְרֵי תְהִלָּה׃ ה כִּי-זֹאת יָדֹע תֵּדְעוּ כִּי כָּל-אִישׁ זֹנֶה וְטַמֵא אוֹ אֹהֵב בֶּצַע מַעֲשַׁקּוֹת אֲשֶׁר הוּא כְּעֹבֵד אֱלִילִים אֵין לָהֶם נַחֲלָה בְּמַלְכוּת מְשִׁיחֵנוּ וֵאלֹהֵינוּ׃ ו אַל-תִּתְּנוּ לִבְּכֶם לִשְׁגּוֹת בְּדִבְרֵי מַהְבִּלִים כִּי בִגְלַל-זֶה יְשַׁלַּח אֱלֹהִים חֲרוֹן אַפּוֹ בְּבָנִים סוֹרְרִים׃ ז עַל-כֵּן לֹא תִהְיוּ חֲבֵרִים לָהֶם׃(תהילים א' א') ח כִּי-חֲשֵׁכָה הֱיִיתֶם לְפָנִים וְעַתָּה נֶהְפַּכְתֶּם לְאוֹרָה בַּאֲדֹנֵינוּ הִתְהַלְּכוּ-נָא כִּבְנֵי-אוֹר׃ ט וְזֶה פְּרִי הָרוּחַ הוּא עֲשׂוֹת חֶסֶד לַכֹּל וְצֶדֶק וֶאֱמֶת׃ י וּבָחוֹן מַה-יִּיטַב בְּעֵינֵי אֲדֹנֵינוּ׃ יא וְאַל-תִּתְעָרְבוּ בְּמַעַלֲלֵי רִיק וְחֹשֶׁךְ כִּי אִם-הוֹכֵחַ תּוֹכִיחוּן אֹתָם׃ יב כִּי אֶת-אֲשֶׁר הֵם עֹשִׂים בַּמַּחְשָׁךְ חֶרְפָּה הִיא לְסַפֵּר׃ יג אַךְ כַּאֲשֶׁר יִוָּכְחוּ אָז יִגָּלוּ לָאוֹר מָה הֵם לָאוֹר הַמְגַלֶּה אֹתָם׃ יד וְעַל-זֶה נֶאֱמַר קוּם לְךָ נִרְדָּם הָקִיצָה מִן-הַמֵּתִים (תהילים נז' ט') וְהַמָּשִׁיחַ יִזְרַח עָלֶיךָ׃ טו וְעַתָּה תָּשִׂימוּ עַיִן עַל-דַּרְכֵיכֶם לְהֵיטִיב לֶכֶת וְלֹא כֶאֱוִילִים כִּי אִם-כַּחֲכָמִים׃ טז דִּי עִדָּנָא זָבְנִין בַּעֲבוּר כִּי רָעִים הַיָּמִים׃ יז וְלֹא תִהְיוּ חַסְרֵי לֵב כִּי אִם-תַּשְׁכִּילוּ לָדַעַת מַה חֵפֶץ אֲדֹנֵינוּ׃ יח וְאַל-תִּסְבְּאוּ יַיִן אֲשֶׁר רוּחַ עִוְעִים בְּקִרְבּוֹ רַק הִמָּלְאוּ רוּחַ עֶלְיוֹן׃ יט וְאִמְרוּ בְנַפְשְׁכֶם תְּהִלּוֹת וְשִׁירוֹת וְזִמְרוֹת יָהּ שִׁירוּ וְזַמְּרוּ בִלְבַבְכֶם לַיהוָֹה׃(תהילים ל' ה'; לד' ב') כ וְעַל-הַכֹּל הוֹדוּ לֵאלֹהֵינוּ אָבִינוּ תָּמִיד בְּשֵׁם יֵשׁוּעַ הַמָּשִׁיחַ אֲדֹנֵינוּ׃ כא הִכָּנְעוּ אִישׁ מִפְּנֵי אָחִיו בְּיִרְאַת אֱלֹהִים׃ כב וְהַנָּשִׁים נִכְנָעוֹת תִּהְיֶינָה מִפְּנֵי בַעֲלֵיהֶן כְּמוֹ מִפְּנֵי הָאָדוֹן׃ כג כִּי הַבַּעַל הוּא-רֹאשׁ הָאִשָּׁה כְּמוֹ גַם-הַמָּשִׁיחַ רֹאשׁ הָעֵדָה וְהוּא הַמוֹשִׁיעַ לִגְוִיָּתוֹ׃ כד אַךְ כַּאֲשֶׁר נִכְנַעַת הָעֵדָה מִלִּפְנֵי מְשִׁיחָהּ כֵּן גַּם-הַנָּשִׁים תִּכָּנַעְנָה מִלִּפְנֵי בַעֲלֵיהֶן בְּכָל-אָרְחוֹתָן׃ כה וְאַתֶּם אֲנָשִׁים אֶהֱבוּ אֶת-נְשֵׁיכֶם כַּאֲשֶׁר גַּם-הַמָּשִׁיחַ אֶת-עֲדָתוֹ אָהֵב וַיִּתֵּן אֶת-נַפְשׁוֹ תַּחַת נַפְשָׁהּ׃ כו לְמַעַן יְקַדְּשֶׁנָּה בִדְבָרוֹ אַחֲרֵי אֲשֶׁר-רָחַץ אֹתָהּ בְּמִקְוֵה מָיִם׃ כז לְהָקִים לוֹ עֵדָה נִכְבָּדָה בָּרָה וּתְמִימָה מִבְּלִי בַהֶרֶת אוֹ פְּחֶתֶת וְכָל-מוּם אֵין בָּהּ׃ כח כֵּן הַמִּצְוָה עַל-הָאֲנָשִׁי לְאַהֲבָה אֶת-נְשֵׁיהֶם כְּגוּפָם כִּי הָאֹהֵב אֶת-אִשְׁתּוֹ הוּא אֹהֵב אֶת-עַצְמוֹ וְאֶת-בְּשָׂרוֹ׃ כט כִּי מֵעוֹלָם לֹא-שָׂנֵא אִישׁ אֶת-בְּשָׂרוֹ רַק מְכַלְכֵּל וּמְפַנֵּק אֹתוֹ כַּאֲשֶׁר גַּם-הַמָּשִׁיחַ אֶת-עֲדָתוֹ׃ ל כִּי-אֵבָרֵי גוּפוֹ אֲנָחְנוּ מִבְּשָׂרוֹ וּמֵעֲצָמָיו׃(בראשית ב' כג') לא עַל-כֵּן יַעֲזָב-אִישׁ אֶת-אָבִיו וְאֶת-אִמּוֹ וְדָבַק בְּאִשְׁתּוֹ וְהָיוּ שְׁנֵיהֶם לְבָשָׂר אֶחָד׃(בראשית ב' כד') לב גָּדוֹל הַסּוֹד הַזֶּה וַאֲנִי מְדַבֵּר עַל-הַמָּשִׁיחַ וְעַל-עֲדָתוֹ׃ לג אַךְ גַּם-אַתֶּם אִישׁ אִישׁ מִכֶּם יֶאֱהַב אֶת-אִשְׁתּוֹ כְּנַפְשׁוֹ וְהָאִשָּׁה אֶת-בַּעְלָהּ תִּירָא׃