ד א וַאֲנִי אֲסִיר הָאָדוֹן אֶפְצַר בָּכֶם לָלֶכֶת כְּנָאוָה לְמַצַּב הַקְּרֻאִים כָּמוֹכֶם׃ ב בְּהַצְנֵעַ וַעֲנָוָה בְּאֹרֶךְ אַפָּיִם וְלָשֵׂאת אִישׁ אֶת-רֵעֵהוּ בְּאַהֲבָה׃ ג לִשְׁקֹד וְלִשְׁמֹר לְיַחֵד רוּחֲכֶם בְּמַחְבֶּרֶת הַשָּׁלוֹם׃ ד לִהְיוֹת כְּאֵבָרִים בְּגוּף אֶחָד וּבְרוּחַ אֶחָד כַּאֲשֶׁר גַּם-נִקְרַאתֶם לְמַצַּבְכֶם בְּתִקְוָה אֶחָת׃ ה אָדוֹן אֶחָד אֱמוּנָה אַחַת וּטְבִילָה אֶחָת׃ ו אֵל אֶחָד וַאֲבִי-כֹל אֲשֶׁר הוּא עַל-כֹּל וְעִם-כֹּל וּבְתוֹךְ כֻּלְכֶם׃ ז אַךְ לְאִישׁ אִישׁ מִמֶּנּוּ חֻלַּק מְנָת חָסֶד כְּמִדַּת מַתְּנַת הַמָּשִׁיחַ׃ ח עַל-כֵּן הוּא אֹמֵר עָלָה לַמָּרוֹם שָׁבָה שֶׁבִי וַיִּתֵּן מַתָּנוֹת לָאָדָם׃(תהילים סח' יט') ט וְכִי נֹאמַר כִּי-עָלָה אֵין זֶה כִּי אִם-יָרַד בָּרִאשֹׁנָה לְתַחְתִּיּוֹת אָרֶץ׃ י הַיֹּרֵד הוּא הָעֹלֶה לְמַעְלָה מִכָּל-שְׁמֵי מָרוֹם לְמַלֵּא אֶת-הַכֹּל׃(ירמיהו כג' כד') יא וְהוּא נָתַן אֶת-אֵלֶּה לִהְיוֹת שְׁלִיחִים וְאֶת-אֵלֶּה נְבִיאִים וְאֶת-אֵלֶּה מְבַשְּׂרִים וְאֶת-אֵלֶּה רֹעִים וּמוֹרִים׃ יב לְהַשְׁלִים אֶת-הַקְּדֹשִׁים לִמְלֶאכֶת עֲבֹדַת הַקֹּדֶשׁ לְמַעַן יִבָּנֶה גּוּף הַמָּשִׁיחַ׃ יג עַד אֲשֶׁר כֻּלָּנוּ נָבוֹא לְיַחֵד לְבָבֵנוּ בֶּאֱמוּנָה אַחַת וּבְדַעַת בֶּן-הָאֱלֹהִים וְהָיִינוּ לְאָדָם שָׁלֵם בַּמִּדָּה כִּמְלֹא קוֹמַת הַמָשִׁיחַ׃ יד לְבִלְתִּי נִהְיֶה עוֹד עוֹלֲלִים נִדָּפִים וְנִגְרָשִׁים מִפְּנֵי כָל-רוּחַ בְּתוֹרַת אֲנָשִׁים וְתַרְמִיתָם אֲשֶׁר בְּנִכְלֵיהֶם יָצוּדוּ חֵרֶם׃ טו כִּי אִם-נַחֲזִיק בָּאֱמֶת מֵאַהֲבָה וְהָלַכְנוּ הָלוֹךְ וְגָדוֹל לִפְנֵי הַמָּשִׁיחַ אֲשֶׁר הוּא הָרֹאשׁ׃ טז וּבוֹ מֻדְבָּק וּמְקֻשָּׁר כָּל-הַגּוּף עִם כָּל-פְּרָקָיו וַחֲלָקָיו אֶל-נָכוֹן אֲשֶׁר בְּאַהֲבָה יַעַבְדוּן לְהַגְדִּילוֹ וּלְהַאֲדִירוֹ כְּדֵי כֹחָם׃ יז וְעַתָּה הַעִדֹתִי בָכֶם לִפְנֵי הָאָדוֹן לֵאמֹר אַל-תֵּלְכוּ כְּיֶתֶר הַגּוֹיִם אֲשֶׁר אַחֲרֵי הַבְלֵי שָׁוְא לִבָּם הֹלֵךְ׃ יח מְאוֹר דַּעְתָּם חָשַׁךְ וְחַיֵּי אֱלֹהִים מוּזָרִים לָהֶם עֵקֶב אֲשֶׁר הִקְשׁוּ רוּחָם בְּאִוַּלְתָּם׃ יט הֵם אֲשֶׁר טָפַשׁ לִבָּם וַיִּתְמַכְּרוּ לַעֲשׂוֹת כָּל-נְבָלָה וְתוֹעֵבָה וְלֹא יֵדְעוּ שָׂבְעָה׃ כ וְאַתֶּם לֹא כָזֹאת לְמַדְתֶּם דַּרְכֵי הַמָּשִׁיח׃ כא אִם רַק מַקְשִׁיבִים הֱיִיתֶם לְקוֹלוֹ וְלִמּוּדֵי דְבָרוֹ אַתֶּם כִּי הֵם אֱמֶת בִּפְנֵי יֵשׁוּעַ׃(תהילים מה' ה') כב וְעֵן עֲזַבְתֶּם דַּרְכֵיכֶם הָרִאשֹׁנִים עַד-לְהָסִיר מֵעֲלֵיכֶם אֶת-הָאָדָם הַקַּדְמֹנִי הַנִּשְׁחָת וְהַנִּתְעֶה בְּתַאֲוָתוֹ׃ כג לְהִתְחַדֵּשׁ בְּרוּחַ חֲדָשָׁה בְּקֶרֶב לִבְּכֶם׃ כד וְלִלְבּשׁ אֶת-הָאָדָם הֶחָדָשׁ הַנִּבְרָא בְצֶדֶק וּבְקֹדֶשׁ בֶּאֱמֶת כְּלֵב הָאֱלֹהִים׃ כה עַל-כֵּן הַרְחִיקוּ שֶׁקֶר מִכֶּם וְדַבְּרוּ אֱמֶת אִישׁ אֶת-רֵעוֹ (זכריה ח' טז') כִּי אֵבָרִים אֲנַחְנוּ אִישׁ לְאָחִיו׃ כו רִגְזוּ וְאַל-תֶּחֱטָאוּ (תהילים ד' ה') וְלֹא תָבוֹא הַשֶּׁמֶשׁ בְּעוֹד רֹגֶז בְּאַפְּכֶם׃(דברים כד' טו') כז פֶּן-תִּתְּנוּ מָקוֹם לַשָּׂטָן׃ כח מִי שֶׁגָּנַב אַל-יֹסֵף לִגְנֹב עוֹד כִּי אִם-יַעֲמֹל לַעֲשׂוֹת טוֹב בְּיָדָיו לִהְיוֹת לוֹ לָתֵת לָאֶבְיוֹן׃ כט כָּל-דְּבַר בְּלִיַּעַל לֹא-יֵצֵא מִפִּיכֶם כִּי אִם-דְּבָרִים טוֹבִים וּנְכֹחִים לְהָשִׁיב נֶפֶשׁ וְלָתֶת-חֵן לְשֹׁמְעֵיהֶם׃ ל וְאַל-תְּעַצְּבוּ אֶת-רוּחַ הַקֹּדֶשׁ הוּא רוּחַ הָאֱלֹהִים אֲשֶׁר בּוֹ נֶחְתָּמִים אַתֶּם עַד יוֹם הַגְּאֻלָּה׃ לא וְהַרְחִיקוּ מִכֶּם כָּל-מְרִירוּת לֵב וַחֲרוֹן אָף רֹגֶז וּתְלוּנָּה וּנְאָצָה עִם כָּל-דָּבָר רָע׃ לב אֲבָל חֹנְנִים תִּהְיוּ זֶה לָזֶה מְרַחֲמִים וְסַלָּחִים אִישׁ לְאָחִיו כַּאֲשֶׁר גַּם-הָאֱלֹהִים סָלַח לָכֶם בַּמָּשִׁיחַ׃