ד א לָכֵן אֲנִי נֶגֶד פְּנֵי אֱלֹהִים וְנֶגֶד פְּנֵי יֵשׁוּעַ הַמָּשִׁיחַ אֲדוֹנֵינוּ אֲשֶׁר יִשְׁפֹּט אֶת-הַחַיִּים וְאֶת-הַמֵּתִים כַּאֲשֶׁר יִגָּלֶה בְמַלְכוּתוֹ הִנְנִי מְצַוְּךָ הַיּוֹם לֵאמֹר׃ ב קְרָא אֶת-דְּבַר בְּשׁרָתוֹ וְלֹא תֶחְדַּל מִקְּרֹא גַּם-בְּעִתּוֹ וְגַם בְּלֹא עִתּוֹ וּבְכָל-אֹרֶךְ רוּחֲךָ הוֹכֵחַ תּוֹכִיחַ וְתִגְעַר וְתַזְהֵר לְפִי כָל-דִּבְרֵי הַתּוֹרָה׃ ג כִּי-יָמִים יָבוֹאוּ אֲשֶׁר לֹא-יָכִילוּ בְנֵי-אָדָם תּוֹרַת חַיִּים כִּי אָזְנֵיהֶם הֻכּוּ בֶחָרֶס וַהֲמוֹן מוֹרִים יִצְבְּרוּ לָהֶם בְּאַוָּתָם לְהִתְגָּרֶד-בָּם׃ ד מִן-הָאֱמֶת יָסִירוּ אָזְנָם לְהַטּוֹת אַחֲרֵי מִשְׁלִי שָׁוְא׃ ה אֲבָל אַתָּה עֲמֹד עַל-מִשְׁמַרְתֶּךָ הִתְעַנֶּה תַּחַת יְדֵי הָרָעָה עֲשֵׂה מְלֶאכֶת הַמְבַשֵּׂר וְכַלֵּה אֶת-עֲבֹדָתֶךָ׃ ו וַאֲנִי נְכוֹנָה נַפְשִׁי לְהִשְׁתַּפֵּךְ עֲלֵי-זָבַח וְעֵת חֲלִיפָתִי בָּאָה׃ ז מִלְחֶמֶת צֶדֶק נִלְחָמְתִּי אֶת-מְרוּצָתִי הִשְׁלַמְתִּי וְאֶת-הָאֱמוּנָה נָצָרְתִּי׃ ח וּלְמִן-הַיּוֹם הַזֶּה צָפוּן לִי כֶּתֶר הַצְּדָקָה אֲשֶׁר בַּיּוֹם הַהוּא יִתֶּן-לִי הָאָדוֹן שֹׁפֵט צֶדֶק (תהילים ט' ה') וְלֹא-לִי לְבַדִּי כִּי אִם-גַּם לְכָל-הַחֲפֵצִים בְּהִתְגַּלּוֹתוֹ׃ ט חוּשָׁה וּבֹאָה אֵלַי עַד-מְהֵרָה׃ י דִּימָס עֲזָבַנִי כִּי אָהַב אֶת-הָעוֹלָם הַזֶּה וַיֵּלֶךְ-לוֹ לְתַסְלוֹנִיקִי קְרִיסְקִיס לְגָלַטְיָא וְטִיטוֹס לְדַלְמָטְיָא׃ יא וְלוּקָס לְבַדּוֹ נִשְׁאָר עִמִּי קְחָה-נָּא אֶת-מַרְקוֹס וַהֲבִיאֵהוּ עִמְּךָ לַעְזָר-לִי בַּעֲבֹדָתִי׃ יב אֶת-טוּכִיקוֹס שָׁלַחְתִּי לְאֶפְסוֹס׃ יג הָבֵא-נָא אִתְּךָ אֶת-מְעִילִי אֲשֶׁר עָזַבְתִּי בִטְרוֹאַס תַּחַת יְדֵי קַרְפּוֹס וְגַם אֶת-הַסְּפָרִים אַךְ אֶת-הַקְּלָפִים בְּרֹאשָׁם׃ יד אֲלֶכְסַנְדְּרוֹס חָרַשׁ הַנְּחשֶׁת עָשָׂה לִי רָעוֹת רַבּוֹת יְשַׁלֶּם-לוֹ יְהוָֹה כְּמַעֲשֵׂהוּ׃(שמואל ב', ג' לט'; תהילים כח' ד') טו וְגַם-אַתָּה הִשְׁתַּמֵר מִפָּנָיו כִּי הוּא הִתְיַצֵּב בְּפָנַי לַמְרוֹת וּלְהָפֵר דְּבָרֵינוּ׃ טז כַּאֲשֶׁר בָּאתִי לְהִצְטַדֵּק בַּפַּעַם הָרִאשֹׁנָה לֹא-עַמַד אִישׁ אִתִּי כִּי-כֻלָּם עֲזָבוּנִי אַל-יֵחָשֵׁב לָהֶם לְעָוֹן׃ יז אֲבָל הָאָדוֹן הָיָה בְעֶזְרִי וַיְחַזְּקֵנִי לְמַעַן תִּקָּרֵא הַבְּשׁרָה עַל-פִּי וְיִשְׁמְעוּ כָל-הַגּוֹיִם וְגַם-בְּעֶזְרָתוֹ מִפִּי אַרְיֵה נִצָּלְתִּי׃(תהילים כב' כב'; דניאל ו' כח') יח כֵּן יַצִּילֵנִי הָאָדוֹן מִכָּל-רָע (תהילים קכא' ז'; ירמיהו טו' כ'-כא') וְיוֹשִׁיעֵנִי לָבוֹא אֶל-מַלְכוּת שָׁמָיִם וְלוֹ אֶתֵּן כָּבוֹד לְעוֹלָם וָעֶד אָמֵן׃ יט שְׁאַל לִשְׁלוֹם פְּרִיסְקָה וַעֲקִילָס וּבֵית אֳנִיסִיפוֹרוֹס׃ כ אֲרַסְטוֹס נִשְׁאַר בְּקוֹרִנְתּוֹס וְאֶת-טְרוֹפִימוֹס הִנַּחְתִּי בְּמִילֵטוֹס כִּי חֹלֶה הוּא׃ כא מַהֵר וָבֹא אֵלַי לִפְנֵי יְמוֹת הַחֹרֶף אֶוְבוּלוֹס וּפוּדִיס וְלִינוֹס וּקְלוֹדְיָה וְכָל-אַחֵינוּ שֹׁאֲלִים לִשְׁלוֹמֶךָ׃ כב אֲדֹנֵינוּ יֵשׁוּעַ הַמָּשִׁיחַ עִם-רוּחֶךָ וְחַסְדּוֹ עִמָּכֶם אָמֵן׃