ג א וְעַתָּה דַּע-לְךָ כִּי דֹרוֹת יִוָּלְדוּ בְּאַחֲרִית הַיָּמִים עַד-לְהַשְׁחִית׃ ב כִּי-יָקוּמוּ אֲנָשִׁים אֹהֲבֵי עַצְמָם רֹדְפֵי בֶצַע מַרְחִיבֵי פֶה וְעֵינַיִם רָמוֹת דֹּבְרֵי סָרָה מַמְרִים לְיֹלְדֵיהֶם חֶסֶד לֹא יַכִּירוּ וְכָל-קֹדֶשׁ יְחַלֵּלוּן׃ ג חַסְרֵי רַחֲמִים מְפִירֵי בְרִית וּמְלָשְׁנִים זוֹלְלִים אַכְזָרִים וְשׁנְאֵי כָל-טוֹב׃ ד מֹסְרִים פֹּחֲזִים וְזֵדִים רֹדְפִים לְהִתְעַנֵּג בְּתַעֲנוּגִים מֵהִתְעַנֵּג בֵּאלֹהִים׃ ה וְהֵם פָּנִים לָהֶם כִּדְמוּת יִרְאַת שָׁמַיִם אַךְ מִכֹּחָהּ אֵין בְּקִרְבָּם וְעַל-כֵּן הַרְחֵק נַפְשְׁךָ מֵהֶם׃ ו כִּי-מֵהֶם הֵם הַזֹּחֲלִים לָבוֹא אֶל-הַבָּתִּים לְנַהֵג כִּשְׁבֻיּוֹת חֶרֶב נָשִׁים סָרוֹת טַעַם מְלֵאוֹת עָוֹן וְנַפְשָׁן שׁוֹקֵקָה לְכָל-תְּשׁוּקָה׃ ז הֵן הֵנָּה הַלֹּמְדוֹת תָּמִיד וְלָדַעַת אֶת-הָאֱמֶת אֵין לְאֵל יָדָן׃ ח כִּי-כְמוֹ יַנִּיס וְיַמְבְּרִיס הִתְיַצְּבוּ בִּפְנֵי משֶׁה כֵּן גַּם-אֵלֶּה מִתְיַצְּבִים בִּפְנֵי הָאֱמֶת בָּנִים מַשְׁחִיתִים בְּדַעַת וּנְלוֹזִים בָּאֱמוּנָה׃(שמות ז' יא'-יב') ט אַךְ חֶפְצָם לֹא יִצְלַח עוֹד בְּיָדָם כִּי תִגָּלֶה נַבְלֻתָם לְעֵינֵי-כֹל כַּאֲשֶׁר קָרָה גַּם-לַאֲנָשִׁים הָהֵם׃(שמות ח' יד') י וְאַתָּה הָלַכְתָּ בְעִקְּבוֹתַי בְּמַעְגְּלֵי תוֹרָתִי בַּהֲלִיכוֹת חַיַּי וּבִמְגַמַּת פָּנָי בֶּאֱמוּנָתִי בְּאֹרֶךְ רוּחִי בְּאַהֲבָתִי וּבְסִבְלוּת נַפְשִׁי׃ יא וּבִרְדִיפוֹת וּבְצָרוֹת אֲשֶׁר יָדַעְתָּ כִּי אֲפָפוּנִי בְּאַנְטְיוֹכְיָא בְּאִקּוֹנְיָא וּבְלוּסְטְרָא כִּי-שָׁם נִרְדַּפְתִּי עַל-צַוָּארִי עַד אֲשֶׁר-הִצִּילַנִי הָאָדוֹן מִכָּל-רֹדְפָי׃ יב כִּי הֲלֹא כֻלָּם הַחֲפֵצִים בְּחַיֵּי יִרְאַת שָׁמַיִם בְּיֵשׁוּעַ הַמָּשִׁיחַ נִרְדָּפִים הֵמָּה׃ יג אַךְ אֲנָשִׁים רָעִים וְקֹסְמִים כֵּן יָרֵעוּ וְכֵן יַשְׁחִיתוּ מַתְעִים הֵם וְנִתְעִים׃ יד אֳבָל אַתָּה שְׁמֹר אֶת-אֲשֶׁר לָמַדְתָּ וְהִשְׂכַּלְתָּ אֶל-נָכוֹן כִּי יָדַעְתָּ מִי-הוּא אֲשֶׁר מִפִּיו לָמָדְתָּ׃ טו וְכִי-מִנְּעֻרֶיךָ יָדַעְתָּ אֶת-כִּתְבֵי הַקֹּדֶשׁ אֲשֶׁר עַל-יָדָם תַּשְׂכִּיל לְהִוָּשַׁע בֶּאֱמוּנַת יֵשׁוּעַ הַמָּשִׁיחַ׃(תהילים עא' יז') טז כָּל-כִּתְבֵי הַקֹּדֶשׁ עַל-פִּי רוּחַ אֱלֹהִים הֵמָּה וּנְכֹנִים לְהוֹרֹת וּלְהוֹכִיחַ לְהָשִׁיב נֶפֶשׁ וּלְיַשֵּׁר בְּמַעְגְּלֵי צֶדֶק׃ יז וְעַל-פִּיהֶם שָׁלֵם יִהְיֶה אִישׁ הָאֱלֹהִים וְנָכוֹן לְכָל-מַעֲשֶׂה טּוֹב׃