ד א וּמַה-נֹּאמַר עַל-אַבְרָהָם אָבִינוּ מַה-יִּתְרוֹן מָצָא בְּמַעֲשֵׂהוּ׃ ב כִּי לוּ-נִצְדַּק אַבְרָהָם בְּמַעֲשָׂיו נָאוָה-לוֹ תְהִלָּה אַךְ-לֹא לִפְנֵי אֱלֹהִים׃ ג כִּי מַה-דְּבַר הַתּוֹרָה וְהֶאֱמִן אַבְרָהָם בֵּאלֹהִים וַיַּחְשְׁבֶהָ לּוֹ צְדָקָה׃(בראשית טו' ו') ד וּלְאִישׁ אֲשֶׁר מַעֲשֵׂהוּ בְיָדוֹ לֹא יֵחָשֵׁב שְׂכָרוֹ כְּמַתְּנַת חִנָּם כִּי אִם-כְּשִׁלֻּמַת חוֹב׃ ה אַךְ אִישׁ אֲשֶׁר מַעֲשֵׂה יָדָיו אֵין אִתּוֹ וְהוּא מַאֲמִין בַּמַּצְדִּיק אֶת-הָרָשָׁע עֵקֶב אֱמוּנָתוֹ אֱמוּנָתוֹ זוּ תֵּחָשֵׁב לִצְדָקָה׃ ו כַּאֲשֶׁר גַּם-דָּוִד מְאַשֵּׁר אֶת-הָאָדָם אֲשֶׁר אֱלֹהִים יַצְדִּיקֶנּוּ לֹא עַל-פִּי פָעֳלוֹ׃ ז אַשְׁרֵי נְשׂוּי-פֶּשַׁע כְּסוּי חֲטָאָה׃ ח אַשְׁרֵי אָדָם לֹא-יַחְשֹׁב יְהוָֹה לוֹ עָוֹן׃(תהילים לב' ב') ט וָאשֶׁר הַזֶּה לְמִי לְנִמּוֹלִים אוֹ גַם-לַעֲרֵלִים יַעַן נִקְרָא בָזֶה כִּי אֱמוּנַת אַבְרָהָם נֶחְשְׁבָה לּוֹ לִצְדָקָה׃(***) י וּמָתַי נֶחְשְׁבָה-לּוֹ כֵן אַחֲרֵי הִמֹּלוֹ אוֹ טֶרֶם הִמֹּלוֹ לֹא אַחֲרֵי הִמֹּלוֹ כִּי אִם-טֶרֶם הִמֹּלוֹ׃ יא וְאוֹת בְּרִית הַמּוּלוֹת נָשָׂא לִהְיוֹת לוֹ לְחוֹתַם צִדְקָתוֹ עֵקֶב אֲשֶׁר הֶאֱמִין בְּעוֹדֶנּוּ עָרֵל (בראשית יז' י'-יא') לְמַעַן יִהְיֶה לְאָב לְכָל-הַמַּאֲמִינִים אַף כִּי-הֵם עֲרֵלִים אֲשֶׁר גַּם-אֱמוּנָתָם תֵּחָשֵׁב לָהֶם לִצְדָקָה׃ יב וְהוּא אָב לְנִמּוֹלִים אַךְ-לֹא רַק לְנִמּוֹלִים לְבַדָּם כִּי-אִם-גַּם-לָאֵלֶּה הַהֹלְכִים בְּעִקְּבוֹת אֱמוּנָתוֹ אֲשֶׁר הִתְהַלֵּךְ אַבְרָהָם אָבִינוּ בְּעוֹדֵנוּ עָרֵל׃ יג כִּי לֹא בִגְלַל הַתּוֹרָה בָּאָה הַהַבְטָחָה לְאַבְרָהָם וּלְזַרְעוֹ לִהְיוֹת יוֹרֵשׁ הָאָרֶץ כִּי אִם-בִּגְלַל צִדְקַת אֱמוּנָתוֹ׃(בראשית יח' יח') יד כִּי אִם-בַּעֲלֵי הַתּוֹרָה יוֹרְשִׁים הֵם אֱמוּנָה תִהְיֶה לָרִיק וְהַבְטָחָה לְלֹא-דָבָר׃ טו כִּי מִפְּאַת הַתּוֹרָה יֵצֵא הַקָּצֶף כִּי בַאֲשֶׁר אֵין תּוֹרָה אֵין פָּשַׁע׃ טז עַל-כֵּן בְּדֶרֶךְ אֱמוּנָה תִּמָּצֵא לְמַעַן תִּכּוֹן בְּחֶסֶד וְהַהַבְטָחָה תִהְיֶה נְכוֹנָה לְכָל-הַזָּרַע לֹא לִבְנֵי הַתּוֹרָה לְבַדָּם כִּי-אִם גַּם-לִבְנֵי אֱמוּנַת אַבְרָהָם אֲשֶׁר הוּא אָב לְכֻלָּנוּ׃ יז כַּכָּתוּב כִּי אַב הֲמוֹן גּוֹיִם נְתַתִּיךָ (בראשית יז' ה') לִפְנֵי אֱלֹהִים זֶה בָּטַח בּוֹ לִבּוֹ הַנֹּתֵן חַיִּים לַמֵּתִים וְהַקֹּרֵא לָאַיִן כַּיֵּשׁ׃ יח וְאַף כִּי לֹא נִרְאָה פֶתַח תִּקְוָה הֶחֱזִיק בְּתִקְוָתוֹ לְהִנָּתֵן אַב-הֲמוֹן גּוֹיִם (***) כַּאֲשֶׁר נֶאֱמַר כֹּה יִהְיֶה זַרְעֶךָ׃(בראשית טו' ה') יט וְכַאֲשֶׁר לֹא הִתְרַפָּה בֶאֱמוּנָתוֹ הִבִּיט אֶל-בְּשָׂרוֹ אֲשֶׁר הָיָה כַמֵּת בִּהְיוֹתוֹ כְּבֶן-מְאַת שָׁנָה וְאֶל-רֶחֶם שָׂרָה אֲשֶׁר בָּלָה׃ כ וְרוּחוֹ לֹא נִפְלְגָה בְקִרְבּוֹ מִבְּלִי אֵמֻן בִּדְבַר אֱלֹהִים כִּי אִם-הִתְגַּבֵּר בֶּאֱמוּנָתוֹ וְנָתוֹן כָּבוֹד לֵאלֹהִים׃ כא וְנַפְשׁוֹ יֹדַעַת מְאֹד כִּי תַשִּׂיג יַד אֵל לְמַלֹּאת אֵת אֲשֶׁר דִּבֵּר׃ כב וְעַל-כֵּן נֶחְשְׁבָה לוֹ לִצְדָקָה׃(בראשית טו' ו') כג וְלֹא נִכְתַּב רַק לְמַעֲנוֹ לְבַדּוֹ כִּי לוֹ נֶחְשָׁבָה׃ כד כִּי אִם-גַּם לְמַעֲנֵנוּ אֲשֶׁר כֵּן תֵּחָשֵׁב-לָנוּ הַמַּאֲמִינִים בַּמֵּקִים אֶת-יֵשׁוּעַ אֲדֹנֵינוּ מִן-הַמֵּתִים׃ כה אֲשֶׁר נִמְסַר לַמָּוֶת בִּפְשָׁעֵינוּ (ישעיהו נג' ד'-ה') וְהֻקַּם עָל לִצְדָקָה לָנוּ׃