כ א וָאֵרֶא מַלְאָךְ יוֹרֵד מִן-הַשָּׁמָיִם וּבְיָדוֹ מַפְתֵּחַ הַתְּהוֹם וְרַתֹּק גָּדוֹל׃ ב וַיִּתְפֹּשׂ אֶת-הַתַּנִּין אֶת-הַנָּחָשׁ הַקַּדְמֹנִי הוּא הַשָּׁטָן הַשּׂוֹטֵן (בראשית ג' א'; ג' יד') וַיֶּאְסֹר אֹתוֹ לְאֶלֶף שָׁנִים׃ ג וַיַּשְׁלִיכֵהוּ אֶל-הַתְּהוֹם וַיִּסְגֹּר עָלָיו וַיַּחְתֹּם מֵעַל לַמַּסְגֵּר לְבִלְתִּי יַדִּיחַ עוֹד אֶת-הַגּוֹיִם עַד-תֹּם הַשָּׁנִים אֶלֶף וְאַחֲרֵי-כֵן יֻתַּר לִזְמָן קָטֹן׃ ד וָאֵרֶא כִסְאוֹת עֹמְדִים וְלַיּשְׁבִים עֲלֵיהֶם נִתַּן בְּיָדָם לַעֲשׂוֹת מִשְׁפָּט (דניאל ז' ט'; ז' כב') וְנַפְשׁוֹת כְּרוּתֵי רֹאשׁ לְמַעַן עֵדוּת יֵשׁוּעַ וּלְמַעַן דְּבַר הָאֱלֹהִים אֲשֶׁר לֹא הִשְׁתַּחֲווּ לַחַיָּה וּלְצַלְמָהּ וְלֹא נָתְנוּ אֶת-הַתָּו עַל-מִצְחָם וְיָדָם הֵם קָמוּ וַיִּחְיוּ וַיִּמְלְכוּ עִם-הַמָּשִׁיחַ אֶלֶף שָּׁנִים׃ ה וְיֶתֶר הַמֵּתִים לֹא-קָמוּ לַחַיִּים עַד-תֹּם אֶלֶף הַשָּׁנִים זֹאת הִיא הַתְּקוּמָה הָרִאשֹׁנָה׃ ו אַשְׁרֵי אַנְשֵׁי-קֹדֶשׁ אֲשֶׁר יִקְחוּ חֶלְקָם בַּתְּקוּמָה הָרִאשֹׁנָה הַמָּוֶת לֹא יִשְׁלָט-בָּם שֵׁנִית כִּי כֹהֲנִים יִהְיוּ לֵאלֹהִים וְלִמְשִׁיחוֹ וּמָלְכוּ עִמּוֹ אֶלֶף שָׁנִים׃(ישעיהו סא' ו') ז וְאַחֲרֵי כְלוֹת אֶלֶף הַשָּׁנִים יֻתַּר הַשָּׂטָן מִבֵּית כִּלְאוֹ׃ ח וְיָצָא לְהַדִּיחַ אֶת-הַגּוֹיִם בְּאַרְבַּע כַּנְפוֹת הָאָרֶץ אֶת-גּוֹג וּמָגוֹג (יחזקאל לח' ב'; בראשית י' ב') וּלְהַקְהִילָם לַמִּלְחָמָה קָהָל אֲשֶׁר לֹא יִסָּפֵר כְּחוֹל הַיָּם׃ ט וַיַּעֲלוּ עַל-מֶרְחֲבֵי אָרֶץ וַיָּסֹבּוּ אֶת-מַחֲנֵה הַקְּדוֹשִׁים (דניאל ז' כא') וְאֶת-הָעִיר הַנֶּחֱמָדָה וַתֵּרֶד אֵשׁ מֵאֵת הָאֱלֹהִים מִן-הַשָּׁמַיִם וַתֹּאכַל אֹתָם׃(יחזקאל לח' כב'; לט' ו') י וְהַשָּׂטָן אֲשֶׁר הִדִּיחָם נִדַּח לְיָם בֹּעֵר בְּאֵשׁ וְגָפְרִית אֲשֶׁר-שָׁם הַחַיָּה וּנְבִיא הַשָּׁקֶר לִהְיוֹת מְעֻנִּים שָׁם יוֹמָם וָלַיְלָה עַד-עוֹלְמֵי עוֹלָמִים׃(ישעיהו לד' י') יא וָאֵרֶא כִסֵּא זַךְ וְגָדוֹל וְהַיּשֵׁב עָלָיו אֲשֶׁר אֶרֶץ וְשָׁמַיִם נָדְדוּ מִפָּנָיו וְלֹא-נוֹדַע מְקוֹמָם אַיּוֹ׃(דניאל ז' ט'; ישעיהו ו' א'; לד' ד'; נא' ו') יב וָאֵרֶא אֶת-הַמֵּתִים גְּדוֹלִים עִם-קְטַנִּים עֹמְדִים לִפְנֵי-יְהוָֹה וּסְפָרִים נִפְתָּחִים גַּם-סֵפֶר אַחֵר נִפְתָּח הוּא סֵפֶר הַחַיִּים (דניאל ז' י'; יב' א') וַיִּשָּׁפְטוּ הַמֵּתִים כַּעֲלִילוֹתָם כַּאֲשֶׁר הֵם כְּתוּבִים בַּסְּפָרִים הָהֵם׃(משלי כד' יב'; קוהלת יב' יד') יג וַיִּתֵּן הַיָּם אֶת-הַמֵּתִים אֲשֶׁר בְּתוֹכוֹ וְהַמָּוֶת וְהַשְּׁאוֹל נָתְנוּ אֶת-הַמֵּתִים אֲשֶׁר-בָּם וַיִּשָּׁפְטוּ אִישׁ אִישׁ כְּמַעֲשֵׂהוּ׃ יד וְהַמָּוֶת וְהַשְּׁאוֹל נֶהֶדְפוּ אֶל-תּוֹךְ יָם בֹּעֵר בָּאֵשׁ זֶה הוּא הַמָּוֶת הַשֵּׁנִי הַיָּם הַבֹּעֵר בָּאֵשׁ׃ טו וְכָל-אִישׁ אֲשֶׁר לֹא-נִמְצָא כָתוּב בְּסֵפֶר הַחַיִּים נֶהְדַּף אֶל-תּוֹךְ הַיָּם הַבֹּעֵר בָּאֵשׁ׃(דניאל יב' א'; ז' יא')