טז א וָאֶשְׁמַע קוֹל גָּדוֹל מִן-הַהֵיכָל קֹרֵא אֶל-שִׁבְעַת הַמַּלְאָכִים (ישעיהו סו' ו') לֵאמֹר לְכוּ וְהָרִיקוּ אֶת-שִׁבְעָה הַמִּזְרָקִים הַמְּכִילִים חֲמַת הָאֱלֹהִים עַל-הָאָרֶץ׃(ירמיהו י' כה' ; צפניה ג' ח') ב וַיֵּלֶךְ הָרִאשׁוֹן וַיָּרֶק אֶת-מִזְרָקוֹ עַל-הָאָרֶץ וַיְהִי לִשְׁחִין רָע פֹּרֵחַ בָּאֲנָשִׁים אֲשֶׁר תָּו הַחַיָּה בָּהֶם וְהַמִּשְׁתַּחֲוִים אֶל-צַלְמָהּ׃(שמות ט' ט'; דברים כח' לה') ג וַיָּרֶק הַשֵּׁנִי אֶת-מִזְרָקוֹ אֶל-תּוֹךְ הַיָּם וַיְהִי לְדָם כַּדָּם אֲשֶׁר יָזוּבוּ פְגָרִים מֵתִים וַתָּמָת כָּל-נֶפֶשׁ חַיָּה אֲשֶׁר בַּיָּם׃(שמות ז' כ'-כא') ד וַיָּרֶק הַשְּׁלִישִׁי אֶת-מִזְרָקוֹ עַל-הַנְּהָרוֹת וְעַל-מַעְיְנֵי מָיִם וַיֵּהָפְכוּ לְדָם׃ ה וָאֶשְׁמַע אֶת-מַלְאַךְ הַמַּיִם אֹמֵר צַדִּיק אַתָּה יְהוָֹה הַהוֶֹה וְהָיָה וְיִהְיֶה כִּי-כֵן חָרָצְתָּ׃ ו הֵם שָׁפְכוּ דַם קְדשִׁים וּנְבִיאִים וְאַתָּה הִשְׁקִיתָם דָּם כִּי-כֵן יָאֲתָה לָהֶם׃(תהילים עט' ג'; ישעיהו מט' כו') ז וָאֶשְׁמַע קוֹל מִן-הַמִּזְבֵּחַ אֹמֵר אָמֵן מִשְׁפָּטְךָ יְהוָֹה אֱלֹהִים אֵל שַׁדַּי אֱמֶת וָצֶדֶק׃(תהילים יט' י') ח וְהָרְבִיעִי הֵרִיק אֶת-מִזְרָקוֹ עַל-פְּנֵי הַשָּׁמֶשׁ וַיִנָּתֶן-לוֹ לְלַהֵט אֶת-הָאֲנָשִׁים בָּאֵשׁ׃(מלאכי ג' יט') ט וַיִּצָּרְבוּ הָאֲנָשִׁים בְּלַהַט נוֹרָא מְאֹד וַיְגַדְּפוּ אֶת-שֵׁם אֱלֹהִים הַשַּׁלִּיט עַל-הַמַּגֵּפוֹת הָאֵלֶּה וְלֹא שָׁבוּ לָתֶת-לוֹ כָּבוֹד׃(ירמיהו ה' ג') י וַיָּרֶק הַחֲמִישִׁי אֶת-מִזְרָקוֹ עַל-כִּסֵּא הַחַיָּה וַתֶּחְשַׁךְ מַלְכוּתָהּ (שמות י' כא'-כב') וַיְנַשְּׁכוּ אֶת-לְשׁוֹנָם מֵרֹב כְּאֵבָם׃ יא וַיְגַדְּפוּ אֶת-אֱלֹהֵי הַשָּׁמַיִם (ישעיהו ח' כא') מִפְּנֵי הַמַּכְאוֹב וְהַשְּׁחִין וְלֹא שָׁבוּ מִמַּעֲשֵׂיהֶם׃ יב וַיָּרֶק הַשִּׁשִּׁי אֶת-מִזְרָקוֹ אֶל-תּוֹךְ הַנָּהָר הַגָּדוֹל נְהַר-פְּרָת וַיֶּחֶרְבוּ מֵימָיו לְפַנּוֹת דֶּרֶךְ לִפְנֵי הַמְּלָכִים הַבָּאִים מִמִּזְרַח-שָׁמֶשׁ׃(נחום א' ד') יג וָאֵרֶא שְׁלשָׁה רוּחוֹת טְמֵאִים כְּתַבְנִית צְפַרְדְּעִים יֹצְאִים מִפִּי הַתַּנִּין וּמִפִּי הַחַיָּה וּמִפִּי נְבִיא הַשָּׁקֶר׃ יד כִּי הֵם רוּחוֹת הַשֵּׁדִים הָעֹשִׂים מוֹפְתִים וּבָאִים אֶל-מַלְכֵי אֶרֶץ וְתֵבֵל כֻּלָּה לֶאֱסֹף אֹתָם לְמִלְחָמָה לַיּוֹם הַגָּדוֹל הוּא יוֹם אֱלֹהֵי צְבָאוֹת׃ טו הִנְנִי בָא כְּגַנָּב אַשְׁרֵי הָאִישׁ הַנֵּעוֹר וְאֶת-בְּגָדָיו הוּא נֹצֵר לְבִלְתִּי יֵלֵךְ עָרֹם וְרָאוּ אֶת-עֶרְוָתוֹ׃ טז וְהֵם הִקְהִילוּ אֹתָם אֶל-הַמָּקוֹם אֲשֶׁר הָעִבְרִים יִקְרְאוּ לוֹ הַר מְגִדּוֹ׃ יז וְהַשְּׁבִיעִי הֵרִיק אֶת-מִזְרָקוֹ עַל-פְּנֵי רְקִיעַ הַשָּׁמָיִם וַיֵּצֵא קוֹל גָּדוֹל מִן-הַהֵיכָל הָעֶלְיוֹן מִן-הַכִּסֵּא לֵאמֹר נֶעֱשָׂתָה׃ יח וְהִנֵּה נִשְׁמְעוּ קֹלוֹת וּבְרָקִים וּרְעָמִים וַיְהִי רַעַשׁ גָּדוֹל אֲשֶׁר לֹא-הָיָה כָמֹהוּ לְמִן-הֱיוֹת אָדָם עַל-הָאָרֶץ כִּי גָדֹל הָרַעַשׁ עַד-מְאֹד׃(שמות יט' טז') יט וַתֵּחָלֵק הָעִיר הַגְּדוֹלָה לִשְׁלשָׁה חֲלָקִים עָרֵי הַגּוֹיִם נָפָלוּ וּבָבֶל הַגְּדוֹלָה נִפְקְדָה לִפְנֵי הָאֱלֹהִים לְהַשְׁקוֹתָהּ כּוֹס יֵין חֲמַת אַפּוֹ׃(ישעיהו כא' ט'; ירמיהו כה' טו') כ נָדְדוּ אִיֵּי הַיָּם וְהֶהָרִים נֶעְתְּקוּ מִמְּקוֹמָם וְאֵינָם׃ כא וּמִן-הַשָּׁמַיִם הִמְטִירוּ בָרָד כָּבֵד כְּכִכָּר עַל-רָאשֵׁי הָאֲנָשִׁים (יהושוע י' יא') וַיְגַדְּפוּ הָאֲנָשִׁים אֶת-הָאֱלֹהִים עַל-דְּבַר מַגֵּפַת הַבָּרָד כִּי-כָבְדָה מַכָּתוֹ עַד-מְאֹד׃