ההתגלות ט

ט א וַיִּתְקַע הַמַּלְאָךְ הַחֲמִישִׁי וָאֵרֶא כוֹכָב נֹפֵל מִן-הַשָּׁמַיִם אַרְצָה וַיִּנָּתֶן-לוֹ מַפְתֵּחַ לִבְאֵר הַתְּהוֹם׃(ישעיהו יד' יב') ב וַיִּפְתַּח אֶת-בְּאֵר הַתְּהוֹם וַיַּעַל קִיטֹר מִן-הַבְּאֵר כְּקִיטֹר הַכִּבְשָׁן רַב-מְאֹד (בראשית יט' כח') וַתֶּחְשַׁךְ הַשֶּׁמֶשׁ וּפְנֵי הַשָּׁמַיִם מִקִּיטֹר הַבְּאֵר׃(יואל ב' ב'; ב' י') ג וּמִתּוֹךְ הַקִּיטֹר יָצָא אַרְבֶּה עַל-הָאָרֶץ וְכֹחַ נִתַּן לָהֶם כְּכֹחַ הָעַקְרַבִּים בָּאָרֶץ׃(שמות י' יב') ד וְהֵם צֻוּוּ לְבִלְתִּי שַׁחֵת אֶת-עֵשֶׂב הָאָרֶץ וְלֹא אֶת-הַיָּרָק וְלֹא אֶת-עֵץ הַשָּׂדֶה כִּי אִם-אֶת-הָאֲנָשִׁים לְבַדָּם אֲשֶׁר אֵין-לָהֶם חוֹתַם אֱלֹהִים עַל-הַמֶּצַח׃ ה וְלֹא נִתַּן לָהֶם לַהֲמִיתָם כִּי אִם-רַק לְעַנֹּתָם חֲמִשָּׁה חֳדָשִׁים בְּמַכְאוֹב קָשֶׁה כְּמַכְאוֹב אָדָם אֲשֶׁר הָעַקְרָב יַכֶּנּוּ׃ ו בַּיָּמִים הָהֵם יְבַקְשׁוּ בְנֵי-הָאָדָם אֶת-הַמָּוֶת וְלֹא יִמְצָאֻהוּ יִשְׁאֲלוּ אֶת-נַפְשָׁם לָמוּת וְהַמָּוֶת יִבְרַח מֵהֶם׃(ירמיהו ח' ג') ז וּמַרְאֵה הָאַרְבֶּה כְּמַרְאֵה סוּסִים עֲרוּכִים לְמִלְחָמָה וְעַל-רָאשֵׁיהֶם כְּעַטְרוֹת זָהָב וְכִפְנֵי אֲנָשִׁים פְּנֵיהֶם׃(יואל ב' ד'-ה') ח וְשֵׂעָר לָהֶם כִּשְׂעַר נָשִׁים וְשִׁנֵּיהֶם שִׁנֵּי אֲרָיוֹת׃(יואל א' ו') ט וַעֲלֵיהֶם שִׁרְיֹנִים כְּשִׁרְיֹנֵי בַרְזֶל וְקוֹל כַּנְפֵיהֶם כְּקוֹל מַרְכְּבוֹת הֲמוֹן סוּסִים אֲשֶׁר יְרֻצוּן לַקְּרָב׃ י וּזְנָבוֹת לָהֶם כְּמוֹ עַקְרַבִּים וּבְזַנְבוֹתָם דָּרְבֹנוֹת אֲשֶׁר אוֹנָם בָּם לְעַנּוֹת אֶת-בְּנֵי אָדָם חֲמִשָּׁה חֳדָשִׁים׃ יא וַעֲלֵיהֶם מֶלֶךְ הוּא מַלְאַךְ הַתְּהוֹם אֲשֶׁר שְׁמוֹ בִּשְׂפַת עֵבֶר אֲבַדּוֹן וְהַיְּוָנִים יִקְרְאוּ-לוֹ אַפּוֹלְיוֹן׃ יב נְהִי אֶחָד חָלַף הָלַךְ-לוֹ וּנְהִי שֵׁנִי שְׁלִישִׁי הִנָּם בָּאִים׃ יג וַיִּתְקַע הַמַּלְאָךְ הַשִּׁשִּׁי וָאֶשְׁמַע קוֹל קֹרֵא מִבֵּין קַרְנוֹת מִזְבַּח הַזָּהָב אֲשֶׁר לִפְנֵי אֱלֹהִים׃(שמות ל' א'-ג') יד אֶל-הַמַּלְאָךְ הַשִּׁשִּׁי אֲשֶׁר הַשּׁוֹפָר בְּיָדוֹ לֵאמֹר הַתֵּר אֶת-אַרְבָּעָה הַמַּלְאָכִים הָאֲסוּרִים עַל-הַנָּהָר הַגָּדוֹל נְהַר-פְּרָת׃ טו וְאַרְבָּעָה הַמַּלְאָכִים הֻתָּרוּ אֲשֶׁר עֲרוּכִים הָיוּ לַשָּׁעָה וְלַיּוֹם וְלַחֹדֶשׁ וְלַשָּׁנָה לְהָמִית אֶת-הַשְּׁלִישִׁית מִן-בְּנֵי הָאָדָם׃ טז וּמִסְפַּר צִבְאוֹת הַפָּרָשִׁים עָלָה לִשְׁתֵּי רִבֹּאוֹת רְבָבוֹת כִּי-כֵן שָׁמַעְתִּי מִסְפָּרָם׃ יז וְכֵן רָאִיתִי בֶחָזוֹן אֶת-הַסּוּסִים וְאֶת-רֹכְבֵיהֶם אֲשֶׁר שִׁרְיֹנֵיהֶם כְּמַרְאֵה אֵשׁ תְּכֵלֶת וְגָפְרִית וְרָאשֵׁי הַסּוּסִים כְּרָאשֵׁי אֲרָיוֹת וּמִפִּיהֶם עָלְתָה אֵשׁ עָשָׁן וְגָפְרִית׃ יח בָּשָׁלשׁ מַגֵּפוֹת אֵלֶּה בָּאֵשׁ בֶּעָשָׁן וּבַגָּפְרִית הָעֹלוֹת מִפִּיהֶם הֻכָּה חֵלֶק שְׁלִישִׁי מִן-בְּנֵי הָאָדָם׃ יט כִּי-כֹחַ הַסּוּסִים בְּמוֹ-פִיהֶם וּבְזַנְבוֹתָם כִּי זַנְבוֹתָם כִּנְחָשִׁים הֵם וְרָאשִׁים לָהֶם אֲשֶׁר בָּם הֵם מְחַבְּלִים׃ כ וּשְׁאָר בְּנֵי הָאָדָם אֲשֶׁר לֹא מֵתוּ בַּמַּגֵּפוֹת הָאֵלֶּה לֹא-שָׁבוּ מִמַּעֲשֵׂי יְדֵיהֶם מֵהִשְׁתַּחֲוֹת עוֹד לַשֵּׁדִים וְלַעֲצַבֵּי זָהָב וָכֶסֶף וּנְחשֶׁת וְאֶבֶן וָעֵץ אֲשֶׁר לֹא-יִרְאוּן וְלֹא-יִשְׁמְעוּן וְלֹא יְהַלֵּכוּן׃(ישעיהו ב' ח'; תהילים קטו' ד'-ז') כא וְגַם לֹא-שָׁבוּ מֵרֶצַח וּמִכְּשָׁפִים וּמִזְּנוּת וּמִגְּנֵבָה אֲשֶׁר בִּידֵיהֶם׃