ג א וְאֶל-מַלְאַךְ הַקָּהָל בְּסַרְדִּיס כְּתֹב כֹּה אָמַר הַהוּא אֲשֶׁר-לוֹ שִׁבְעָה רוּחוֹת הָאֱלֹהִים וְשִׁבְעָה כוֹכָבִים יָדַעְתִּי אֶת-מַעֲשֶׂיךָ כִּי-לְךָ שֵׁם אֲשֶׁר אַתָּה חַי וְהִנְּךָ מֵת׃(תהילים לג' טו') ב הִתְעוֹרֶר-נָא וְחַזֵּק אֶת-הַשְּׁאֵרִית הַנִּמְצָאָה הַקְּרֹבָה לַמָּוֶת כִּי לֹא-מָצָאתִי אֶת-מַעֲשֶׂיךָ שְׁלֵמִים לִפְנֵי אֱלֹהָי׃ ג זְכֹר אֵפוֹא מַה-לָּמַדְתָּ וּמַה שָּׁמַעְתָּ וּשְׁמֹר כָּל-אֵלֶּה וְשׁוּבָה אֵלָי וְאִם-לֹא תָחוּשׁ לְהִתְעוֹרֵר אָבוֹא כְגַנָּב וְלֹא תֵדַע בְּאֵי-זוּ שָׁעָה אֲנִי בָא עָלֶיךָ׃ ד יֶשׁ-לְךָ שְׁמוֹת מְעַטִּים גַם-בְּסַרְדִּיס אֲשֶׁר לֹא טִמְּאוּ אֶת-בִּגְדֵיהֶם הֵם יִתְהַלְּכוּן עִמִּי בִּבְגָדִים לְבָנִים כִּי לָהֶם יָאָתָה׃ ה הַמְנַצֵּחַ הוּא יִלְבַּשׁ לְבָנִים וְלֹא אֶמְחֶה אֶת-שְׁמוֹ מִסֵּפֶר הַחַיִּים כִּי אֶת-שְׁמוֹ אוֹדֶה לִפְנֵי אָבִי וְלִפְנֵי מַלְאָכָיו׃(דניאל יב' א') ו מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת׃ ז וְאֶל-מַלְאַךְ הַקָּהָל בְּפִילָדֶלְפִיָּא כְּתֹב כֹּה אָמַר הַקָּדוֹשׁ הַנֶּאֱמָן אֲשֶׁר בְּיָדוֹ מַפְתֵּחַ דָּוִד הַפֹּתֵחַ וְאֵין סֹגֵר וְהַסֹּגֵר וְאֵין פֹּתֵחַ׃(ישעיהו כב' כב') ח יָדַעְתִּי אֶת-מַעֲשֶׂיךָ הִנֵּה נָתַתִּי לְפָנֶיךָ שַׁעַר פָּתוּחַ אֲשֶׁר-לֹא-יוּכַל אִישׁ לְסָגְרוֹ כִּי יֶשׁ-לְךָ כֹחַ מְעַט וַתִּשְׁמֹר אֶת-דְּבָרִי וְלֹא שִׁקַּרְתָּ בִּשְׁמִי׃ ט הִנְנִי נֹתֵן אֶת-אֵלֶּה מִבֵּית-הַכְּנֵסֶת אֲשֶׁר לַשָּׂטָן הָאֹמְרִים כִּי יְהוּדִים הֵם וְאֵינָם כֵּן כִּי אִם-כֹּזְבִים הִנְנִי נֹתְנָם לְפָנֶיךָ כִּי יָבֹאוּ וְיִשְׁתַּחֲווּ עַל-כַּפּוֹת רַגְלֶיךָ(ישעיהו מט' כג'; ס' יד') וְיָדְעוּ כִּי אֲנִי אֲהַבְתִּיךָ׃(ישעיהו נג' ד') י יַעַן שָׁמַרְתָּ אֶת-דְּבָרִי בְּעֹצֶר רוּחַ וְגַם-אֲנִי אֶשְׁמָרְךָ בְּיוֹם מַסָּה הַבָּא עַל-תֵּבֵל כֻּלָּהּ לְנַסּוֹת אֶת-ישְׁבֵי הָאָרֶץ׃ יא הִנְנִי בָא מְהֵרָה שְׁמֹר אֵת אֲשֶׁר לְךָ פֶּן-יִקַּח אִישׁ מִמְּךָ אֶת-כִּתְרֶךָ׃ יב הַמְנַצֵּחַ אֶתְּנֶנּוּ לְעַמּוּד בְּהֵיכַל אֱלֹהַי וְלֹא-יֶעְתַּק עוֹד מִמְּקוֹמוֹ הַחוּצָה (ישעיהו נו' ה') וְכָתַבְתִּי עָלָיו אֶת-שֵׁם אֱלֹהַי וְאֶת-שֵׁם עִיר אֱלֹהָי הֲלֹא הִיא יְרוּשָׁלַיִם הַחֲדָשָׁה הַיֹּרֶדֶת מֵאֵת אֱלֹהַי מִן-הַשָּׁמַיִם וְאֶת-שְׁמִי הֶחָדָשׁ׃(ישעיהו סה' יז'-יט') יג מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת׃ יד וְאֶל-מַלְאַךְ הַקָּהָל בְּלוּדְקְיָא כְּתֹב כֹּה אָמַר הָאָמֵן עֵד הָאֱמֶת וְהַצֶּדֶק וְרֵאשִׁית בְּרִיאַת הָאֱלֹהִים׃ טו יָדַעְתִּי אֶת-מַעֲשֶׂיךָ כִּי לֹא קַר וְלֹא חַם אָתָּה מִי-יִתֵּן וְהָיִיתָ קַר אוֹ-חָם׃(מלכים א', יח' כא'//***) טז אַךְ יַעַן כִּי נֹטֶה אַתָּה מִשְּׁנֵיהֶם לֹא חַם וְלֹא קַר אָקִיא אֹתְךָ מִפִּי׃ יז וְאַתָּה אָמַרְתָּ הֵן הֶעְשַׁרְתִּי וְכַבִּיר מָצְאָה יָדִי וְלֹא אֶחְסַר דָּבָר וְלֹא יָדַעְתָּ כִּי-נִדְכֶּה וְאֻמְלָל אַתָּה עָנִי עִוֵּר וְעֵרֹם׃ יח אִיעָצְךָ לִקְנוֹת מִיָּדִי זָהָב צָרוּף בָּאֵשׁ (ישעיהו נה' א'; משלי ח' יח') וְתֶעְשַׁר וּבְגָדִים לְבָנִים אֲשֶׁר תִּלְבַּשׁ וּבשֶׁת עֶרְוָתְךָ לֹא תִגָּלֶה וְשֶׁמֶן מַרְפֵּא לִמְשֹׁחַ עֵינֶיךָ לְמַעַן תִּרְאֶה׃ יט כָּל-אִישׁ אֲשֶׁר אֲנִי אֹהֵב אוֹכִיחֶנּוּ וַאֲיַסְּרֶנּוּ עַל-כֵּן הִתְאַמֶּץ-נָא וְשׁוּבָה אֵלָי׃(משלי ג' יא'-יב') כ הִנֵּה אֲנִי עֹמֵד לַפֶּתַח וְדֹפֵק אִישׁ כִּי יִשְׁמַע אֶת-קוֹלִי וּפָתַח אֶת-הַדֶּלֶת אָבֹא לֶאֱכֹל עִמּוֹ וְהוּא עִמָּדִי׃(שיר השירים ה' ב') כא הַמְנַצֵּחַ אֶתֶּן-לוֹ לָשֶׁבֶת עִמִּי עַל-כִּסְאִי כַּאֲשֶׁר גַּם-אָנֹכִי נִצַּחְתִּי וְיָשַׁבְתִּי עִם-אָבִי עַל-כִּסְאוֹ׃(איוב לו' ז') כב מִי אֲשֶׁר-אָזְנַיִם לוֹ יַקְשִׁיב אֵת אֲשֶׁר הָרוּחַ מַגִּיד לַקְּהִלּוֹת׃