כז א הַבֹּקֶר אוֹר וְכָל-רָאשֵׁי הַכֹּהֲנִים וְזִּקְנֵי הָעָם נוֹסְדוּ יַחַד עַל-יֵשׁוּעַ לַהֲמִיתוֹ׃ ב וַיַּאַסְרוּ אֹתוֹ וַיּוֹלִיכֻהוּ וַיַּסְגִּירֻהוּ בִידֵי פּוֹנְטִיוֹס פִילָטוֹס הַפֶּחָה׃ ג וַיַּרְא יְהוּדָה הַמַּסְגִּיר אֹתוֹ כִּי הִרְשִׁיעֻהוּ וַיִּנָּחֵם וַיָּשֶׁב אֶת-שְׁלֹשִׁים הַכֶּסֶף אֶל-רָאשֵׁי הַכֹּהֲנִים וְאֶל-הַזְּקֵנִים׃ ד וַיֹּאמַר חָטָאתִי בַּאֲשֶׁר הִסְגַּרְתִּי דָם נָקִי וְהֵם אָמְרוּ מַה-לָּנוּ וְלָזֹאת רְאֵה אָתָּה׃ ה וַיַּשְׁלֵךְ אֶת-הַכֶּסֶף בַּהֵיכָל וַיֵּצֵא וַיֵּלֶךְ וַיֵּחָנַק׃ ו וַיִּקְחוּ רָאשֵׁי הַכֹּהֲנִים אֶת-הַכֶּסֶף וַיֹּאמְרוּ לֹא-כַתּוֹרָה הוּא לְתִתּוֹ אֶל-הָאוֹצָר כִּי-שְׂכַר דָּמִים הוּא׃ ז וַיִּוָּעֲצוּ וַיִּקְנוּ בַכֶּסֶף הַזֶּה אֶת-שְׂדֵה הַיּוֹצֵר לִקְבוּרַת גֵּרִים׃ ח עַל-כֵּן יִקָּרֵא לַשָּׂדֶה הַהוּא שְׂדֵה דָמִים עַד הַיּוֹם הַזֶּה׃ ט אָז הוּקַם הַדָּבָר אֲשֶׁר נֶאֱמַר בְּיַד-הַנָּבִיא לֵאמֹר וַיִּקְחוּ אֶת-שְׁלֹשִׁים הַכֶּסֶף אֶדֶר הַיְקָר אֲשֶׁר יָקַר מֵעַל-בְּנֵי יִשְׂרָאֵל׃ י וַיִּתְּנוּם בְּעַד-שְׂדֵה הַיּוֹצֵר כַּאֲשֶׁר צִוָּה אֹתִי אֲדֹנָי׃(זכריה יא' יג') יא וְיֵשׁוּעַ עֹמֵד לִפְנֵי הַפֶּחָה וַיִּשְׁאַל אֹתוֹ הַפֶּחָה לֵאמֹר הַאַתָּה הוּא מֶלֶךְ הַיְּהוּדִים וַיֹּאמֶר אֵלָיו יֵשׁוּעַ אַתָּה אָמָרְתָּ׃ יב וְרָאשֵׁי הַכֹּהֲנִים וְהַזְּקֵנִים הֵבִיאוּ עָלָיו שִׂטְנָתָם וְלֹא עָנָה אֹתָם דָּבָר׃ יג וַיֹּאמֶר אֵלָיו פִּילָטוֹס הֲלֹא שֹׁמֵעַ אַתָּה עַד-כַּמָּה הִכְבִּירוּ לַעֲנוֹת בָּךְ׃ יד וְלֹא נָתַן לוֹ מַעֲנֶה אַף לֹא דָבָר אֶחָד עַד אֲשֶׁר-הָיָה לְפֶלֶא בְּעֵינֵי הַפֶּחָה׃ טו וּבֶחַג הַזֶּה הַסְכֵּן הִסְכִּין הַפֶּחָה לְשַׁלַּח אֶחָד מֵהָאֲסִירִים אֲשֶׁר יִבְחֲרוּ בוֹ הָעָם לַחָפְשִׁי׃ טז וּבָעֵת הַהִיא הָיָה לָהֶם אִישׁ אָסִיר נוֹדַע לָעָם וּשְׁמוֹ בַּר-אַבָּא׃ יז וַיְהִי בְּהִקָּהֲלָם וַיֹּאמֶר אֲלֵיהֶם פִּילָטוֹס בְּמִי תִבְחֲרוּ וַאֲשַׁלְּחֵהוּ לָכֶם בְּבַר-אַבָּא אוֹ בְיֵשׁוּעַ הַנִּקְרָא מָשִׁיחַ׃ יח כִּי יָדַע אֲשֶׁר מִקִּנְאָתָם בּוֹ הִסְגִּירֻהוּ׃ יט וְגַם-בְּשִׁבְתּוֹ בִּמְקוֹם הַמִּשְׁפָּט שָׁלְחָה לּוֹ אִשְׁתּוֹ לֵאמֹר אַל-תִּתְעָרַב בִּדְבַר הַצַּדִּיק הַזֶּה כִּי זֶה הַיּוֹם עֻנֵּיתִי בַחֲלוֹם עַד-מְאֹד עַל-אֹדוֹתָיו׃ כ וְרָאשֵׁי הַכֹּהֲנִים וְהַזְּקֵנִים הֵסִיתוּ אֶת-הֲמוֹן הָעָם לִשְׁאֹל לָהֶם אֵת בַּר-אַבָּא וּלְהַשְׁמִיד אֶת-יֵשׁוּעַ׃ כא וַיַּעַן הַפֶּחָה וַיֹּאמֶר אֲלֵיהֶם אֶת-מִי מִן-הַשְּׁנַיִם תַּחְפְּצוּ וַאֲשַׁלְּחֵהוּ לָכֶם וַיֹּאמְרוּ אֵת בַּר-אַבָּא׃ כב וַיֹּאמֶר אֲלֵיהֶם פִּילָטוֹס וּמָה-אֶעֱשֶׂה לְיֵשׁוּעַ הַנִּקְרָא מָשִׁיחַ וַיֹּאמְרוּ כֻלָּם יִצָּלֵב׃ כג וַיֹּאמֶר וְלָמָּה מֶה-רָעָה עָשָׂה וְהֵם הוֹסִיפוּ לִצְעֹק וְלֵאמֹר יִצָּלֵב׃ כד וַיַּרְא פִּילָטוֹס כִּי לֹא-יָכֹל לָהֶם אַךְ עוֹד תּוֹסִיף הַמְּהוּמָה וַיִּקַּח מַיִם וַיִּרְחַץ אֶת-יָדָיו לְעֵינֵי הָעָם וַיֹּאמַר נָקִי אָנֹכִי מִדַּם הַצַּדִּיק הַזֶּה רְאוּ אַתֶּם׃ כה וַיַּעֲנוּ כָל-הָעָם לֵאמֹר דָּמוֹ עָלֵינוּ וְעַל-בָּנֵינוּ׃(במדבר יד' יח') כו אָז שִׁלַּח לָהֶם אֵת בַּר-אַבָּא וְאֵת יֵשׁוּעַ יִסַּר בַּשּׁוֹטִים וַיִּתְּנֵהוּ לְהִצָּלֵב׃(תהילים צד' כא') כז וַיִּקְחוּ אַנְשֵׁי צְבָא הַפֶּחָה אֶת-יֵשׁוּעַ אֶל-חֲצַר הַמִּשְׁפָּט הוּא פְּרַטוֹרִין וַיַּזְעִיקוּ עָלָיו אֵת כָּל-הַגְּדוּד׃ כח וַיַּפְשִׁיטוּ אֹתוֹ וַיַּלְבִּישֻׁהוּ מְעִיל אַרְגָּמָן׃ כט וַיְשָׂרְגוּ כֶּתֶר קוֹצִים וַיָּשִׂימוּ עַל-רֹאשׁוֹ וְקָנֶה בִימִינוֹ וַיִּכְרְעוּ לְפָנָיו עַל-בִּרְכֵיהֶם וַיְהַתְּלוּ בוֹ לֵאמֹר יְחִי מֶלֶךְ הַיְּהוּדִים׃ ל וַיָּרֹקּוּ בְּפָנָיו וַיִּקְחוּ אֶת-הַקָּנֶה וַיַּכֻּהוּ עַל-רֹאשׁוֹ׃ לא וְאַחֲרֵי אֲשֶׁר הֵתֵלּוּ בוֹ הִפְשִׁיטוּ אֹתוֹ אֶת-הַמְּעִיל וַיַּלְבִּישֻׁהוּ אֶת-בְּגָדָיו וַיּוֹלִיכֻהוּ לִצְלֹב אֹתוֹ׃ לב וְכַאֲשֶׁר יָצְאוּ פָּגְעוּ בְּאִישׁ קוּרִינִי וּשְׁמוֹ שִׁמְעוֹן אֹתוֹ אִלְּצוּ לַהֲלֹךְ אִתָּם וְלָשֵׂאת לוֹ אֶת-צְלָבוֹ׃ לג וַיָּבֹאוּ אֶל-הַמָּקוֹם הַנִּקְרָא גָּלְגָּלְתָּא אֲשֶׁר יֵאָמֵר מְקוֹם הַגֻּלְגֹּלֶת׃ לד וַיִּתְּנוּ-לוֹ יַיִן מָהוּל בְּרֹאשׁ לִשְׁתּוֹת וַיִּטְעַם וְלֹא אָבָה לִשְׁתּוֹתוֹ׃ לה וַיִּצְלְבוּ אֹתוֹ שָׁם וַיְחַלְּקוּ אֶת-בְּגָדָיו וַיַּפִּילוּ עֲלֵיהֶם גּוֹרָל לְמַלּאֹת אֶת אֲשֶׁר-נֶאֱמַר בְּפִי הַנָּבִיא יְחַלְּקוּ בְגָדַי לָהֶם וְעַל-לְבוּשִׁי יַפִּילוּ גוֹרָל׃(תהילים כב' יט') לו וַיֵּשְׁבוּ וַיִּשְׁמְרוּ אֹתוֹ שָׁמָּה׃ לז וַיָּשִׂימוּ דְבַר אַשְׁמָתוֹ בִּכְתֹבֶת מֵעַל לְרֹאשׁוֹ זֶה הוּא יֵשׁוּעַ מֶלֶךְ הַיְּהוּדִים׃ לח וְאַחֲרֵי-כֵן נִצְלְבוּ עִמּוֹ שְׁנֵי אַנְשֵׁי-חָמָס אֶחָד מִימִינוֹ וְאֶחָד מִשְּׂמֹאלוֹ׃(ישעיהו נג' יב') לט וְהָעֹבְרִים שָׁם גִּדְּפוּ אֹתוֹ וַיָּנִיעוּ אַחֲרָיו אֶת-רֹאשָׁם׃(תהילים כב' ח'; קט' כה') מ וַיֹאמְרוּ אַתָּה הוּא הַהֹרֵס אֶת-הַהֵיכָל וְהַבּוֹנֶה אֹתוֹ בִּשְׁלֹשֶׁת יָמִים הוֹשִׁיעָה אֶת-נַפְשֶׁךָ אִם בֶּן-אֱלֹהִים אַתָּה רְדָה מִן-הָעֵץ׃ מא וְכֵן גַּם-שָׂחֲקוּ עָלָיו רָאשֵׁי הַכֹּהֲנִים עִם-הַסּוֹפְרִים וְהַזְּקֵנִים לֵאמֹר׃(תהילים סט' כא') מב אֶת-אֲחֵרִים הוֹשִׁיעַ וְאֶת-נַפְשׁוֹ לֹא יוּכַל לְהוֹשִׁיעַ אִם-מֶלֶךְ יִשְׂרָאֵל הוּא יֵרֶד-נָא עַתָּה מִן-הָעֵץ וְנַאֲמִין בּוֹ׃ מג בֹּטֵחַ בֵּאלֹהִים יַצִּילֵהוּ כִּי חָפֵץ בּוֹ כִּי הֲלֹא אָמַר בֶּן-הָאֱלֹהִים אָנִי׃(תהילים כב' ט') מד וְגַם-אַנְשֵׁי-הֶחָמָס אֲשֶׁר נִצְלְבוּ עִמּוֹ חֵרְפֻהוּ כְּמוֹ-כֵן׃ מה וְחֹשֶׁךְ כִּסָּה אֶת-פְּנֵי כָל-הָאָרֶץ מִן-הַשָּׁעָה הַשִּׁשִּׁית עַד הַשָּׁעָה הַתְּשִׁיעִית׃ מו וּבַשָּׁעָה הַתְּשִׁיעִית צָעַק יֵשׁוּעַ בְּקוֹל גָּדוֹל לֵאמֹר אֱלָהִי אֱלָהִי לְמָה שְׁבַקְתָּנִי אֲשֶׁר יֵאָמֵר אֵלִי אֵלִי לָמָה עֲזַבְתָּנִי׃(תהילים כב' ב') מז וּמִן-הָעֹמְדִים שָׁם כַּאֲשֶׁר שָׁמְעוּ אָמְרוּ הוּא קֹרֵא אֶל-אֵלִיָּהוּ׃ מח וַיְמַהֵר אֶחָד מֵהֶם וַיָּרָץ וַיִּקַּח סְפוֹג אֲשֶׁר מִלְאוֹ חֹמֶץ וַיְשִׂימֵהוּ עַל-קָנֶה וַיַּשְׁקֵהוּ׃(תהילים סט' כב') מט וְיֶתֶר הָאֲנָשִׁים אָמְרוּ הֶרֶף וְנִרְאֶה אִם-יָבֹא אֵלִיָּהוּ לְהוֹשִׁיעַ לוֹ׃ נ וְיֵשׁוּעַ הֹסִיף וַיִּקְרָא בְקוֹל גָּדוֹל וַיַּפְקֵד אֶת-רוּחוֹ׃ נא וְהִנֵּה פָּרֹכֶת הַהֵיכָל נִקְרְעָה לִשְׁנַיִם קְרָעִים מִלְמַעְלָה לְמָטָּה (שמות כו' לא'-לג') אֶרֶץ רָעֲשָׁה וְצוּרִים הִתְבַּקָּעוּ׃ נב וּקְבָרִים נִפְתָּחוּ וַיָּקִיצוּ רַבִּים מֵעַצְמוֹת הַקְּדוֹשִׁים אֲשֶׁר בָּאָרֶץ יְשֵׁנִים הֵמָּה׃ נג וַיֵּצְאוּ מִקִּבְרֵיהֶם אַחֲרֵי תְקוּמָתוֹ וַיָּבֹאוּ אֶל-עִיר הַקֹּדֶשׁ וַיֵּרָאוּ לָרַבִּים׃ נד וְשַׂר-הַמֵּאָה וְהָאֲנָשִׁים אֲשֶׁר אִתּוֹ הַשֹּׁמְרִים אֶת-יֵשׁוּעַ בִּרְאוֹתָם אֶת-הָרַעַשׁ וְאֶת-כָּל-אֲשֶׁר קָרָה חָרְדוּ עַד-מְאֹד וַיֹּאמְרוּ אָכֵן זֶה הָיָה בֶּן-אֱלֹהִים׃ נה וְנָשִׁים רַבּוֹת אֲשֶׁר הָלְכוּ אַחֲרֵי יֵשׁוּעַ מִן-הַגָּלִיל לְשָׁרְתוֹ הָיוּ רֹאוֹת אֶת-הַנַּעֲשָׂה שָׁם מֵרָחוֹק׃(תהילים לח' יב') נו וּבֵינֵהֶן הָיְתָה מִרְיָם הַמַּגְדָּלִית וּמִרְיָם אֵם-יַעֲקֹב וְיוֹסֵי וְאֵם בְּנֵי זַבְדִּי׃ נז וַיְהִי בָעֶרֶב וַיָּבֹא אִישׁ עָשִׁיר מִן-הָרָמָתַיִם וּשְׁמוֹ יוֹסֵף וְגַם-הוּא הָיָה אֶחָד מִתַּלְמִידֵי יֵשׁוּעַ׃ נח הוּא בָא אֶל-פִּילָטוֹס וַיִּשְׁאַל מִמֶּנּוּ אֶת-גּוּף יֵשׁוּעַ וַיְצַו פִּילָטוֹס כִּי-יִנָּתֵן לוֹ׃ נט וַיִּקַּח יוֹסֵף אֶת-הַגּוּף וַיַּעֲטֵהוּ בְּתַכְרִיךְ-בַּד טָהוֹר׃ ס וַיְשִׂימֵהוּ בְּקֶבֶר חָדָשׁ אֲשֶׁר חָצַּב-לוֹ בַּצּוּר וַיָּגֶל אֶבֶן גְּדוֹלָה עַל-פִּי הַקֶּבֶר וַיֵּלַךְ׃(ישעיהו נג' ט') סא וּמִרְיָם הַמַּגְדָּלִית וּמִרְיָם הָאַחֶרֶת הָיוּ יֹשְׁבוֹת שָׁם מִמּוּל הַקָּבֶר׃ סב וַיְהִי מִמָּחֳרָת אַחֲרֵי עֶרֶב הַשַּׁבָּת וַיִּקָּהֲלוּ רָאשֵׁי הַכֹּהֲנִים וְהַפְּרוּשִׁים אֶל-פִּילָטוֹס׃ סג וַיֹּאמְרוּ אֲדֹנֵינוּ זָכַרְנוּ כִּי בְּעוֹדֶנּוּ חַי אָמַר הַמַּתְעֶה הַהוּא מִקְצֵה שְׁלֹשֶׁת יַמִים אָקוּם׃ סד לָכֵן צַוֵּה-נָא לִנְצֹר אֶת-הַקֶּבֶר עַד-יוֹם הַשְּׁלִישִׁי פֶּן-יָבֹאוּ תַלְמִידָיו בַּלַיְלָה וּגְנָבֻהוּ וְאָמְרוּ אֶל-הָעָם הִנֵּה-קָם מִן-הַמֵּתִים וְרָעָה הַמִּרְמָה הָאַחֲרֹנָה מִן-הָרִאשֹׁנָה׃ סה וַיֹּאמֶר אֲלֵיהֶם פִּילָטוֹס הֵא-לָכֶם אַנְשֵׁי מִשְׁמָר לְכוּ וְנִצְרוּ כַּאֲשֶׁר תֵּדָעוּן׃ סו וַיֵּלְכוּ וַיִּצְּרוּ אֶת-הַקֶּבֶר וַיַּחְתְּמוּ אֶת-הָאָבֶן וַיַּעֲמִידוּ עָלָיו אֶת-הַמִּשְׁמָר׃(דניאל ו' יח')