ב א אַל-תַּכִּירוּ פָנִים אַחַי בֶּאֱמוּנַת יֵשׁוּעַ הַמָּשִׁיחַ אֲדֹנֵינוּ אֲדוֹן הַכָּבוֹד׃(ויקרא יט' טו'; דברי הימים ב', יט' ז') ב כִּי אִם-יָבֹא אִישׁ אֶל-בֵּית הַכְּנֵסֶת לָכֶם הָדוּר בְּטַבְּעוֹת זָהָב וְלָבוּשׁ מַחֲלָצוֹת וּבָא שָׁם גַּם-עָנִי בִּבְגָדִים צוֹאִים׃ ג וּפְנִיתֶם אֶל-הַלָּבוּשׁ מַחֲלָצוֹת לֵאמֹר שְׁבָה-נָּא פֹה בְּמוֹשָׁב נִכְבָּד וְאֶל-הֶעָנִי תֹאמְרוּן אַתָּה עֲמֹד שָׁם אוֹ שֵׁב לַהֲדֹם רַגְלָי׃ ד הַאִם לֹא לֵב וָלֵב בְּקִרְבְּכֶם וְאִם לֹא כְשֹׁפְטִים חֹרְשֵׁי רַע אַתֶּם׃ ה שְׁמָעוּנִי אַחַי הַיְקָרִים הֲלֹא אֱלֹהִים בָּחַר בַּעֲנִיֵּי הָאָרֶץ (שמואל א', ב' ח') לִהְיוֹת עֲשִׂירֵי אֱמוּנָה וְיֹרְשֵׁי מַלְכוּת כַּאֲשֶׁר דִּבֶּר לְאֹהֲבָיו׃ ו וְאַתֶּם הוֹבַשְׁתֶּם פְּנֵי הֶעָנִי הֲלֹא הָעֲשִׁירִים הֵם יַעַשְׁקוּן וְיִסְחֲבוּן אֶתְכֶם לִמְקוֹם הַמִּשְׁפָּט׃ ז וְגַם הַשֵּׁם הַטּוֹב אֲשֶׁר נִקְרָא עֲלֵיכֶם יָשִׂימוּ אֹתוֹ לַחֲרָפוֹת׃ ח הִנֵּה אִם תִּשְׁמְרוּ דָת הַמַּלְכוּת כַּכָּתוּב בַּתּוֹרָה וְאָהַבְתָּ לְרֵעֲךָ כָּמוֹךָ (ויקרא יט' יח') תֵּיטִיבוּ לַעֲשׂוֹת׃ ט אוּלָם אִם-תִּשְׂאוּ פָנִים תֶּחֶטְאוּ בְמַעֲשֵׂיכֶם וְעַל-פִּי הַתּוֹרָה תִּשָּׁפְטוּ כְּפֹשְׁעִים בָּהּ׃(דברים א' יז') י כִּי הַשֹּׁמֵר אֶת-כָּל-הַתּוֹרָה וְעֹבֵר אַחַת מִמִּצְוֹתֶיהָ הוּא אָשֵׁם כְּעֹבֵר כָּל-מִצְוֹתֶיהָ׃(יחזקאל לג' יג') יא כִּי הָאֹמֵר לֹא תִּנְאָף גַּם-הוּא אֹמֵר לֹא תִּרְצָח (שמות כ' יב'; דברים ה' טז') וְאִם-אַתָּה לֹא נָאַפְתָּ אַךְ רָצַחְתָּ פּשֶׁעַ בַּתּוֹרָה הִנֶּךָ׃ יב וְאַתֶּם כֹּה תְדַבְּרוּן וְכֹה תַעֲשׂוּן כַּעֲתִדִים לְהִשָּׁפֵט עַל-פִּי הַתּוֹרָה אֲשֶׁר חֹפֶשׁ בָּהּ׃ יג כִּי אֵין חֶסֶד בַּדִּין לְלֹא חָסֶד אַךְ כֹּחַ הַחֶסֶד יָעֹז עַל-כֹּחַ הַדִּין׃ יד אַחַי מַה-יּוֹעִיל לְאִישׁ הָאֹמֵר כִּי אֱמוּנָה בוֹ וּמַעֲשִׂים אֵין לוֹ הֲתוּכַל אֱמוּנָה לְהוֹשִׁיעַ-לוֹ׃ טו אִם אָח אוֹ-אָחוֹת יִהְיוּ עֵירֻמִּים וְאֵין לָהֶם לֶחֶם חֻקָּם׃(דברים טו' יא') טז וְאִישׁ מִכֶּם יֹאמַר אֲלֵיהֶם לְכוּ לְשָׁלוֹם וְחַם-לָכֶם וּשְׂבַעְתֶּם וְלֹא-תִתְּנוּ לְנַפְשָׁם דֵּי-מַחְסֹרָם מַה-יִּתֵּן לָהֶם דְּבַר שְׂפָתָיִם׃(ישעיהו נח' ז') יז כֵּן גַּם-הָאֱמוּנָה אִם מַעֲשִׂים אֵין עִמָּהּ מֵתָה הִיא לְבַדָּהּ׃ יח אֲבָל יֹאמַר אִישׁ הֵן אַתָּה יֵשׁ אֱמוּנָה בְךָ וַאֲנִי יֶשׁ-לִי מַעֲשִׂים הַרְאֵנִי אֶת-אֱמוּנַתְךָ בִּבְלִי מַעֲשֶׂיךָ וַאֲנִי מִתּוֹךְ מַעֲשַׂי אַרְאֲךָ אֶת-אֱמוּנָתִי׃ יט אַתָּה מַאֲמִין כִּי אֱלֹהִים אֶחָד הוּא וְהֵיטַבְתָּ לְהַאֲמִין וְגַם הַשֵּׁדִים כֵּן יַאֲמִינוּ וְיָחִילוּן׃ כ אַךְ עַתָּה רֹעֵה רוּחַ אִם חָפַצְתָּ לָדַעַת כִּי אֱמוּנָה בִּבְלִי מַעֲשִׂים מֵתָה הִיא׃ כא הֲלֹא בְמַעֲשָׂיו נִצְדַּק אַבְרָהָם אָבִינוּ בְּהַעֲלֹתוֹ אֶת-יִצְחָק בְּנוֹ עַל-גַּב הַמִּזְבֵּחַ׃(בראשית כב' ט'-י') כב הִנְּךָ רֹאֶה כִּי-הָאֱמוּנָה נָתְנָה-כֹּחַ לְמַעֲשָׂיו וּמִתּוֹךְ מַעֲשָׂיו נֶעֶשְׂתָה אֱמוּנָתוֹ שְׁלֵמָה׃ כג וְהוּקַם הַכָּתוּב הָאֹמֵר וְהֶאֱמִן אַבְרָהָם בַּיְהוָֹה וַתֵּחָשֶׁב-לוֹ צְדָקָה (בראשית טו' ו') וְגַם נִקְרָא אֹהֵב אֱלֹהִים׃(דברי הימים ב', כ' ז'; ישעיהו מא' ח') כד הִנֵּה רֹאִים אַתֶּם כִּי בְמַעֲשִׂים יִצְדַּק אִישׁ וְלֹא בֶאֱמוּנָה לְבַדָּהּ׃ כה וְכֵן גַּם-רָחָב הַזּוֹנָה נִצְדְּקָה בְמַעֲשֶׂיהָ כַּאֲשֶׁר הֵבִיאָה אֶת-הַמַּלְאָכִים אֶל-בֵּיתָהּ וַתְּשַׁלְּחֵם בְּדֶרֶךְ אַחֶרֶת׃(יהושוע ו' יז') כו כִּי כְמוֹ-גוּף בְּלֹא נְשָׁמָה מֵת הוּא כֵּן גַּם-אֱמוּנָה בִּבְלִי מַעֲשִׂים מֵתָה הִיא׃