אל העברים ב

ב א עַל-כֵּן הַמִּצְוָה אֵלֵינוּ לְהִזָּהֵר עַד-מְאֹד בַּדְּבָרִים אֲשֶׁר שָׁמָעְנוּ פֶּן-יָלוּזוּ מֵעֵינֵינוּ׃ ב כִּי אִם-הַדָּבָר דָּבֻר עַל-פִּי מַלְאָכִים עָמַד בְּתָקְפוֹ וְכָל-עָוֹן וָפֶשַׁע נִפְקַד בְּשֵׁבֶט מִשְׁפָּט׃ ג אֵיךְ נִמָּלֵט אֲנַחְנוּ אִם-לֹא נָשִׁית לֵב לְיֶשַׁע רַב כָּמוֹהוּ אֲשֶׁר בִּשַּׂר הָאָדוֹן מֵרֹאשׁ וַיֵּאָמֵן דְּבָרוֹ לָנוּ מִפִּי שֹׁמְעָיו׃ ד וְגַם-אֱלֹהִים נָתַן עֵדוּת עַל-זֹאת בְּאֹתוֹת וּבְמוֹפְתִים וְנִפְלָאוֹת וּבְמַתְּנוֹת רוּחַ קָדְשׁוֹ אֲשֶׁר חִלֵּק כִּרְצוֹנוֹ׃ ה כִּי לֹא תַחַת יְדֵי-הַמַלְאָכִים שָׁת אֶת-הָעוֹלָם הֶעָתִיד לָבֹא אֲשֶׁר עָלָיו אֲנַחְנוּ מְדַבְּרִים׃ ו כִּי אִם-כְּעֵדוּת הַכָּתוּב הָאֹמֵר שָׁם מָה-אֱנוֹשׁ כִּי-תִּזְכְּרֶנּוּ וּבֶן-אָדָם כִּי תִפְקְדֶנּוּ׃ ז וַתְּחַסְּרֵהוּ מְעַט מֵאֱלֹהִים וְכָבוֹד וְהָדָר תְּעַטְּרֵהוּ תַּמְשִׁילֵהוּ בְּמַעֲשֵׂי יָדֶיךָ׃ ח כֹּל שַׁתָּה תַחַת-רַגְלָיו אַךְ בַּאֲשֶׁר שָׁת כֹּל תַּחְתָּיו (תהילים ח' ה'-ז') לֹא הוֹתִיר דָּבָר אֲשֶׁר לֹא הוּשַׁת תַּחְתָּיו וְעַתָּה לֹא רָאִינוּ עוֹד כַיּוֹם כִּי הַכֹּל הוּשַׁת תַּחְתָּיו׃ ט אֲבָל רֹאִים אֲנַחְנוּ אֶת-יֵשׁוּעַ הַהוּא אֲשֶׁר חִסְּרוֹ מְעַט מֵאֱלֹהִים וַיְעַטְּרֵהוּ כָבוֹד וְהָדָר עֵקֶב חֶבְלֵי הַמָוֶת אֲשֶׁר אֲפָפוּהוּ כִּי בְחֶסֶד-אֵל טָעַם טַעַם הַמָּוֶת בְּעַד כֻּלָּם׃ י כִּי הוּא אֲשֶׁר הַכֹּל לְמַעֲנֵהוּ וּמִיָּדוֹ הַכֹּל הָדָר הוּא לוֹ לְהַנְחוֹת בָּנִים רַבִּים לִגְאוֹן עֻזָּם וּלְהַשְׁלִים אֶת-שַׂר יְשׁוּעָתָם בְּכוּר עֹנִי׃ יא כִּי הַמְכַפֵּר וְהֵם אֲשֶׁר עֲלֵיהֶם יְכַפֵּר מֵאָב אֶחָד הֵם כֻּלָּם עַל-כֵּן לֹא בוֹשׁ מִקְּרֹא לָהֶם אַחִים׃ יב בְּאָמְרוֹ אֲסַפְּרָה שִׁמְךָ לְאֶחָי בְּתוֹךְ קָהָל אֲהַלֲלֶךָ׃(תהילים כב' כג') יג וְעוֹד יֵאָמַר וְקִוֵּיתִי לוֹ (ישעיהו ח' יז') וְעוֹד יוֹסִיף הִנֵּה אָנֹכִי וְהַיְלָדִים אֲשֶׁר נָתַן-לִי יְהוָֹה׃(ישעיהו ח' יח') יד וְיַעַן כִּי הַיְלָדִים בָּשָׂר וָדָם מְנָת חֶלְקָם כֵּן גַּם-הוּא לָבַשׁ בָּשָׂר וָדָם כְּמוֹהֶם לְמַעַן יְבַלַּע בְּמוֹתוֹ אֶת-מַלְאַךְ הַמָּוֶת הוּא הַשָּׂטָן׃ טו וְשִׁלַּח לַחָפְשִׁי אֶת-אֵלֶּה אֲשֶׁר מֵאֵימַת מָוֶת הָיוּ נִכְבָּשִׁים כָּל-יְמֵי חַיֵּיהֶם כַּעֲבָדִים׃ טז כִּי לֹא לַמַּלְאָכִים נָטָה יָדוֹ לְהוֹשִׁיעָם כִּי אִם-לְזֶרַע אַבְרָהָם הוּא לְמוֹשִׁיעַ׃ יז וְעַל-כֵּן נִמְשַׁל נִדְמָה לְאֶחָיו בַּכֹּל לְמַעַן יְהִי כֹהֵן גָּדוֹל בְּרַחֲמָיו וּבֶאֱמוּנָתוֹ לִפְנֵי אֱלֹהִים לְכַפֵּר עַל-חַטֹּאת הָעָם׃(ויקרא טז' לב'-לד') יח כִּי כַאֲשֶׁר הָיָה אִישׁ מַכְאֹבוֹת וִידוּעַ מַסָּה בְּנַפְשׁוֹ כֵּן יוּכַל לְהוֹשִׁיעַ בְּחוּנֵי מַסָּה׃