ו א אַחַי אִם-אִישׁ מִכֶּם נִלְכַּד וְעָשָׂה אַחַת מֵאֵלֶּה אֲשֶׁר לֹא תֵעֲשֶׂינָה אַתֶּם אַנְשֵׁי רוּחַ הָקֵם תָּקִימוּ אֹתוֹ בְּעַנָוַת רוּחַ וְזָכַרְתָּ פֶּן-תִּלָּכֵד בְּמַסָּה גַם-אָתָּה׃ ב שְׂאוּ עֲלֵיכֶם אִישׁ סֵבֶל רֵעֵהוּ וּבָזֹאת תִּשְׁמְרוּ אֶת-תּוֹרַת הַמָּשִׁיחַ׃ ג וְאִישׁ כִּי-יֵחָשֵׁב בְּעֵינָיו כַּמָּה נֶחְשָׁב הוּא בִּהְיוֹתוֹ כִבְלִימָה מַתְעֶה הוּא אֶת-נַפְשׁוֹ׃ ד אַךְ יִבְחַן אִישׁ אֶת-מַעֲשֵׂהוּ וְאָז יִשְׂמַח בְּמַעֲשָׂיו לְבַדּוֹ וְלֹא לְנֹכַח רֵעֵהוּ׃ ה כִּי אִישׁ אִישׁ כֹּבֶד מַשָּׂאוֹ יִשָּׂא׃ ו הַתַּלְמִיד לִמְלַמְּדוֹ דֵעָה יִתֵּן חֵלֶק מִכָּל-טוּבוֹ׃ ז אַל-תַּשִּׁאוּ נַפְשֹׁתֵיכֶם הָאֱלֹהִים אֵין לְהָתֵל בּוֹ כִּי כַּאֲשֶׁר יִזְרַע אִישׁ כֵּן יִקְצֹר׃(איוב ד' ח') ח כִּי-הַזֹּרֵע לִבְשָׂרוֹ יִקְצֹר קְצִיר בְּשְׂרוֹ כִּלָּיוֹן חָרוּץ וְהַזֹּרֵעַ לָרוּחַ יִקְצֹר קְצִיר הָרוּחַ חַיֵּי עוֹלָם׃(הושע י' יב') ט וַאֲנַחְנוּ בַּל-תִּרְפֶּינָה יָדֵינוּ בַּעֲשׂוֹת טוֹב כִּי-נִקְצֹר בְּעִתּוֹ אִם-לֹא נִרְפֶּה׃(דברי הימים ב', טו' ז') י וְעַל-כֵּן אֵפוֹא בְּעוֹד יֶשׁ-לָנוּ יָדַיִם נֵטִיבָה-נָּא לְכָל-בְּנֵי אָדָם וְעַל כֻּלָּם לִבְנֵי בֵית הָאֱמוּנָה׃ יא רְאוּ מָה-רַב הַמִּכְתָּב הַזֶּה אֲשֶׁר-כָּתַבְתִּי אֲלֵיכֶם בְּיָדִי׃ יב אֵלֶּה הַמְבַקְשִׁים לְהִתְיַפּוֹת לָעֵינַיִם יְאַלְּצוּ אֶתְכֶם לְהִמּוֹל רַק לְמַעַן בַּל-יֵרָדְפוּ עַל-דְּבַר צְלַב הַמָּשִׁיחַ׃ יג וְהַנִּמּוֹלִים הָהֵם אֶת-הַתּוֹרָה אֵינָם שֹׁמְרִים רַק חֶפְצָם כִּי תִמּוֹלוּ לְמַעַן יִתְהַלְלוּ בִּבְשַׂרְכֶם׃ יד וַאֲנִי חָלִילָה לִּי מֵהִתְהַלֵּל זוּלָתִי בִּצְלַב יֵשׁוּעַ הַמָּשִׁיחַ אֲדֹנֵינוּ אֲשֶׁר-בּוֹ הָעוֹלָם צָלוּב-לִי וַאֲנִי צָלוּב לָעוֹלָם׃ טו כִּי-בַּמָּשִׁיחַ יֵשׁוּעַ אֵין יֶתֶר עָז לֹא לַמּוּלָה וְלֹא לָעָרְלָה כִּי אִם-לִבְרִיאָה חֲדָשָׁה׃ טז וְכָל-הַמְיַשְּׁרִים לֶכֶת לְפִי קְנֵה הַמִּדָּה הַזֹּאת שָׁלוֹם וְחֶסֶד עֲלֵיהֶם וְעַל-יִשְׂרָאֵל עַם הָאֱלֹהִים׃ יז מֵעַתָּה וָהָלְאָה אַל-יַלְאֵנִי עוֹד אִישׁ כִּי אוֹת חוֹתַם הָאָדוֹן יֵשׁוּעַ נֹשֵׂא אֲנִי בִּבְשָׂרִי׃ יח אַחַי חֶסֶד יֵשׁוּעַ הַמָּשִׁיחַ אֲדֹנֵינוּ עִם-רוּחֲכֶם אָמֵן׃