ד א וַאֲנִי אֹמֵר הַיּוֹרֵשׁ כָּל-עוֹד הוּא יֶלֶד אֵינֶנּוּ מְשֻׁנֶּה מֵעָבֶד אַף כִּי-הוּא אֲדוֹן כָּל-הַנַּחֲלָה׃ ב וְהוּא נָתוּן בִּידֵי בֶן-מֶשֶׁק הַבַּיִת וּפְקִידָיו עַד הַיּוֹם הַהוּא אֲשֶׁר יָעַד לוֹ אָבִיו׃ ג כֵּן גַּם-אֲנַחְנוּ בִּימֵי הַיַּלְדוּת כַּעֲבָדִים הָיִינוּ לִיסֹדוֹת הָרָאשִׁים הַשְּׁפָלִים בֶּחָלֶד׃ ד אַךְ כַּאֲשֶׁר מָלְאוּ הַיָּמִים שָׁלַח אֱלֹהִים אֶת-בְּנוֹ (תהילים ב' ז') אֲשֶׁר נוֹלַד מֵרֶחֶם אִשָּׁה וַאֲשֶׁר נָתוּן תַּחַת מִשְׁטַר הַתּוֹרָה׃(בראשית יז' יב') ה לִפְדּוֹת אֶת-הַנְּתוּנִים תַּחַת מִשְׁטַר הַתּוֹרָה לְמַעַן נְקַבֵּל מִשְׁפַּט הַבָּנִים׃ ו וְיַעַן בָּנִים אַתֶּם שָׁלַח אֲלֵיכֶם אֱלֹהִים אֶת-רוּחַ בְּנוֹ בְּקֶרֶב לְבָבֵנוּ אֲשֶׁר תִּקְרְאוּ-בוֹ אָבִינוּ אָבִינוּ׃ ז עַל-כֵּן אֵינְךָ עוֹד עֶבֶד כִּי בֵן אָתָּה וְאִם-בֵּן גַּם-יוֹרֵשׁ נַחֲלַת הָאֱלֹהִים עַל-יְדֵי הַמָּשִׁיחַ׃ ח וְהִנֵּה לְפָנִים טֶרֶם יְדַעְתֶּם אֶת-הָאֱלֹהִים הִשְׁתַּחֲוִיתֶם לְלֹא-אֱלֹהֵי אֱמֶת׃ ט וְעַתָּה אַחֲרֵי אֲשֶׁר יְדַעְתֶּם אֶת-הָאֱלֹהִים וְאַף גַּם-נוֹדַעְתֶּם לוֹ אֵיךְ תָּשׁוּבוּ אֶל-הַיְסֹדוֹת הַשְּׁפָלִים הָאֲמֵלָלִים כִּי תַחְפְּצוּ לְעָבְדָם עוֹד׃ י אַתֶּם שֹׁמְרִים יָמִים וָחֳדָשִׁים וּמוֹעֲדִים וְשָׁנִים׃ יא וַאֲנִי יָרֵאתִי כִּי כֹחִי כִּלִּיתִי בָכֶם לָרִיק׃ יב הֱיוּ-נָא כָמֹנִי כַּאֲשֶׁר גַּם-אֲנִי כְמוֹכֶם רְאוּ הִנְנִי מִתְחַנֵּן אֲלֵיכֶם אַחַי כִּי מֵעוֹדְכֶם לֹא עֲשִׂיתֶם-לִי רָעָה׃ יג וְאַתֶּם יֹדְעִים כִּי בְלֹא כֹחַ בְּעַצְמוֹתָי הוֹדַעְתִּי אֶתְכֶם אֶת-הַבְּשׂרָה בַּתְּחִילָּה׃ יד וּבְכוּר עָנְיִי הַצֹּרֵף בְּשָׂרִי לֹא מְאַסְתֶּם וְלֹא גְעַלְתֶּם גִּי כְמַלְאַךְ אֱלֹהִים רְאִיתֶם פָּנַי כִּרְאוֹת פְּנֵי יֵשׁוּעַ הַמָּשִׁיחַ׃ טו וְאַיֵּה אֵפוֹא עַתָּה אָשְׁרְכֶם עֵד אֲנִי לָכֶם כִּי בְהִדָּרֵשׁ מִכֶּם גַּם-עֵינֵיכֶם תְּנַקְּרוּן לְתִתָּן-לִי׃ טז הַאִם לְאוֹיֵב הָיִיתִי עָתָּה בַּעֲבוּר הָאֱמֶת אֲשֶׁר אַגִּיד לָכֶם׃ יז לֹא טוֹבָה קִנְאַת הַמְקַנְאִים לָכֶם הַחֲפֵצִים לְהַפְרִיד בֵּין הַדְּבֵקִים לְמַעַן בָּהֶם תִּדְבָּקוּן׃ יח טוֹב הוּא לְקַנֵּא תָמִיד לְדָבָר טוֹב וְלֹא לְבַד בִּרְאֹתְכֶם אֶת-פָּנָי׃ יט יְלָדַי עוֹד הַפַּעַם חֶבְלֵי לֵדָה יֹאחֲזֻנִי עֲלֵיכֶם עַד אֲשֶׁר-יוּצַר בָּכֶם הַמָּשִׁיחַ׃ כ וְזֶה חֶפְצִי עַתָּה לִהְיוֹת עִמָּכֶם וּלְשַׁנּוֹת אֶת-קוֹלִי כִּי בִמְבוּכָה אֲנִי עַל-אֹדוֹתֵיכֶם׃ כא אִמְרוּ לִי אַתֶּם הַחֲפֵצִים לִהְיוֹת תַּחַת מִשְׁטַר הַתּוֹרָה הַאִם לֹא תָבִינוּ דִּבְרֵי הַתּוֹרָה׃ כב הֵן כָּתוּב כִּי שְׁנֵי בָנִים הָיוּ לְאַבְרָהָם הָאֶחָד מִן-הַשִּׁפְחָה וְהַשֵּׁנִי מִן-הַגְּבִירָה׃(בראשית כא' ב'; כא' ט') כג בֶּן-הַשִּׁפְחָה נוֹלַד כְּדֶרֶךְ כָּל-בָּשָׂר (בראשית טז' ב') וּבֶן-הַגְּבִירָה בִּדְבַר אֱלֹהִים׃(בראשית יז' יט') כד וְאֵלֶּה הַדְּבָרִים הֵם לְמָשָׁל כִּי שְׁתֵּי בְרִיתוֹת הֵנָּה הָאַחַת מֵהַר סִינַי (שמות כד' ח') הַיֹּלֶדֶת יְלָדֶיהָ לְעַבְדוּת וְזֹאת הִיא הָגָר׃ כה כִּי הָגָר הִיא הַר סִינַי בַּעֲרָב וְדָמְתָה לִירוּשָׁלַיִם כַּיּוֹם כַּאֲשֶׁר הִיא בְעַבְדוּתָהּ עִם-בָּנֶיהָ׃ כו אַךְ יְרוּשָׁלַיִם אֲשֶׁר לְמַעְלָה הִיא עִיר הַחֹפֶשׁ וְהִיא הָאֵם לְכֻלָּנוּ׃ כז כִּי כָתוּב׃ כח רָנִּי עֲקָרָה לֹא יָלָדָה פִּצְחִי רִנָּה וְצַהֲלִי לֹא-חָלָה כִּי-רַבִּים בְּנֵי-שׁוֹמֵמָה מִבְּנֵי בְעוּלָה׃(ישעיהו נד' א') כט אוּלָם אֶחָי כְּיִצְחָק כֵּן בְּנֵי הַהַבְטָחָה אֲנָחְנוּ׃ ל וְכַאֲשֶׁר הַנּוֹלָד אָז כְּדֶרֶךְ כָּל-בָּשָׂר רָדַף אֶת-הַנּוֹלָד עַל-פִּי רוּחַ אֱלֹהִים כֵּן גַּם-עָתָּה׃ לא אֲבָל מָה אֹמֵר הַכָּתוּב גָּרֵשׁ הָאָמָה הַזֹּאת וְאֶת-בְּנָהּ כִּי לֹא יִירַשׁ בֶּן-הָאָמָה הַזֹּאת עִם בֶּן-הַגְּבִירָה׃(בראשית כא' י') לב עַל-כֵּן אַחַי לֹא-בְּנֵי הָאָמָה אֲנַחְנוּ כִּי אִם-בְּנֵי-חוֹרִים׃