ג א וְעַתָּה אִם-קַמְתֶּם עִם-הַמָּשִׁיחַ בַּקְּשׁוּ אֵת אֲשֶׁר לְמָעְלָה אֲשֶׁר שָׁם הַמָּשִׁיחַ יֹשֵׁב לִימִין אֱלֹהִים׃(תהילים קי' א') ב שִׂימוּ לִבְּכֶם לַאֲשֶׁר מֵעָל וְלֹא לַאֲשֶׁר בָּאָרֶץ׃ ג כִּי-מֵתִים אַתֶּם וְחַיֵּיכֶם צְפוּנִים עִם-הַמָּשִׁיחַ בֵּאלֹהִים׃ ד וְכַאֲשֶׁר יוֹפִיעַ הַמָּשִׁיחַ אֲשֶׁר הוּא חַיֵּינוּ אָז גַּם-אַתֶּם תּוֹפִיעוּ עִמּוֹ בִּכְבוֹדוֹ׃ ה עַל-כֵּן הַכְחִידוּ כְּלֵי תַאֲוַתְכֶם בָּאָרֶץ זְנוּנִים שִׁקּוּצִים וּתְשׁוּקוֹת זָרוֹת יֵצֶר רָע וְאַהֲבַת בֶּצַע אֲשֶׁר דָּמְתָה לַעֲבֹדַת אֱלִילִים׃ ו כִּי בִגְלַל אֵלֶּה שְׁפוּכָה חֲמַת אֱלֹהִים עַל-בְּנֵי הַמֶּרִי׃ ז וְגַם-אַתֶּם לְפָנִים כַּאֲשֶׁר יְשַׁבְתֶּם בְּתוֹכָם כֵּן הֲלַכְתֶּם בְּדַרְכֵיהֶם׃ ח אַךְ-עַתָּה הָסִירוּ כָל-אֵלֶּה מֵעֲלֵיכֶם גַּם-אַתֶּם זַעַף וְעֶבְרָה וְרִשְׁעָה וַחֲרָפוֹת וְדִבְרֵי נְבָלָה מִפִּיכֶם׃ ט אַל-תְּשַׁקְּרוּ אִישׁ בַּעֲמִיתוֹ אַחֲרֵי אֲשֶׁר פְּשַׁטְתֶּם אֶת-הָאָדָם הַקַּדְמֹנִי עִם-פְּעָלָיו׃(ויקרא יט' יא') י וּלְבַשְׁתֶּם אֶת-הָאָדָם הֶחָדָשׁ הוּא אֲשֶׁר הִתְחַדֵּשׁ בְּדַעַת כְּצֶלֶם יֹצְרוֹ׃(בראשית א' כז') יא אֲשֶׁר אֵין-בּוֹ יְוָנִי אוֹ יְהוּדִי נִמּוֹל אוֹ עָרֵל נִלְעַג לָשׁוֹן פֶּרֶא אָדָם עֶבֶד אוֹ בֶן-חוֹרִים כִּי הַכֹּל וּבַכֹּל הוּא הַמָּשִׁיחַ׃ יב וְאַתֶּם כִּבְחִירֵי הָאֱלֹהִים כִּקְדֹשָׁיו וִידִידָיו לִבְשׁוּ רַחֲמִים וַחֲסָדִים מִמְּקוֹר לִבְּכֶם רוּחַ שְׁפָלָה עֲנָוָה וְאֹרֶךְ אַפָּיִם׃ יג לָשֵׂאת אִישׁ אֶת-פְּנֵי רֵעֵהוּ וְלִסְלֹחַ לוֹ לִדְבַר רִיב כִּי-יִמָּצֵא בֵינֵיכֶם וּכְמוֹ אֲדֹנֵינוּ סָלַח לָכֶם כֵּן תִּסְלְחוּ גַּם-אַתֶּם׃ יד וְעַל-כָּל-אֵלֶּה לִבְשׁוּ אַהֲבָה אֲשֶׁר הִיא אֲגֻדַּת הַתְּמִימִים׃ טו וּשְׁלוֹם הָאֱלֹהִים אֲשֶׁר-נִבְחַרְתֶּם לוֹ בְּגוּף אֶחָד יִמְשֹׁל בְּקֶרֶב לִבְּכֶם וְאֶת-טוּבוֹ תַּכִּירוּ׃ טז וְתוֹרַת הַמָּשִׁיחַ תִּהְיֶה בְפִיכֶם תָּמִיד בְּכָל-חָכְמָה לְלַמֵּד וּלְעוֹרֵר אִישׁ אֶת-אָחִיהוּ בִּתְהִלּוֹת וְשִׁירוֹת וְזִמְרוֹת-יָהּ וּמִקֶּרֶב לִבְּכֶם תָּשִׁירוּ לֵאלֹהִים בְּתוֹדָה׃(תהילים ל' ה'; לד' ב') יז וְכֹל אֲשֶׁר-תַּעֲשׂוּ גַּם-בִּדְבַר שְׂפָתַיִם גַּם-בְּמַעֲשֵׂה יָדָיִם עָשׂוּ כֹל בְּשֵׁם יֵשׁוּעַ אֲדֹנֵינוּ וּלְהֹדוֹת עַל-יָדוֹ לֵאלֹהִים אָבִינוּ׃ יח וְאַתֵּנָה נָשִׁים הִכָּנַעְנָה לְבַעֲלֵיכֶן כַּמִּשְׁפָּט לִפְנֵי אֲדֹנֵינוּ׃ יט בַּעֲלֵי אִשָּׁה אֶהֱבוּ אֶת-נְשֵׁיכֶם וְלֹא תִהְיוּ לָהֶן לְמֹרַת רוּחַ׃ כ שִׁמְעוּ בָנִים אֶל-יֹלְדֵיכֶם לְכֹל אֲשֶׁר יֹאמֵרוּן (משלי ו' כ') כִּי לְרָצוֹן הוּא לַאֲדֹנֵנוּ׃ כא אָבוֹת אַל-תַּכְעִיסוּ אֶת-בְּנֵיכֶם פֶּן-יֹאמְרוּ נוֹאָשׁ׃ כב וְאַתֶּם עֲבָדִים שִׁמְעוּ אֶל-אֲדֹנֵיכֶם אֲדֹנֵי הַבָּשָׂר לְכֹל אֲשֶׁר יֹאמֵרוּן וְלֹא בַעֲבֹדָה לְמַרְאֵה עֵינַיִם לְהָפִיק רָצוֹן מִבְּנֵי אָדָם כִּי אִם-בְּתָם-לֵב כְּיִרְאֵי יְהוָֹה׃ כג וְכֹל אֲשֶׁר תַּעֲשׂוּ עֲשׂוּ בְכָל-נַפְשְׁכֶם כְּמוֹ לַיהוָֹה וְלֹא לִבְנֵי-אָדָם׃ כד הֵן יְדַעְתֶּם כִּי מֵאֵת יְהוָֹה תִּקְחוּ שְׂכַרְכֶם וְנַחֲלַתְכֶם כִּי אֶת-אֲדֹנֵינוּ הַמָּשִׁיחַ אַתֶּם עֹבְדִים׃ כה כִּי הַמְעַוֵּל יִקְצָר-עָוֶל כַּאֲשֶׁר עָשָׂה וְאֵין מַשּׂוֹא פָנִים׃(דברי הימים ב', יט' ז')