יח א אַחַר הַדְּבָרִים הָאֵלֶּה עָזַב אֶת-אַתִּינַס וַיָּבֹא אֶל-קוֹרִנְתּוֹס׃ ב וַיִּמְצָא שָׁם אִישׁ יְהוּדִי אֲשֶׁר הָיָה שְׁמוֹ עֲקִילַס וְהוּא יְלִיד פּוֹנְטוֹס וְעַתָּה זֶה מִקָּרוֹב בָּא מֵאִיטַלְיָא עִם-פְּרִיסְקְלָה אִשְׁתּוֹ כִּי מֵאֵת קְלוֹדְיוֹס יָצָא צָו אֶל-כָּל-הַיְּהוּדִים לְהֵעָלוֹת מִקֶּרֶב רוֹמִי וּלְעָזְבָהּ וַיָּבֹא אֲלֵיהֶם אֶל-מְעוֹנָם׃ ג וְיַעַן כִּי הָיוּ בַעֲלֵי מְלָאכָה אַחַת עַל-כֵּן הוֹאִיל לָשֶׁבֶת עִמָּהֶם וַעֲשׂה בַמְּלָאכָה וְהֵם אֹרְגִים מַסֵּכוֹת לְאֹהָלִים׃ ד וּבְכָל-שַׁבָּת וְשַׁבָּת דִּבֶּר עִם-הַיְּהוּדִים בְּבֵּת-הַכְּנֵסֶת וַיְלַמֵּד דַּעַת גַּם-אֶת-הַיְּהוּדִים וְגַם-אֶת-הַיְּוָנִים׃ ה וַיְהִי כְּבֹא אֵלָיו סִילָא וְטִמוֹתִיּוֹס מִמַּקְדּוֹנְיָא הִתְנַדֵּב פּוֹלוֹס כֻּלּוֹ רַק לִדְבַר הַדָּבָר בְּהַרְאֹתוֹ לַיְּהוּדִים בָּרוּר כִּי יֵשׁוּעַ הוּא הַמָּשִׁיחַ׃ ו וְהֵם כִּי מָרוּ וְגַם-גִּדְּפוּ וַיְנַעֵר הוּא אֶת-חִצְנוֹ וַיֹּאמֶר אֲלֵיהֶם דִּמְכֶם בְּרֹאשְׁכֶם וַאֲנִי נָקִי מִכֶּם אֵלְכָה-לִּי עַתָּה אֶל-הַגּוֹיִם׃(יחזקאל ג' יט') ז וַיֵּלֵךְ מִשָּׁם וַיָּבֹא בֵּיתָה אִישׁ אֶחָד טִיטוֹס יוּסְטוֹס הָיָה שְׁמוֹ הוּא הָיָה יְרֵא אֱלֹהִים וּבֵיתוֹ אֵצֶל בֵּית-הַכְּנֵסֶת׃ ח וּקרִיסְפּוֹס רֹאשׁ בֵּית-הַכְּנֵסֶת הֶאֱמִין בָּאָדוֹן הוּא וְכָל-בֵּיתוֹ עִמּוֹ וְעוֹד קוֹרִנְתִּים רַבִּים כַּאֲשֶׁר שָׁמְעוּ כֵּן הֶאֱמִינוּ וַיִּטָּבֵלוּ׃ ט וּדְבַר הָאָדוֹן הָיָה אֶל-פּוֹלוֹס בֶּחָזוֹן לָיְלָה אַל-תִּירָא כִּי אִם-תְּדַבֵּר וְלֹא תֶחֱרָשׁ׃(ישעיהו מא' י') י כִּי-עִמְּךָ אָנֹכִי וְאִישׁ לֹא יִגַּע בְּךָ לְרָעָה כִּי עַם-רָב לִי בָּעִיר הַזֹּאת׃ יא וַיֵּשֵׁב שָׁם שָׁנָה וְשִׁשָּׁה חֳדָשִׁים וַיְלַמֵּד אֹתָם אֶת-דְּבַר הָאֱלֹהִים׃ יב וַיְהִי אָז גַּלִּיּוֹן נְצִיב מְדִינַת אֲכַיָּא וְהַיְּהוּדִים כֻּלָּם יַחַד קָמוּ עַל-פּוֹלוֹס וַיַּעֲמִידוּהוּ לִפְנֵי כִסֵּא הַמִּשְׁפָּט׃ יג וַיֹּאמְרוּ הָאִישׁ הַזֶּה מְפַתֶּה אֶת-הָעָם לַעֲבֹד אֶת-הָאֱלֹהִים בַּעֲבֹדָה אֲשֶׁר לֹא כַתּוֹרָה׃ יד וְאוּלָם אַךְ-הוֹאִיל פּוֹלוֹס לִפְתֹּחַ שְׂפָתָיו וְגַלִּיּוֹן הִקְדִּימוֹ וַיֹּאמֶר אֶל-הַיְּהוּדִים לוּ אִם-הָיָה דִין רֶשַׁע אוֹ דְּבַר בְּלִיַּעַל כִּי-אָז נָשָׂאתִי אֶת-פְּנֵיכֶם אַתֶּם הַיְּהוּדִים כַּמִּשְׁפָּט׃ טו אֶפֶס כִּי-רַק בְּתוֹכָחוֹת עַל-מִלִּין עַל-שִׂים שֵׁמוֹת וְעַל-תּוֹרַתְכֶם אַתֶּם נְדוֹנִים הָבוּ לָכֶם עֵצָה אַתֶּם לְבַדְּכֶם לָדַעַת מָה הַטּוֹב וַאֲנִי אֵין נַפְשִׁי לִהְיוֹת שֹׁפֵט עַל-הַדָּבָר הַזֶּה׃ טז וַיְגָרֶשׁ אֹתָם מִלִּפְנֵי כִסֵּא הַמִּשְׁפָּט׃ יז וַיִּתְפְּשׂוּ כֻלָּם אֶת-סוֹסְתְּנִיס רֹאשׁ בֵּית הַכְּנֵסֶת וַיַּכֻּהוּ לִפְנֵי-כִסֵּא הַמִּשְׁפָּט וְגַלִּיוֹן רֹאֶה וַיְהִי כְּלֹא רֹאֶה׃ יח וַיִּתְמַהְמַהּ שָׁם פּוֹלוֹס עוֹד יָמִים רַבִּים אַחַר כֵּן נִפְרַד מֵעִם הָאַחִים וַיֵּשֵׁב בָּאֳנִיָּה לָלֶכֶת אֶל-סוּרְיָא וְהוּא לָקַח עִמּוֹ אֶת-פְּרִיסְקְלָה וְאֶת-עֲקִילַס וַיְגַלַּח אֶת-רֹאשׁוֹ בְּקַנְכְּרַי כִּמְלֹאת יְמֵי נִדְרוֹ אֲשֶׁר נָדָר׃ יט וַיָּבֹאוּ לְאֶפְסוֹס וַיַּנִּיחֵם שָׁם וְהוּא בָא אֶל-בֵּית-הַכְּנֵסֶת וַיְדַבֶּר-שָׁם אֶל-הַיְּהוּדִים׃ כ וְהֵם חִלּוּ אֶת-פָּנָיו כִּי יַאֲרִיךְ לָשֶׁבֶת בְּתוֹכָם רַק הוּא לֹא נֵאוֹת לָהֶם׃ כא כִּי אִם-נִפְרַד מֵעִמָּם בְּאָמְרוֹ חַיָּב אֲנִי לָחֹג אֶת-הֶחָג הַבָּא בִּירוּשָׁלַיִם וְאַחֲרֵי-כֵן אָשׁוּבָה אֲלֵיכֶם אִם-יִרְצֶה יְהוָֹה וַיֵּלֶךְ דֶּרֶךְ יָם מֵאֶפְסוֹס׃ כב וַיָּבֹא אֶל-קִסְרִין וַיַּעַל לִפְקֹד אֶת-הָעֵדָה לְשָׁלוֹם וַיָּשָׁב לָרֶדֶת אֶל-אַנְטְיוֹכְיָא׃ כג וַיְהִי שָׁם יָמִים אֲחָדִים וַיֵּצֵא מִשָּׁם וַיַּעֲבֹר הָלֹךְ וְעָבֹר בְּאֶרֶץ גָּלַטְיָא וּפְרוּגְיָא וַיְאַמֵּץ אֶת-כָּל-הַתַּלְמִידִים׃ כד וְאִישׁ אֶחָד יְהוּדִי בָּא אֶל-אֶפְסוֹס שְׁמוֹ אַפּוֹלוֹס וַאֲלֶכְסַנְדְּרִיָּא עִיר מוֹלַדְתּוֹ אִישׁ דְּבָרִים וּמָהִיר בַּכְּתוּבִים׃ כה הוּא יָדַע אֶת-דֶּרֶךְ הָאָדוֹן וְרוּחוֹ כִּלַהַט יָצָא וַיְדַבֵּר וַיְלַמֵּד הֵיטֵב אֶת-דִּבְרֵי יֵשׁוּעַ רַק הוּא לֹא יָדַע כִּי אִם-טְבִילַת יוֹחָנָן לְבַדָּהּ׃ כו וְהוּא הֵחֵל לְהַשְׁמִיעַ דְּבָרוֹ בְּאֹמֶץ לֵב בְּבֵית הַכְּנֵסֶת וַיִּשְׁמְעוּ אֹתוֹ פְּרִיסְקְלָה וַעֲקִילַס וַיְבִיאֻהוּ אֶל-בֵּיתָם וַיְבוֹנְנוּהוּ אֶת-דֶּרֶךְ הָאֱלֹהִים עוֹד יוֹתֵר מְפֹרָשׁ׃ כז וּבִנְטוֹת לִבּוֹ לָלֶכֶת אֶל-אֲכַיָּא וַיְעוֹרוּהוּ הָאַחִים וַיִּכְתְּבוּ אֶל-הַתַּלְמִידִים לֶאֱסֹף אֹתוֹ אֲלֵיהֶם וְהוּא כְּבֹאוֹ שָׁמָּה עָזַר הַרְבֵּה לַאֲשֶׁר הָפְנוּ לְהַאֲמִין עַל-יְדֵי הֶחָסֶד׃ כח כִּי הוּא גָבַר עַל-הַיְּהוּדִים בִּפְנֵי-כֹל וַיֹּכַח בַּכְּתוּבִים כִּי יֵשׁוּעַ הוּא הַמָּשִׁיחַ׃