ב א וְזֹאת אֲנִי דֹרֵשׁ מִמְּךָ לִפְנֵי כָל-דָּבָר לְהַעְתִּיר רִנָּה וּתְפִלָּה תְּחִנָּה וְתוֹדָה בְּעַד כָּל-בְּנֵי-אָדָם׃ ב בְּעַד מַלְכֵי אֶרֶץ וְכָל-אֲשֶׁר מִשְׂרָה עַל-שִׁכְמָם לְמַעַן נִחְיֶה חַיֵּי מְנוּחָה וְשַׁלְוָה בְּיִרְאַת אֱלֹהִים וּבְיִשְׁרַת לֵבָב׃(עזרא ו' י'; ירמיהו כט' ז') ג טוֹב הַדָּבָר הַזֶּה וּלְרָצוֹן בְּעֵינֵי אֱלֹהִים מוֹשִׁיעֵנוּ׃ ד אֲשֶׁר חָפֹץ יַחְפֹּץ כִּי יִוָּשְׁעוּ כָל-בְּנֵי-אָדָם וְיִלְמְדוּ לָדַעַת אֶת-אֲמִתּוֹ׃(יחזקאל יח' כג') ה כִּי אֱלֹהִים אֶחָד הוּא וּמֵלִיץ אֶחָד בֵּין אֱלֹהִים וּבֵין אֲנָשִׁים הוּא הָאִישׁ יֵשׁוּעַ הַמָּשִׁיחַ׃(ישעיהו מה' יד') ו אֲשֶׁר נָתַן אֶת-נַפְשׁוֹ כֹּפֶר בְּעַד כָּל-בְּנֵי אָדָם (ישעיהו נג' יא') וְעֵדוּת זוּ עָלֵינוּ לְהַשְׁמִיעַ לְעֵת מְצֹא׃ ז וַאֲנִי נִקְרֵאתִי לִהְיוֹת-לָהּ לְמַגִּיד וְשָׁלִיחַ וּמוֹרֶה אֱמֶת וֶאֱמוּנָה לַגּוֹיִם הֵן אֱמֶת אֲדַבֵּרָה בַּמָּשִׁיחַ וְלֹא שֶׁקֶר מִלָּי׃ ח וְלָכֵן הִנְנִי מְבַקֵּשׁ כִּי הָאֲנָשִׁים יִתְפַּלְּלוּ בְכָל-מָקוֹם וְיִשְׂאוּ יְדֵיהֶם קֹדֶשׁ בִּבְלִי-כַעַשׂ וּמָדוֹן׃(תהילים קלד' ב') ט וּכְמוֹ כֵן גַּם-הַנָּשִׁים תִּלְבַּשְׁנָה שִׂמְלוֹת-חֵן הָרְאֻיּוֹת לָהֶן בְּבשֶׁת פָּנִים וּבְטוּב טָעַם לֹא בְחַחְלְפוֹת רֹאשָׁן וְלֹא בְזָהָב וּפְנִינִים וְלֹא בְמַחְלָצוֹת יְקָרוֹת׃ י כִּי אִם-בְּמַעֲשִׂים טוֹבִים כַּאֲשֶׁר נָכוֹן לַנָּשִׁם אֲשֶׁר בְּיִרְאַת אֱלֹהִים חֶפְצָן׃ יא הָאִשָּׁה תִּלְמַד בְּהַשְׁקֵט וְנַפְשָׁהּ כָּלִיל תִּכָּנֵעַ׃ יב וְאֵינֶנִּי נֹתֵן לָאִשָּׁה לְלַמֵּד וְלֹא לְהִשְׂתָּרֵר עַל-הָאִישׁ כִּי אִם-הַחֲרֵשׁ תַּחֲרִישׁ׃ יג כִּי אָדָם נוֹצַר רִאשֹׁנָה וְאַחֲרֵי-כֵן חַוָּה׃(בראשית ב' כא'-כב') יד וְאָדָם לֹא נִפְתָּה כִּי אִם-הָאִשָּׁה כַּאֲשֶׁר שָׁמְעָה דִבְרֵי הַמְפַתֶּה עָבְרָה בְּרִית׃(בראשית ג' ו') טו אַךְ יֶשׁ-לָהּ תְּשׁוּעָה בַבָּנִים אֲשֶׁר תֵּלֵד אִם צְנוּעָה הִיא וּבְמַעְגְּלֵי אֱמוּנָה וְאַהֲבָה וּבְדֶרֶךְ הַקֹּדֶשׁ תֵּיטִיב לָכֶת׃