ה א וְעַל-דְּבַר הָעִתִּים וְהַזְּמַנִּים אֵין-דָּבָר אַחַי לְהִכָּתֵב לָכֶם׃ ב הֲלֹא יְדַעְתֶּם הֵיטֵב כִּי יוֹם-יְהוָֹה כְּגַנָּב בַּלַּיְלָה יָבוֹא׃ ג כַּאֲשֶׁר יֹאמְרוּ שָׁלוֹם וְשַׁלְוָה (ירמיהו ו' יד') אָז פִּתְאֹם יָבוֹא עֲלֵיהֶם אֵידָם כְּחֶבְלֵי יוֹלֵדָה (ירמיהו ד' לא') וְלֹא יִמָּלֵט לָהֶם פָּלִיט׃(ישעיהו י' ג') ד אֲבָל אַתֶּם אַחַי אֵינְכֶם בַּחֹשֶׁךְ אֲשֶׁר יָבוֹא עֲלֵיכֶם הַיּוֹם כְּגַנָּב׃ ה כִּי כֻלְּכֶם בְּנֵי אוֹר וּבְנֵי יוֹם אַתֶּם לֹא בְנֵי לַיְלָה וְלֹא בְנֵי חשֶׁךְ אֲנָחְנוּ׃ ו עַל-כֵּן אֵין לָנוּ לִישׁוֹן כִּשְׁאָר הָאֲנָשִׁים כִּי אִם-נִשְׁקֹד וְנִשְׁתַּמֵּר מִשִּׁכָּרוֹן׃ ז כִּי הַיְשֵׁנִים יִישְׁנוּ בַלָּיְלָה וְהַשִּׁכֹּרִים יִשְׁכְּרוּן בַּלָּיְלָה׃ ח וַאֲנַחְנוּ בְנֵי יוֹם נִשְׁתַּמֵּר מִשְּׁכָּרוֹן וְנִלְבַּשׁ שִׁרְיוֹן אֱמוּנָה וְאַהֲבָה וּלְכוֹבַע לָנוּ תִּקְוַת הַיְשׁוּעָה׃(ישעיהו נט' יז') ט כִּי לֹא-יָצַר אֹתָנוּ אֱלֹהִים לְכַלֹּתֵנוּ בְאַפּוֹ כִּי אִם-לְהָבִיא לָנוּ יְשׁוּעָה בְּיַד-יֵשׁוּעַ הַמָּשִׁיחַ אֲדֹנֵינוּ׃ י הוּא אֲשֶׁר מֵת בַּעֲדֵנוּ וְאִם-נָקִיץ אוֹ-נִישַׁן עִמּוֹ נִחְיֶה יַחְדָּו׃ יא עַל-כֵּן הַזְהִירוּ אִישׁ אֶת-רֵעֵהוּ וְהָשִׁיבוּ אִישׁ אֶת-נֶפֶשׁ אָחִיו כַּאֲשֶׁר עֲשִׂיתֶם עַד-כֹּה׃ יב וַאֲנַחְנוּ נִפְצַר בָּכֶם אַחִים לָדַעַת בְּשׂוּם לֵב אֶת-הָעֲמֵלִים בָּכֶם וְאֶת-הַנִּצָּבִים עֲלֵיכֶם בְּשֵׁם הָאָדוֹן וְאֶת-הַמּוֹכִיחִים אֶתְכֶם׃ יג וּלְהַכִּיר יְקַר עֶרְכָּם הַגָּדוֹל לְאַהֲבָה אֹתָם לְמַעַן פָּעֳלָם וְהַחֲזִיקוּ שָׁלוֹם בֵּינֵיכֶם׃ יד וְאַתֶּם אַחֵינוּ נַזְהִיר אֶתְכֶם הוֹכִיחוּ אֶת-הַמַּמְרִים אַמְּצוּ אֶת-רַכֵּי הַלֵּבָב (ישעיהוה לה' ג'-ד') סַעֲדוּ אֶת-החֹלִים וְהַאֲרִיכוּ אַף לְכָל-אָדָם׃ טו הִשָּׁמְרוּ פֶּן-יִגְמֹל אִישׁ לְאִישׁ רָעָה תַּחַת רָעָה כִּי אִם-רִדְפוּ לְהֵיטִיב תָּמִיד לְאִישׁ אִישׁ מִכֶּם וְגַם לְכָל-אָדָם׃(משלי כ' כב') טז וְאַךְ שְׂמֵחִים תִּהְיוּ כָּל-הַיָּמִים׃(תהילים פט' יז'; ישעיהו סא' י') יז וְלֹא תַחְדְּלוּ מֵהִתְפַּלֵּל תָּמִיד׃ יח הוֹדוּ עַל-כָּל-דָּבָר כִּי-זֶה לָכֶם חֵפֶץ אֱלֹהִים בְּיֵשׁוּעַ הַמָּשִׁיחַ׃ יט לֹא תְכַבּוּ אֶת-הָרוּחַ׃ כ וְאֶת-הַנְּבוּאוֹת לֹא תִפְרָעוּ׃ כא בַּחֲנוּ כָּל-דָּבָר וְהַחֲזִיקוּ בַּטּוֹב׃ כב וּמִכָּל-שֶׁמֶץ דָּבָר רָע אַף לְמַרְאֵה עָיִן הַרְחִיקוּ רַגְלֵיכֶם׃(איוב א' א') כג וֵאלֹהֵי הַשָּׁלוֹם הוּא יְקַדֵּשׁ אֶתְכֶם מֵחָחֵל וְעַד-כַּלֵּה וְיִשְׁמָרְכֶם מִכָּל-רָע בְּרוּחַ נֶפֶשׁ וּגְוִיָּה לְמוֹעֵד בּוֹא אֲדֹנֵינוּ יֵשׁוּעַ הַמָּשִׁיחַ׃ כד נֶאֱמָן הוּא הַקֹּרֵא אֶתְכֶם וְהוּא גַּם-יַעֲשֶׂה׃ כה אָנָּא אֶחָי הִתְפַּלְּלוּ-נָא בַּעֲדֵנוּ׃ כו שַׁאֲלוּ לִשְׁלוֹם כָּל-הָאַחִים בִּנְשִׁיקַת הַקֹּדֶשׁ׃ כז הִנְנִי מַשְׁבִּיעֲכֶם בַּאֲדֹנֵינוּ לָתֵת הָאִגֶּרֶת הַזֹּאת לְהִקָּרֵא בְאָזְנֵי כָל-הָאַחִים הַקְּדוֹשִׁים׃ כח חֶסֶד יֵשׁוּעַ הַמָּשִׁיחַ אֲדֹנֵינוּ עִמָּכֶם אָמֵן׃