ב א וְעַתָּה הָסִירוּ מִכֶּם כָּל-רִשְׁעָה וְכָל-מִרְמָה וַחֲנֻפָּה וְקִנְאָה וְכָל-שְׂפַת רָכִיל׃ ב וּכְעוֹלֲלִים אֲשֶׁר נוֹלְדוּ מִקָּרוֹב בַּקְּשׁוּ לִשְׂבֹּעַ חָלָב זַךְ מִשְּׁדֵי בִינָה אֲשֶׁר עָלָיו תִּגְדְּלוּ לִישׁוּעָה׃ ג אִם-רַק בֶּאֱמֶת וּבְתָמִים טְעַמְתֶּם כִּי-טוֹב אֲדֹנֵינוּ׃(תהילים לד' ט') ד וְאֵלָיו בָּאתֶם כְּמוֹ אֶל-אֶבֶן חַיִּים אֲשֶׁר מָאֲסוּ בְנֵי אָדָם אַךְ נִבְחֶרֶת הִיא וִיקָרָה לֵאלֹהִים׃(תהילים קיח' כב') ה וְגַם-אַתֶּם אַבְנֵי חַיִּים לְהִבָּנוֹת הֵיכָל עֶלְיוֹן לִכְהֻנַּת קֹדֶשׁ לְהַקְרִיב זִבְחֵי-רוּחַ לְרֵיחַ נִיחֹחַ לֵאלֹהִים בְּיַד יֵשׁוּעַ הַמָּשִׁיחַ׃(ישעיהו סא' ו') ו וְזֶה הוּא שֶׁאָמַר בַּמִּקְרָא הִנְנִי יִסַּד בְּצִיּוֹן אֶבֶן בֹּחַן פִּנָּה וִיקָרָה וְהַמַּאֲמִין בָּהּ לֹא יֵבוֹשׁ׃(ישעיהו כח' טז') ז עַל-כֵּן לָכֶם הַמַּאֲמִינִים הוּא לְאֶבֶן חֵפֶץ וְלַאֲשֶׁר אֵינָם מַאֲמִינִים הוּא אֶבֶן מָאֲסוּ הַבּוֹנִים (ישעיהו ח' יד') הָיְתָה לְרֹאשׁ פִּנָּה׃(תהילים קיח' כב') ח וּלְאֶבֶן נֶגֶף וּלְצוּר מִכְשׁוֹל כִּי נִכְשְׁלוּ-בוֹ בְּחֹסֶר אֱמוּנָתָם כַּאֲשֶׁר גַּם-לְהִכָּשֵׁל נוֹעֲדוּ מֵאָז׃ ט וְאַתֶּם הִנְּכֶם בְּחִירֵי-יָהּ מַמְלֶכֶת כֹּהֲנִים גּוֹי קָדוֹשׁ (שמות יט' ו') וְעַם סְגֻלָּה לוֹ לְסַפֵּר תְּהִלָּתוֹ (ישעיהו מג' כא') אֲשֶׁר קָרָא אֶתְכֶם מֵחשֶׁךְ לְאוֹר פֶּלִאי׃ י אֲשֶׁר לְפָנִים לֹא-עָם הֱיִיתֶם וְעַתָּה עַם אֱלֹהִים לְפָנִים בָּנִים לֹא-רֻחָמוּ וְעַתָּה מְרֻחָמִים׃(הושע א' ו'; א' ט'; ב' כה') יא וַאֲנִי שֹׁאֵל מִכֶּם יְדִידִים כְּגֵרִים וְתוֹשָׁבִים (תהילים לט' יג') לְהִנָּזֵר מִתַּאֲוֹת הַבָּשָׂר הַנִּלְחָמוֹת בַּנָּפֶשׁ׃ יב וּלְהִתְהַלֵּךְ בְּמֵישָׁרִים בֵּין הַגּוֹיִם אֲשֶׁר דִּבְּרוּ עֲלֵיכֶם סָרָה כְּפֹעֲלֵי אָוֶן וְעַתָּה יִתְבֹּנְנוּ בְמַעֲשֵׂיכֶם הַטּוֹבִים וִיכַבְּדוּ אֶת-אֱלֹהִים בְּיוֹם פָּקְדוֹ׃(ישעיהו י' ג') יג וְהִכָּנְעוּ לְכָל-מִשְׂרָה אֲשֶׁר לִבְנֵי-אָדָם לְמַעַן הָאָדוֹן אִם-לַמֶּלֶךְ כַּאֲשֶׁר הוּא הָרֹאשׁ׃(משלי כד' כא') יד וְאִם-לַשָּׂרִים כַּאֲשֶׁר הֵם שְׁלוּחָיו לָתֵת נְקָמָה בְּפֹעֲלֵי אָוֶן וְכָבוֹד לְעֹשֵׂי טוֹב׃ טו כִּי כֵן חָפֵץ אֱלֹהִים בַּעֲשׁתְכֶם טוֹב לָשִׂים מַחְסוֹם לְפִי הַסְּכָלִים אֵין תְּבוּנָה בָּם׃ טז וֶהֱיוּ כִבְנֵי חוֹרִים אַךְ לֹא לָשִׁית חֻפְשַׁתְכֶם כְּמִכְסֶה עַל-פְּנֵי מַעֲשִׂים רָעִים כִּי אִם-כְּעַבְדֵי אֵל׃ יז כַּבְּדוּ כָל-אִישׁ כִּכְבוֹדוֹ אֶהֱבוּ אֶת-אֲחֵיכֶם יְראוּ אֶת-הָאֱלֹהִים וְהָבוּ כָבוֹד לַמֶּלֶךְ׃(קוהלת יב' יג') יח וַעֲבָדִים בָּכֶם הִכָּנְעוּ לִפְנֵי אֲדֹנֵיכֵם בְּכָל-יִרְאָה לֹא לְבַד לִפְנֵי יְשָׁרִים וְטוֹבִים כִּי אִם-גַּם-לִפְנֵי נְלוֹזִים׃ יט כִּי בְזֹאת יְאֻשַּׁר אָדָם אִם-יִשָּׂא מַכְאֹב וִיעֻנֶּה חִנָּם רַק לִהְיוֹת לִבּוֹ תָמִים עִם-אֱלֹהָיו׃ כ כִּי מַה-תִּפְאַרְתְּכֶם אִם תַּחֲרִישׁוּ כַּאֲשֶׁר תֻּכּוּ בְאַשְׁמוֹתֵיכֶם רַק אִם-תְּעֻנּוּ עֵקֶב מַעֲשִׂים טוֹבִים וְהַחֲרֵשׁ תַּחֲרִשׁוּן זֹאת תִּהְיֶה לָכֶם לִתְהִלָּה מֵאֵת הָאֱלֹהִים׃ כא כִּי הֲלֹא לָזֹאת נִקְרֵאתֶם וְאַף גַּם-הַמָּשִׁיחַ נִדְכָּה בִּגְלַלְכֶם וַיְהִי לָכֶם לְמוֹפֵת לָלֶכֶת בְּעִקְּבוֹתָיו׃ כב אֲשֶׁר לֹא-חָמָס עָשָׂה וְלֹא מִרְמָה בְּפִיו׃(ישעיהו נג' ט') כג אֲשֶׁר חֵרְפוּהוּ חוֹרְפָיו וְלֹא הֵשִׁיב חֶרְפָּתָם אֶל-חֵיקָם נַעֲנֶה וְלֹא יִפְתַּח-פִּיו כִּי אִם-הִפְקִיד מִשְׁפָּטוֹ לְשֹׁפֵט צֶדֶק׃ כד וְהוּא נָשָׂא אֶת-חַטֹּאתֵינוּ בִּבְשָׂרוֹ עַל-הָעֵץ לְבַעֲבוּר נָמוּת לַחֲטָאָה וְנִחְיֶה לִצְדָקָה וַאֲשֶׁר בַּחֲבֻרָתוֹ נִרְפָּא לָכֶם׃(ישעיהו נג' ה') כה כִּי צֹאן אֹבְדוֹת הֱיִיתֶם (ישעיהו נג' ו') וַתָּשֻׁבוּ כַיּוֹם אֶל-הָרֹעֶה הַמַּשְׁגִּיחַ אֶל-נַפְשֹׁתֵיכֶם׃(ישעיהו מ' יא'; יחזקאל לד' כג')