יא א וְעַתָּה לְכוּ אַחֲרָי כַּאֲשֶׁר אֲנִי הֹלֵךְ אַחֲרֵי הַמָּשִׁיח׃ ב וְהִנְנִי מְשַׁבֵּחַ אֶתְכֶם כִּי-זְכַרְתֶּם אֹתִי בְּכָל-עֵת וְכִי-שְׁמַרְתֶּם אֶת-הַתּוֹרֹת הַנִּמְסָרוֹת כַּאֲשֶׁר מָסַרְתִּי לָכֶם׃ ג אַךְ זֹאת חָפַצְתִּי כִּי-תֵדְעוּן כִּי-רֹאשׁ כָּל-אִישׁ הוּא הַמָּשִׁיחַ וְרֹאשׁ הָאִשָּׁה הוּא הָאִישׁ וְרֹאשׁ הַמָּשִׁיחַ הוּא הָאֱלֹהִים׃(בראשית ג' טז') ד כָּל-אִישׁ אֲשֶׁר יִתְפַּלֵּל אוֹ יִתְנַבֵּא וְרֹאשׁוֹ מְכֻסֶּה בּוֹזֶה אֶת-רֹאשׁוֹ׃ ה וְכָל-אִשָּׁה אֲשֶׁר תִּתְפַּלֵּל אוֹ תִתְנַבֵּא וְאֶת-רֹאשָׁהּ לֹא כִסְּתָה אֶת-רֹאשָׁהּ בָּזְתָה כְּמוֹ אִם-גִּלְּחָה אֶת-רֹאשָׁהּ׃ ו כִּי אִם-הָאִשָּׁה לֹא תִתְכַּסֶּה לָמָּה גַם-לֹא תָגֹז רֹאשָׁהּ וְאִם-חֶרְפָּה הִיא לָאִשָּׁה לָגֹז אוֹ לְגַלַּח שַׂעֲרוֹתֶיהָ תִּתְכַּסֶּה׃ ז וְהָאִישׁ אֵינֶנּוּ מְצֻוֶּה לְכַסּוֹת אֶת-רֹאשׁוֹ בִּהְיוֹתוֹ צֶלֶם אֱלֹהִים וּכְבוֹדוֹ (בראשית א' כז'; ה' א'-ב') אֲבָל הָאִשָּׁה הִיא כְבוֹד הָאִישׁ׃(בראשית ב' כג') ח כִּי אֵין-הָאִישׁ לֻקַּח מִן-הָאִשָּׁה כִּי אִם-הָאִשָּׁה מִן-הָאִישׁ׃ ט גַּם לֹא-נִבְרָא הָאִישׁ בַּעֲבוּר הָאִשָּׁה כִּי אִם-הָאִשָּׁה בַּעֲבוּר הָאִישׁ׃(בראשית ב' יח') י עַל-כֵּן חוֹבַת הָאִשָּׁה לָשֵׂאת כְּסוּת עַל-רֹאשָׁהּ מִפְּנֵי הַמַּלְאָכִים׃ יא אָכֵן אֵין הָאִשָּׁה מִבַּלְעֲדֵי הָאִישׁ וְאֵין הָאִישׁ מִבַּלְעֲדֵי הָאִשָּׁה לִפְנֵי אֲדֹנֵינוּ׃ יב כִּי כַּאֲשֶׁר הָאִשָּׁה מִן-הָאִישׁ כֵּן-גַּם-הָאִישׁ עַל-יְדֵי הָאִשָּׁה וְהַכֹּל מֵאֱלֹהִים׃ יג שִׁפְטוּ-נָא בְנַפְשְׁכֶם הֲכִי נָאוָה לְאִשָּׁה בְּאֵין כַּסּוֹת רֹאשׁ לְהִתְפַּלֵּל אֶל-הָאֱלֹהִים׃ יד הֵן גַּם-הַטֶּבַע יוֹרֶה לָכֶם כִּי חֶרְפָּה לְאִישׁ לְגַדֵּל פֶּרַע שְׂעַר רֹאשׁוֹ׃ טו אֲבָל הָאִשָּׁה כִּי תְגַדֵּל פֶּרַע פְּאֵר הוּא לָהּ כִּי-לִכְסוּת נִתַּן לָהּ הַפָּרַע׃ טז וְאִם-יִבְחַר אִישׁ לְעוֹרֵר מְדָנִים לֹא-זֹה הַדֶּרֶךְ לָנוּ וְלֹא לִקְהִלּוֹת הָאֱלֹהִים׃ יז וְכַאֲשֶׁר אַשְׁמִיעֲכֶם פֹּה דְבָרָי לֹא אֲשַׁבֵּחַ אֶתְכֶם אַחֲרֵי אֲשֶׁר תִּקָּהֲלוּ יַחְדָּו לֹא לְטוֹבָה כִּי אִם-לְרָעָה׃ יח וְזֶה תְּחִלַּת דְּבָרָי כַּאֲשֶׁר תִּקָּהֲלוּ בַקָּהָל הֵן שָׁמַעְתִּי כִּי-יֵשׁ מַחֲלֹקוֹת בֵּינֵיכֶם וּלְמִקְצַת הַשְּׁמוּעָה הֶאֱמָנְתִּי׃ יט כִּי לֹא תֶחְדַּלְנָה הַמַּחֲלֹקוֹת מִקִּרְבְּכֶם לְמַעַן יִוָּדְעוּ הַנֶּאֱמָנִים בָּכֶם׃ כ וְעַתָּה כַּאֲשֶׁר תִּתְאַסְּפוּ יַחְדָּו לֹא-זֹה הַדֶּרֶךְ לֶאֱכֹל מִלֶּחֶם הָאָדוֹן׃ כא כִּי כָל-אִישׁ בַּכֵּרָה יַקְדִּים לֶאֱכֹל חֶלְקוֹ וְאֶחָד רָעֵב וְהַשֵּׁנִי שֹׁתֶה שִׁכּוֹר׃ כב הַאֵין לָכֶם בָּתִּים לֶאֱכֹל וְלִשְׁתּוֹת שָׁמָּה אוֹ אִם-תָּבוּזוּ לִקְהַל הָאֱלֹהִים וְהוֹבִישׁ פְּנֵי אֵלֶּה אֲשֶׁר אֵין-בְּיָדָם מְאוּמָה מָה אֹמַר לָכֶם הֲכִי אֲשַׁבֵּחֲכֶם עֵקֶב זֹאת לֹא אֲשַׁבֵּחַ אֶתְכֶם׃ כג כִּי אָנֹכִי מִן-הָאָדוֹן קִבַּלְתִּי כַּאֲשֶׁר גַּם-מָסַרְתִּי לָכֶם כִּי הָאָדוֹן יֵשׁוּעַ בַּלַּיְלָה אֲשֶׁר-הִסְגִּירוּ אֹתוֹ לָקַח לָחֶם׃ כד וַיְבָרֵךְ וַיִּבְצַע וַיֹּאמַר קְחוּ אִכְלוּ זֶה הוּא בְשָׂרִי הַנִּבְצָע בַּעַדְכֶם זֹאת עֲשׂוּ לְזִכְרֹנִי׃ כה וּכְמוֹ-כֵן אַחֲרֵי אָכְלָם לָקַח אֶת-הַכּוֹס וַיֹּאמַר הַכּוֹס הַזֹּאת הִיא הַבְּרִית הַחֲדָשָׁה בְּדָמִי זֹאת עֲשׂוּ בְּכָל-עֵת אֲשֶׁר תִּשְׁתּוּ לְזִכְרֹנִי׃(שמות כד' ח'; ירמיהו לא' לא') כו כִּי בְכָל-עֵת אֲשֶׁר תֹּאכְלוּ אֶת-הַלֶּחֶם הַזֶּה וְשָׁתוֹ אֶת-הַכּוֹס הַזֹּאת תַּשְׁמִיעוּ מוֹת אֲדֹנֵינוּ עַד כִּי יָבוֹא׃ כז עַל-כֵּן מִי אֲשֶׁר יֹאכַל מִלֶּחֶם הָאָדוֹן אוֹ-יִשְׁתֶּה מִכּוֹסוֹ וְלִבּוֹ לֹא נָכוֹן עִמּוֹ מָעַל מַעַל בִּבְשַׂר אֲדֹנֵינוּ וּבְדָמוֹ׃ כח אֲבָל יִבְחַן אָדָם אֶת-נַפְשׁוֹ וְאָז מִן-הַלֶּחֶם יֹאכַל וּמִן-הַכּוֹס יִשְׁתֶּה׃ כט כִּי הָאֹכֵל וְהַשֹּׁתֶה שֶׁלֹא כָרָאוּי אֹכֵל וְשֹׁתֶה לְאַשְׁמָתוֹ כִּי אֶת-בְּשַׁר הָאָדוֹן לֹא הִבְדִּיל לוֹ כַּמִּשְׁפָּט׃ ל עַל-כֵּן רַבִּים נְכֵאִים וְחֹלִים בָּכֶם וְרַבִּים יְשֵׁנֵי עָפָר׃ לא אָכֵן אִם-נִבְחַן אֶת-נַפְשֵׁנוּ לֹא נִשָּׁפֵט׃ לב וְאַף אִם-נִשָּׁפֵט יַסֹּר יְיַסְּרֵנוּ יְהוָֹה לְמַעַן לֹא נֶאְשַׁם עִם-הָעוֹלָם׃ לג לָכֵן אַחַי כַּאֲשֶׁר תִּתְאַסְּפוּ יַחְדָּו לֶאֱכֹל הוֹחִילוּ אִישׁ לְרֵעֵהוּ׃ לד וּמִי אֲשֶׁר יִרְעַב יֹאכַל בְּבֵיתוֹ וְלֹא יִהְיֶה לָכֶם אָוֶן וַעֲצָרָה וְיֶתֶר הַדְּבָרִים אֶעֶרְכָה לִפְנֵיכֶם בְּבֹאִי׃