ח א וְעַל-דְּבַר אֱלִילִים הֵן נוֹדַע כִּי יֶשׁ-דַּעַת לְכֻלָּנוּ אַךְ דַּעַת תוֹסִיף גַּאֲוָה וְאַהֲבָה מְשִׁיבַת נָפֶשׁ׃ ב כִּי יַחְשָׁב-אִישׁ ךִּ-הוּא נְבוֹן דָּבָר עוֹד לֹא-יָבִין דָּבָר לַאֲשֻׁרוֹ כַּאֲשֶׁר נָכוֹן-לוֹ׃ ג אֲבָל אִם-יֶאֱהַב אֶת-אֱלֹהִים אֱלֹהִים הוּא יְבוֹנְנֵהוּ׃ ד וְעַל-דִּבְרַת אֹכֶל מִזִּבְחֵי הָאֱלִילִים יָדַעְנוּ כִּי-אֱלִיל כְּאַיִן הוּא בָּעוֹלָם וְכִי אֵין אֱלֹהִים זוּלָתִי אֶחָד׃(דברים ד' לה') ה וְאַף כִּי-יֵשׁ נִקְרָאִים אֱלֹהִים אִם-בַּשָּׁמַיִם וְאִם-בָּאָרֶץ כְּמוֹ הֵם אֱלֹהִים רַבִּים וַאֲדֹנִים רַבִּים׃ ו בְּכָל-זֹאת לָנוּ רַק-אֱלֹהִים אֶחָד הוּא אֲבִי-עַד אֲשֶׁר מִמֶּנּוּ הַכֹּל וְלוֹ אֲנָחְנוּ (ישעיהו מב' ה') וְאָדוֹן אֶחָד יֵשׁוּעַ הַמָּשִׁיחַ אֲשֶׁר הַכֹּל עַל-יָדוֹ וְעַל-יָדוֹ גַּם-אֲנָחְנוּ׃(תהילים לג' ו') ז אַךְ לֹא כֻלָּם קָנוּ הַדַּעַת הַזֹּאת כִּי-יֵשׁ אֲשֶׁר לִבָּם פֹּנֶה אֶל-אֱלִילִים עַד-הַיּוֹם הַזֶּה וְאֹכְלִים מִזִּבְחָם אֲשֶׁר יַקְרִיבוּ לֶאֱלִיל עַד-אֲשֶׁר לִבָּם הַנָּבוּב יִטַּמָּא׃ ח וְהִנֵּה אֹכֶל לֹא יְקָרְבֵנוּ אֶל-אֱלֹהִים אִם-לֹא נֹאכַל לֹא יְבוֹאֵנוּ חֶסֶר וְאִם-נֹאכַל לֹא-נִמְצָא יִתְרוֹן׃ ט אַךְ הִשָּׁמְרוּ לָכֶם פֶּן-תִּתֵּן שְׁרִירוּת לִבְּכֶם מִכְשׁוֹל לְאֵין אוֹנִים׃ י כִּי אִם-אַתָּה אִישׁ דַּעַת וְתֵשֵׁב אֶל-הַשֻּׁלְחָן בְּהֵיכַל הָאֱלִילִים הֲלֹא רֹאֲךָ חֲסַר אוֹנִים יְפֻתֶּה בִלְבָבוֹ לֶאֱכֹל מִזִּבְחֵי הָאֱלִילִים׃ יא וּבְכֵן בְּיִתְרוֹן דַעְתְּךָ יֹאבַד אָחִיךָ חֲסַר אוֹנִים אֲשֶׁר נָתַן הַמָּשִׁיחַ נַפְשׁוֹ בַּעֲדוֹ׃ יב וְאִם-כָּכָה אַתֶּם חֹטְאִים לַאֲחֵיכֶם וּתְדַכְּאוּ אֶת-לִבָּם הַנָּבוּב לַמָּשִׁיחַ אַתֶּם חֹטְאִים׃ יג עַל-כֵּן אִם-מַאֲכָלִי יִהְיֶה לְמוֹקֵשׁ לְאָחִי לֹא-אֹכַל בָּשָׂר לְעוֹלָם פֶּן-אָחִי יִוָּקֶשׁ-בּוֹ׃