ה א מִפִּי-כֹל יָצְאָה הַשְּׁמוּעָה כִּי-זְנוּת בְּקִרְבְּכֶם וּזְנוּת אֲשֶׁר אֵין גַּם-בְּקֶרֶב הַגּוֹיִם כִּי-יְגַלֶּה אִישׁ אֶת-עֶרְוַת אָבִיו׃(ויקרא יח' ח') ב וְאַתֶּם תַּרְחִיבוּ פֶה וְלֹא תִתְאַבְּלוּ עַד-אֲשֶׁר הִכָּרֵת יִכָּרֵת הָאִישׁ הָעֹשֶׂה זֹאת מֵעֲדַתְכֶם׃ ג וְאָנֹכִי אַף כִּי מֵרָחוֹק אָנִי הִנְנִי עֹמֵד אֶצְלְכֶם בְּרוּחִי וּכְדַיָּן בֵּינֵיכֶם כְּבָר חָרַצְתִּי מִשְׁפַּט הָעֹשֶׂה זֹאת׃ ד כִּי תִתְאַסְּפוּ בְּשֵׁם אֲדֹנֵינוּ יֵשׁוּעַ הַמָּשִׁיחַ וְגַם-רוּחִי בְתוֹכְכֶם עִם-גְּבוּרָה מֵאֵת אֲדֹנֵינוּ יֵשׁוּעַ הַמָּשִׁיחַ׃ ה וְאָז תִּתְּנוּ אֶת-הָאִישׁ הַזֶּה לִידֵי הַשָּׂטָן לְכַלוֹת אֶת-הַבָּשָׂר וּלְהָבִיא תְשׁוּעָה לָרוּחַ בְּיוֹם יֵשׁוּעַ אֲדֹנֵינוּ׃ ו לֹא-טוֹב הַדָּבָר אֲשֶׁר תִּתְהַלְּלוּ בְמוֹ-פִיכֶם הֲלֹא יְדַעְתֶּם כִּי שְׂאֹר מְעַט יַחֲמִיץ אֶת-כָּל-הָעֲרִיסָה׃ ז בַּעֲרוּ אֶת-הַשְּׂאֹר הַיָּשָׁן מִקִּרְבְּכֶם (שמות יג' ז') לְמַעַן תִּהְיוּ לַעֲרִיסָה חֲדָשָׁה לְחַלַּת מַצָּה כִּי גַם-מָשִׁיחַ זֶבַח פִּסְחֵנוּ הָקְרַב בַּעֲדֵנוּ׃(שמות יב' כא') ח וּבְכֵן נָחֹג אֶת-הֶחָג לֹא-בִשְׂאֹר יָשָׁן וְלֹא-בִשְׂאֹר רֹעַ וְרֶשַׁע כִּי אִם-בְּמַצּוֹת תֹּם וֶאֱמֶת׃ ט כָּתַבְתִּי אֲלֵיכֶם בְּמִכְתָּבִי לְבַל תִּתְעָרְבוּ עִם-אַנְשֵׁי זְנוּנִים׃ י לֹא אָמַרְתִּי כָזֹאת עַל-אַנְשֵׁי זְנוּנִים בָּעוֹלָם אוֹ עַל-בֹּצְעֵי בֶצַע וְאַנְשֵׁי חָמָס וְעֹבְדֵי אֱלִילִים כִּי אִם-כֵּן הַמִּצְוָה עֲלֵיכֶם לָצֵאת מִן-הָעוֹלָם׃ יא אֲבָל כָּתַבְתִּי כָזֹאת לְבַל תִּתְעָרְבוּ עִם-אִישׁ אֲשֶׁר בְּשֵׁם אָח יִקָּרֵא וְהוּא אִישׁ זְנוּנִים אוֹ-בֹצֵעַ בֶּצַע אוֹ-עֹבֵד אֱלִילִים אוֹ מְגַדֵּף אוֹ סֹבֵא יַיִן אוֹ אִישׁ חָמָס הוּא הָאִישׁ אֲשֶׁר עִמּוֹ לֹא תֹאכֵלוּ׃ יב כִּי מַה-לִּי לִשְׁפֹּט אֶת-אֵלֶּה אֲשֶׁר מִחוּץ לַעֲדָתֵנוּ רַק אֵלֶּה אֲשֶׁר בְּקִרְבֵּנוּ הֵם אֹתָם אַתֶּם שֹׁפְטִים׃ יג אֲבָל אֵלֶּה אֲשֶׁר מִחוּץ אֱלֹהִים יִשְׁפֹּט אֹתָם וְאַתֶּם בַּעֲרוּ אֶת-הָרָע מִקִּרְבְּכֶם׃